ໃນຕອນເຊົ້າ ຂອງວັນທີ 09 ພະຈິກ 2022 ທີ່ຜ່ານມານີ້, ທ່ານ ວົງສະຫວັນ ເທບພະຈັນ ຮອງເລຂາຄະນະບໍລິຫານງານພັກແຂວງ, ປະທານຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງ ທີ 6, ປະທານສະພາປະຊາຊົນແຂວງ ໄດ້ລົງເຄື່ອນໄຫວພົບປະຜູ້ມີສິດເລືອກຕັ້ງ ແລະ ເຜີຍແຜ່ເອກະສານຜົນສຳເລັດກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX, ສະພາປະຊາຊົນແຂວງ ຫຼວງພະບາງ ຊຸດທີ II ແລະ ບາງເນື້ອໃນ ເອກະສານ ມະຕິກອງປະຊຸມຄົບຄະນະ ຄັ້ງທີ 4 ຂອງຄະນະບໍລິຫານງານສູນກາງພັກ ສະໄໝທີ XI. ຢູ່ທີ່ຫ້ອງປະຊຸມໃຫຍ່ ກອງບັນຊາການທະຫານແຂວງ ຫຼວງພະບາງ. ມີຄະນະພັກ-ຄະນະນຳ, ຄະນະຫ້ອງ ຈຳນວນ 06 ຫ້ອງ, ພະນັກງານ, ນັກຮົບ ເຂົ້າຮ່ວມຮັບຟັງ ໃຫ້ກຽດຕ້ອນຮັບໂດຍສະຫາຍ ພັທ ວິລະສິນ ມິດຕະພອນ ຄະນະພັກ, ຮອງຫົວໜ້າການເມືອງ ກອງບັນຊາການທະຫານແຂວງ.

ໂອກາດນີ້ ສະຫາຍ ພັທ ວິລະສິນ ມິດຕະພອນ ໄດ້ຜ່ານບົດສະຫຼຸບການຈັດຕັ້ງປະຕິບັດໜ້າທີ່ວຽກງານ ໃນໄລຍະ 09 ເດືອນຜ່ານມາ ແລະ ທິດທາງແຜນການ ໃນ 03 ເດືອນຕໍ່ໜ້າ ເຊິ່ງທ່ານໄດ້ຍົກໃຫ້ເຫັນ ບາງຜົນສຳເລັດໃນການຈັດຕັ້ງປະຕິບັດຕາມ 04 ໜ້າທີ່ໃຫຍ່ 26 ແຜນງານ ທີ່ຄະນະພັກ-ຄະນະນຳ ກະຊວງປ້ອງກັນປະເທດ ວາງອອກ, ໂດຍທ່ານໄດ້ຍົກໃຫ້ເຫັນທັງຂໍ້ສະດວກ, ຂໍ້ຫຍຸ້ງຍາກ ແລະ ບົດຮຽນທີ່ຖອດຖອນໄດ້ ຂອງການຈັດຕັ້ງປະຕິບັດວຽກງານ ໃນໄລຍະຜ່ານມາ. ໃນນັ້ນ, ໄດ້ຍົກໃຫ້ເຫັນສະພາບຄວາມສະຫງົບ, ການບໍາລຸງກໍ່ສ້າງວຽກງານແນວຄິດ, ວຽກງານພະລາທິການ ແລະ ວຽກງານການພົວພັນຮ່ວມມືສາກົນ ໃຫ້ກອງປະຊຸມ ຊາບໂດຍຫຍໍ້. ຈາກນັ້ນ ທ່ານຮອງເລຂາຄະນະບໍລິຫານງານພັກແຂວງ, ປະທານຄະນະສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງ ທີ 6, ປະທານສະພາປະຊາຊົນແຂວງ ໄດ້ເຜີຍແຜ່ເອກະສານຜົນສຳເລັດ ກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX, ສະພາປະຊາຊົນແຂວງ ຫຼວງພະບາງ ຊຸດທີ II ແລະ ບາງເນື້ອໃນ ເອກະສານ ມະຕິກອງປະຊຸມຄົບຄະນະ ຄັ້ງທີ 4 ຂອງຄະນະບໍລິຫານງານສູນກາງພັກ ສະໄໝທີ XI, ໃຫ້ບັນດາຄະນະພັກ-ຄະນະນຳ,

ຄະນະຫ້ອງ ແລະ ພະນັກງານ, ນັກຮົບໄດ້ຮັບຟັງ. ເຊິ່ງຜົນຂອງກອງປະຊຸມ ແມ່ນໄດ້ພິຈາລະນາ ແລະ ຮັບຮອງເອົາຫຼາຍໆ ບັນຫາທີ່ສໍາຄັນຂອງຊາດ ແລະ ຂອງແຂວງ. ຈຸດປະສົງຂອງການເຜີຍແຜ່ເອກະສານໃນຄັ້ງນີ້ ແມ່ນເພື່ອແນໃສ່ເຮັດໃຫ້ນາຍ ແລະ ພົນທະຫານ ມີຄວາມຮັບຮູ້, ເຂົ້າໃຈ ແລະ ກຳແໜ້ນຕໍ່ແນວທາງ ນະໂຍບາຍຂອງພັກ, ຮັບຮູ້ເນື້ອໃນຜົນສໍາເລັດຂອງກອງປະຊຸມ ເພື່ອນໍາໄປຈັດຕັ້ງຜັນຂະຫຍາຍເຂົ້າສູ່ການດຳລົງຊີວິດ ແລະ ການຈັດຕັ້ງປະຕິບັດໜ້າທີ່ວຽກງານ ໃຫ້ຖືກຕ້ອງ, ສອດຄ່ອງ ແນວທາງຂອງພັກ ແລະ ຕາມລະບຽບ, ກົດໝາຍ ຂອງລັດ.

ພາບ ແລະ ຂ່າວໂດຍ: ໄວພົດ ເສລີພົງໄຊ