ໃນວັນທີ 3 ສິງຫາ 2024 ຜ່ານມານີ້ ຢູ່ທີ່ຫ້ອງວ່າການເມືອງຄອບ ແລະ ເມືອງຊຽງຮ່ອນ ແຂວງໄຊຍະບູລີ. ໄດ້ມອບເຄື່ອງຊ່ວຍເຫຼືອຜູ້ປະສົບໄພພິບັດນໍ້າຖ້ວມ ໂດຍໃຫ້ກຽດຕາງໜ້າມອບຂອງທ່ານ ເພັງນິລັນ ຄໍາພັນເພັງ ຮອງເລຂາພັກແຂວງ, ປະທານສະພາປະຊາຊົນແຂວງ ພ້ອມດ້ວຍຄະນະ, ເປັນກຽດກ່າວຮັບຂອງທ່ານເຈົ້າເມືອງ ຄະນະນໍາອົງການປົກຄອງເມືອງ ຂອງເມືອງດັ່ງກ່າວ.
ເຄື່ອງທີ່ນໍາມາມອບໃຫ້ເມືອງຄອບມີຄື: ນໍ້າດື່ມ 110 ແພັກ, ສັງກະສີ 285 ແຜນ, ເຂົ້າສານ 792 ກິໂລ, ເຄື່ອງໃນຄົວເຮືອນ 7 ແກັດ, ມຸ້ງ 7 ດາງ, ສາດ 7 ຜືນ, ຜ້າຫົ່ມ7 ຜືນ, ເກີບ ແລະ ອື່ນໆ ລວມມູນຄ່າ 171, 058 000 ກີບ ແລະເມືອງຊຽງຮ່ອນ ມີຄື: ເຂົ້າສານ 1 ໂຕນ, ນໍ້າດື່ມ 150 ແພັກ, ສັງກະສີ 395 ແຜນ, ຕຽງນອນ ແລະເຄື່ອງນອນ 10 ຊຸດ ລວມມູນຄ່າ 72, 850 000 ກີບ. ລວມມູນຄ່າທັງໝົດ 243, 908 000 ກີບ.

ສໍາລັບເຄື່ອງດັ່ງກ່າວແມ່ນໄດ້ຮັບການບໍລິຈາກ ຈາກບັນດາບໍລິສັດ, ຫ້າງຮ້ານ, ບຸກຄົນ, ນິຕິບຸກຄົນ, ທັງພາກລັດ ແລະ ເອກະຊົນທັງພາຍໃນ ແລະຕ່າງປະເທດ ແລະ ໃນຕອນທ້າຍພິທີ ເລຂາພັກເມືອງ, ຄະນະນໍາຂອງເມືອງ ກໍ່ໄດ້ກ່າວຄໍາຂອບໃຈຕໍ່ຂັ້ນເທິງ ຍາມໃດກໍ່ເປັນຫວ່ງເປັນໃຍ ໃຫ້ຄວາມຊ່ວຍເຫຼືອຕະຫຼອດມາ ທ່ານ ຍັງໃຫ້ຄໍາໜັ້ນວ່າຈະນໍາໃຊ້ເຄື່ອງດັ່ງກ່າວນີ້ໄປຊ່ວຍເຫຼືອໃຫ້ກັບພໍ່, ແມ່ ປະຊາຊົນ ຜູ້ທີ່ຖືກຜົນກະທົບຈາກໄພພິບັດນໍ້າຖ້ວມໃນຄັ້ງນີ້ໄດ້ຮັບຢ່າງທົ່ວເຖີງ.
…………………….
ໂດຍ: ອິນທີ ຂຽວສີຟ້າ