ເພື່ອເປັນການລົງຕິດຕາມ, ກວດກາ, ຊຸກຍູ້ການເຄື່ອນໄຫວຂອງໂຮງງານປຸງແຕ່ງນ້ຳມັນເຊື້ອໄຟ ຍອດງື່ມພາວເວີ ມະຫາຊົນ ເພື່ອເປັນຂໍ້ມູນໃຫ້ແກ່ສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ເຂົ້າຮ່ວມ ກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX, ສະນັ້ນມາໃນວັນທີ 09 ມີຖຸນາ 2023 ຄະນະທີມງານສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 9 ແລະ ສະພາປະຊາຊົນແຂວງ ໄດ້ສົມທົບກັບ ພະແນກການທີ່ກ່ຽວຂ້ອງຂອງແຂວງ ລົງຕິດຕາມ, ຊຸກຍູ້ການເຄື່ອນໄຫວຂອງ ໂຮງງານປຸງແຕ່ງນ້ຳມັນເຊື້ອໄຟ ຍອດງື່ມພາວເວີ ມະຫາຊົນ ນຳໂດຍທ່ານ ບຸນໂຮມ ເທດທານີ ປະທານຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 9, ປະທານສະພາປະຊາຊົນແຂວງ, ມີທ່ານສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 9, ສະມາຊິກສະພາປະຊາຊົນແຂວງ, ພະແນກອຸດສາຫະກຳ ແລະ ການຄ້າແຂວງ, ກົມຄຸ້ມຄອງມາດຕະຖານ ກະຊວງອຸດສະຫະກຳ ແລະ ການຄ້າແຂວງ, ທິມງານຈາກສະພາປະຊາຊົນແຂວງ ແລະ ຂະແໜງການທີ່ກ່ຽວຂ້ອງລົງຕິດຕາມກວດກາໃນຄັ້ງນີ້.
ໃນໂອກາດດັ່ງກ່າວ ທ່ານ ສົມຫວັງ ຄຸຣູລັດ ປະທານບໍລິສັດ ປຸງແຕ່ງນໍ້າມັນເຊື້ອໄຟ ຍອດງື່ມພາວເວີ ມະຫາຊົນ ໄດ້ລາຍງານໂດຍຫຍໍ້ ກ່ຽວກັບການຈັດຕັ້ງປະຕິບັດວຽກງານໃນໄລຍະຜ່ານມາ ໂຮງງານປຸງແຕ່ງນໍ້າມັນເຊື້ອໄຟຍອດງື່ມ ພາວເວີຈຳກັດ ສ້າງຕັ້ງຂຶ້ນໃນວັນທີ 01 ພະຈິກ 2021 ດ້ວຍທຶນຈົດທະບຽນ 100 ຕື້ກີບໃນຮູບແບບບໍລິສັດຈຳກັດ ແລະ ໄດ້ປ່ຽນມາເປັນບໍລິສັດມະຫາຊົນ ພ້ອມດ້ວຍການເພີ່ມທຶນຈົດທະບຽນເປັນ 150 ຕື້ກີບ ໃນວັນທີ 10 ມັງກອນ 2023, ດໍາເນີນທຸລະກິດກ່ຽວກັບການປຸງແຕ່ງນໍ້າມັນເຊຶື້ອໄຟປະເພດນໍ້າມັນກາຊວນແລະ ໄດ້ເພີ່ມສາຍການຜະລິດປຸງແຕ່ງນໍ້າມັນແອັດຊັງ ເພື່ອຕອບສະໜອງຜົນການຜະລິດໃຫ້ທົ່ວສົງຄົມ, ເຊິ່ງໄດ້ດຳເນີນທຸລະກິດກ່ຽວກັບການປຸງແຕ່ງນໍ້າມັນເຊື້ອໄຟປະເພດນໍ້າມັນກາຊວນ ແລະ ນໍ້າມັນແອັດຊັງ ເປັນຜະລິດຕະພັນທີ່ມີຄຸນະພາບ ຕາມມາດຕະຖານ
ແຫ່ງຊາດ ມີມູນຄ່າການລົງທຶນທັງໝົດ 107,56 ຕື້ກີບ, ທຳການຜະລິດເບື້ອງຕົ້ນ 10 ລ້ານລິດຕໍ່ເດືອນ ດ້ວຍເວລາການເຮັດວຽກຂອງເຄື່ອງຈັກ 8 ຊົ່ວໂມງຕໍ່ມື້, ມີລົດຂົນສົ່ງນໍ້າມັນເຊື້ອໄຟ ເປັນຂອງຕົວເອງຈໍານວນ 15 ຄັນ,ມູນຄ່າທັງໝົດ 15,78 ຕື້ກີບ, ໃນທິດທາງ ຕໍ່ໜ້າບໍລິສັດຍອດງື່ມພາວເວີ ມະຫາຊົນ ໄດ້ມີໂຄງການຮ່ວມທຸລະກິດລະຫວ່າງ ລັດວິສາຫະກິດນໍ້າມັນເຊື້ອໄຟລາວ ກັບບໍລິສັດ ຍອດງື່ມພາວເວີມະຫາຊົນ ເຂົ້າມາລົງທຶນ ແລະ ບໍລິຫານກິດຈະການຈຳໜ່າຍນ້ຳມັນເຊື້ອໄຟພາຍໃນແຂວງຊຽງຂວາງ.
ໃນຕອນທ້າຍ ທ່ານ ບຸນໂຮມ ເທດທານີ ໄດ້ມີຄໍາເຫັນຊີ້ນໍາຕໍ່ໂຮງງານດັ່ງກ່າວສະແດງຄວາມຍ້ອງຍໍຊົມເຊີຍ ຕະຫຼອດໄລຍະຜ່ານມາໂຮງງານທີ່ໄດ້ມີຄວາມພະຍາຍາມໃນການທຸ່ມເທເຫື່ອແຮງສະຕິປັນຍາທຶນຮອນອັນມະຫາສານເຂົ້າໃນການສ້າງຕັ້ງໂຮງງານ ແລະ ທ່ານໄດ້ມີຄໍາເຫັນຊີ້ນໍາຕໍ່ໂຮງງານດັ່ງກ່າວໃຫ້ໄດ້ສືບຕໍ່ແກ້ໄຂຫຼາຍຢ່າງ ໂດຍສະເພາະແມ່ນສຸມໃສ່ກໍ່ສ້າງພຶ້ນຖານໂຄງລ່າງໃຫ້ດີຂຶ້ນກວ່າເກົ່າ, ສືບຕໍ່ນໍາເອົານໍາ ມັນທີດີມາປຸງໃຫ້ມີຄຸນະ ພາບສາມາດສະໜອງໃຫ້ຕະຫຼາດຢ່າງພຽງພໍ.
ສະພາປະຊາຊົນແຂວງຊຽງຂວາງ
ຂ່າວໂດຍ: ນາງ ສຸກສະຫວັນ ອິນທະແສງ