ໂດຍເຫັນໄດ້ເຖິງຄວາມສໍາຄັນຂອງວຽກງານການປ້ອງກັນ, ຄວບຄຸມ ແລະ ສະກັດກັ້ນການແຜ່ລະບາດຂອງເຊື້ອພະຍາດໂຄວິດ – 19 ທີ່ຍັງມີການແຜ່ລະບາດເປັນວົງກວ້າງຢູ່ໃນປັດຈຸບັນແລະ ການຂາດເຂີນເຄື່ອງມືອຸປະກອນທີ່ຈະນໍາໃຊ້ເຂົ້າໃນວຽກງານການປ້ອງກັນ, ຄວບຄຸມ ແລະ ສະກັ້ນການແຜ່ລະບາດຂອງເຊື້ອພະຍາດໂຄວິດ – 19 ຢູ່ໂຮງໝໍແຂວງສະຫວັນນະເຂດ ໃນປະຈຸບັນ, ດັ່ງນັ້ນ, ມາໃນຕອນບ່າຍຂອງວັນທີ 24 ມີນາ 2022 ນີ້ ທ່ານ ກົງແກ້ວ ມີວໍລະຈັກ ຮອງເລຂາພັກແຂວງ ປະທານສະພາປະຊາຊົນແຂວງໆສະຫວັນນະເຂດ ພ້ອມດ້ວຍ ທ່ານ ພູທອນ ພຸດທະຂັນຕິ ເລຂາທິການສະພາປະຊາຊົນແຂວງ ໄດ້ນໍາເອົາອຸປະກອນການແພດ ເພື່ອນໍາໃຊ້ເຂົ້າໃນວຽກງານການປ້ອງກັນພະຍາດໂຄວິດ-19 ມາມອບໃຫ້ໂຮງໝໍແຂວງສະຫວັນນະເຂດ ເຊິ່ງເຄື່ອງທີ່ນໍາມາມອບໃນຄັ້ງນີ້ປະກອບມີ ຊຸດ PPE ຈໍານວນ 26 ຊຸດ, ຖົງມືອະເຊື້ອ 10 ກັບ ແລະ ນ້ຳດື່ມຈຳນວນໜຶ່ງ ລວມມູນຄ່າ ຫ້າລ້ານສີ່ແສນຫົກສິບພັນກີບ ( 5.460.000ກີບ ) ໂດຍຕາງໜ້າກ່າວຮັບເຄື່ອງຊ່ວຍເຫຼືອໃນຄັ້ງນີ້ໂດຍແມ່ນທ່ານ ດຣ ນາງ ພູວິໄລ ແກ້ວມຸງຄຸນ ຜູ້ອຳນວຍການໂຮງໝໍແຂວງໆສະຫວັນນະເຂດ ໃນໂອກາດດັ່ງກ່າວນີ້ທ່ານ ດຣ ນາງ ພູວິໄລ ແກ້ວມຸງຄຸນ ກໍ່ໄດ້ສະແດງຄວາມຂອບອົກຂອບໃຈເປັນຢ່າງສູງ ມາຍັງການນໍາຂອງສະພາປະຊາຊົນແຂວງ ເຊິ່ງເຄື່ອງດັ່ງກ່າວຈະໄດ້ນໍາໄປໃຊ້ໃຫ້ເກີດປະໂຫຍດສູງສຸດ.