ພິທີວາງສີລາລືກໂຄງການກໍ່ສ້າງພະພຸດທະຮູບ ພຸດທະປາລະມີ ສິລິຈອມແຈ້ງ ໄດ້ຈັດຂຶ້ນວັນທີ 9 ພຶດສະພາ 2022 ທີ່ຈຸດຊົມວິວຂອງເມືອງປາກແບງແຂວງອຸດົມໄຊ ໂດຍການເຂົ້າຮ່ວມຂອງທ່ານ ຄຳດີ ວົງລ້ອມ ຮອງເລຂາພັກແຂວງ, ປະທານສະພາປະຊາຊົນແຂວງ, ທ່ານ ຄໍາສະພອນ ໄຊຍະວົງ ເຈົ້າເມືອງປາກແບງ, ທ່ານ ນາງ ຄໍາຈັນ ພົມແສງສະຫວັນ ຮອງປະທານສູນກາງແນວລາວສ້າງຊາດ, ຫົວຫນ້າຄະນະທີ່ປຶກສາສາສະໜາ, ພຣະອາຈານໃຫຍ່ມະຫາເວດ ມະເສໄນ ຮອງປະທານສູນກາງອົງການພຸດທະສາສະໜາສຳພັນລາວ, ມີບັນດາການນໍາແຂວງ, ເມືອງ, ພະສົງ, ສໍາມະເນນ ຕະຫລອດຮອດເຈົ້າພາບ, ເຈົ້າສັດທາ, ປະຊາຊົນຊາວເມືອງປາກແບງ ແລະ ເມືອງອ້ອມຂ້າງເຂົ້າຮ່ວມ.
ໃນພິທີທ່ານ ຄໍາສະພອນ ໄຊຍະວົງ ເຈົ້າເມືອງປາກແບງ ໄດ້ລາຍງານວ່າ: ທາງການນໍາເມືອງປາກແບງ ໄດ້ມີການປຶກສາຫາລື ແລະ ຫ້າງຫາກະກຽມທີ່ຈະສ້າງພະເຈົ້າໃຫຍ່ ພຸດທະປາລະມີ ສິລິຈອມແຈ້ງ ໂດຍໄດ້ກຳນົດຮູບແບບ, ລັກສະນະ, ຂະຫນາດ ແລະ ສະຖານທີ່ແລ້ວນໍາສະເໜີໄປຍັງການນໍາແຂວງ ແລະ ພາກສ່ວນກ່ຽວຂ້ອງ ເພື່ອອະນຸມັດໃນການກໍ່ສ້າງ, ຈຸດປະສົງກໍ່ເພື່ອເປັນບ່ອນສັກກະລະບູຊາກາບໄຫວ້ ຂອງປະຊາຊົນບັນດາເຜົ່າ ທີ່ມີຈິດໃຈເຫລື້ອມໃສ່ຕໍ່ພຸດທະສາສະໜາ ທັງກຳນົດເປັນສະຖານທີ່ທ່ອງທ່ຽວທີ່ສຳຄັນຂອງເມືອງປາກແບງໃນການດຶງດູດນັກທ່ອງທ່ຽວທັງພາຍໃນ ແລະ ຕ່າງປະ ເທດໂດຍແນ່ໃສ່ເຮັດໃຫ້ເມືອງປາກແບງ, ກາຍເປັນເມືອງທ່ອງທ່ຽວ ຕາມທິດທາງແຜນການລວມຂອງແຂວງ, ສຳລັບພະພຸດທະຮູບ ພຸດທະປາລະມີ ສິລິຈອມແຈ້ງ ທີ່ຈະສ້າງຂຶ້ນໃນຄັ້ງນີ້ມີຖານທັງຫມົດ 25 ຄູນ 28,9 ແມັດ, ມີລວງສູງທັງຫມົດ 15,999 ແມັດ ໂດຍຈະໃຊ້ງົບປະມານໃນການກໍ່ສ້າງທັງຫມົດປະມານ 2 ຕື້ກວ່າກີບ ແລະ ຄາດວ່າຈະໃຫ້ສ້າງສຳເລັດພາຍໃນໄລຍະເວລາ 3 ປີ.
ພິທີວາງສີລາລືກໃນການກໍ່ສ້າງຄັ້ງນີ້ ແມ່ນໄດ້ດຳເນີນໄປຕາມ ພິທີທາງສາສະຫນາເປັນຕົ້ນແມ່ນ ໄຕ້ທູບທຽນບູຊາພຣະຣັດຕະນະໄຕ, ໄຫວ້ພຣະຮັບສິນ, ສູດໄຊຍັນໂຕ, ຖວາຍກອງທານ, ວັດທຸທານຕ່າງໆ, ຮັບພອນ, ຢາດນໍ້າ, ການນຳສູນກາງ, ແຂວງ ແລະ ເມືອງ ພ້ອມກັນຕອກໄມ້ມຸງຄຸນ, ວາງດິນຈີ່ເງິນ, ດິນຈີ່ຄຳ ແລະ ວາງແຜ່ນສີລາລືກຢ່າງເປັນທາງການ, ໂອກາດອັນສະຫງ່າລາສີທ່ານ ຄຳດີ ວົງລ້ອມ ຮອງເລຂາພັກແຂວງ, ໄດ້ໂອ້ລົມຕໍ່ພິທີ, ທ່ານໄດ້ຮຽກຮ້ອງໃຫ້ການນຳເມືອງ, ຄະນະຮັບຜິດຊອບໂຄງການກໍ່ສ້າງພະເຈົ້າໃຫ່ຍ ຈົ່ງພ້ອມກັນບຸກບືນ, ສາມັກຄີກັນ, ເຮັດແນວໃດເພື່ອເຮັດໃຫ້ໂຄງການດັ່ງກ່າວນີ້ຈົ່ງບັນລຸ ຜົນສຳເລັດຕາມຈຸດປະສົງທີ່ວາງໄວ້, ບັນດານັກທຸລະກິດ, ພໍ່ຄ້າຊາວຂາຍ, ຜູ້ປະກອບການທຸກພາກສ່ວນທັງພາຍໃນ ແລະ ຕ່າງປະເທດ ຈົ່ງຊ່ວຍເຫຼືອອຸປະຖຳຮ່ວມກິນຮ່ວມທານທາງດ້ານວັດຖຸ, ເງິນທອງ ແລະ ອື່ນໆຕາມຄວາມສາມາດຕົວຈິ່ງຂອງບຸກຄົນ, ນິຕິບຸກຄົນ ຢ່າງສົມເຫດສົມຜົນ, ພໍ່ແມ່ປະຊາຊົນບັນດາເຜົ່າພາຍໃນເມືອງປາກແບງ ພ້ອມຈິດພ້ອມໃຈສາມັກຄີກັນມີສ່ວນຮ່ວມ ເພື່ອສ້າງຂະບວນການຕ່າງໆເຮັດໃຫ້ວຽກງານການສ້າງພະເຈົ້າໃຫ່ຍໃນຄັ້ງນີ້ເດີນແມ່ນແລ່ນສະດວກແຕ່ຕົ້ນຕະຫຼອດປາຍ ແລະ ທ່ານໄດ້ລັ່ນຄ້ອງ 9 ບາດເພື່ອເປັນເລີກງານຢາມດີຂອງໂຄງການກໍ່ສ້າງພະພຸດທະຮູບໃນຄັ້ງນີ້.
ພາວ-ຂ່າວ: ແສງພອນ ອິນນະລົງ.