ຕອນເຊົ້າຂອງວັນທີ 27 ເມສາ 2022 ທີ່ສະໂມສອນເມືອງບຸນໃຕ້, ແຂວງຜົ້ງສາລີ ທ່ານ ທອງສີ ເສົາສຸລິພົມ ປະທານສະພາປະຊາຊົນແຂວງ, ປະທານຄະນະ ສສຊ ປະຈໍາເຂດເລືອກຕັ້ງ 2 ແຂວງຜົ້ງສາລີ ສືບຕໍ່ເຄື່ອນໄຫວຕິດຕາມ, ກວດກາ, ຊຸກຍູ້ການຈັດຕັ້ງປະຕິບັດກົດໝາຍ, ນິຕິກໍາໃຕ້ກົດໝາຍທີ່ພົວພັນວຽກງານເຊົ່າ, ສໍາປະທານທີ່ດິນຂອງລັດ ແລະ ການຈັດຕັ້ງປະຕິບັດໜ້າທີ່ວຽກງານຂອງຄະນະສະມາຊິກສະພາປະຊາຊົນຂັ້ນແຂວງປະຈຳເມືອງ; ເຂົ້າຮ່ວມມີບັນດາທ່ານ ສະມາຊິກສະພາປະຊາຊົນແຂວງ ປະຈໍາເມືອງ, ບັນດາທ່ານຮອງເລຂາພັກເມືອງ, ຄະນະປະຈໍາພັກເມືອງ, ກຳມະການພັກເມືອງ, ຫົວໜ້າຫ້ອງການ, ອົງການທຽບເທົ່າຫ້ອງການຂັ້ນເມືອງ, ກອງບັນຊາການ ປກຊ ເມືອງ-ປກສ ເມືອງ, ອົງການແນວລາວສ້າງຊາດເມືອງ, ສະຫາພັນນັກຮົບເກົ່າເມືອງ, ອົງການຈັດຕັ້ງມະຫາຊົນຂັ້ນເມືອງ ເຂົ້າຮ່ວມ.
ທີ່ກອງປະຊຸມ ໄດ້ຮັບຟັງ ທ່ານ ບຸນແພງ ລາວລີ ຮອງເຈົ້າເມືອງບຸນໃຕ້ ຜູ້ຊີ້ນໍາວຽກງານເສດຖະກິດຂັ້ນເມືອງ ຂຶ້ນລາຍງານການຈັດຕັ້ງປະຕິບັດກົດໝາຍ, ນິຕິກໍາໃຕ້ກົດໝາຍທີ່ພົວພັນວຽກງານເຊົ່າ ແລະ ວຽກງານສໍາປະທານທີ່ດິນຂອງລັດ ໃນໄລຍະຜ່ານມາ, ຮັບຟັງ ທ່ານ ນາງ ສຸກສະຫວັນ ສຸລິຄຳ ກຳມະການປະຈໍາພັກເມືອງ, ຫົວໜ້າຄະນະຈັດຈໍຕັ້ງເມືອງ, ຮອງຫົວໜ້າຄະນະສະມາຊິກສະພາປະຊາຊົນແຂວງ ປະຈໍາເມືອງບຸນໃຕ້ ຂຶ້ນລາຍງານ ການຈັດຕັ້ງປະຕິບັດໜ້າທີ່ວຽກງານຂອງຄະນະສະມາຊິກສະພາປະຊາຊົນຂັ້ນແຂວງປະຈຳເມືອງ, ຮັບຟັງ ທ່ານ ນາງ ພີມພາ ມະຫາວົງທັດ ຫົວໜ້າຂະແໜງຈັດຕັ້ງ-ກວດກາ ຂຶ້ນແນະນໍາການຈັດຕັ້ງປະຕິບັດໜ້າທີ່ວຽກງານຂອງຄະນະສະມາຊິກສະພາປະຊາຊົນຂັ້ນແຂວງປະຈຳເມືອງ ແລະ ບຸກຄະລາກອນເສນາທິການຊ່ວຍວຽກຄະນະສະມາຊິກສະພາປະຊາຊົນຂັ້ນແຂວງປະຈຳເມືອງ. ຈາກນັ້ນ ຜູ້ເຂົ້າຮ່ວມກອງປະຊຸມໄດ້ພັດປ່ຽນກັນປະກອບຄວາມເຫັນ ຢ່າງກົງໄປກົງມາລັກສະນະສ້າງສັນ.
ຕອນບ່າຍຂອງວັນດຽວກັນນີ້ທ່ານ ທອງສີ ເສົາສຸລິພົມ ພ້ອມດ້ວຍທີມງານຂັ້ນແຂວງ ແລະ ຂັ້ນເມືອງ ລົງຕິດຕາມຊຸກຍູ້ ບໍລິສັດຢູນນານຈົງເຊີນມາຍນີ້ງລາວຈຳກັດເຂດ ຈາຫໍ່ ເມືອງບຸນໃຕ້ (ໂຄງການຂຸດຄົ້ນ ແລະ ປຸງແຕ່ງແຮ່ສັງກະສີ) ແລະ ຍັງຈະສືບຕໍ່ ລົງຕິດຕາມຊຸກຍູ້ ບໍລິສັດ ປູກພືດອຸດສາຫະກຳ ຂອງບໍລິສັດຈິ່ງຈ່ຽງ ເຂດລ້ອງນາຍ ເມືອງບຸນໃຕ້ ໃນວັນທີ 28 ເມສາ 2022, ເພື່ອຕິດຕາມ, ຊຸກຍູ້ກ່ຽວກັບ ຄວາມຄືບໜ້າການຈັດຕັ້ງປະຕິບັດສັນຍາໂຄງການ ແລະ ການເກັບຊື້ ຜົນຜະລິດຂອງບໍລິສັດໃນແຕ່ລະໄລຍະ ແລະ ຊຸກຍຸ້ການມອບພັນທະເພື່ອການພັດທະນາທ້ອງຖິ່ນ ຂອງບໍລິສັດ, ການມອບພັນທະຕ່າງໆ ຈາກການສຳປະທານທີ່ດິນ ໃຫ້ສອດສອດກັບບັນດາລະບຽບການ ແລະ ກົດໝາຍ ໂດຍສະເພາະ ກົດໝາຍວ່າດ້ວຍທີ່ດິນ ສະບັບເລກທີ 70/ສພຊ, ລົງວັນທີ 21 ມິຖຸນາ 2019 ມາດຕາ 30 ຂໍ້ 4 ແລະ ກົດໝາຍວ່າດ້ວຍແຮ່ທາດ.
ພາບ-ຂ່າວ: ທອງຄໍາ ວິໄລຈິດ.