ວັນທີ 29 ກໍລະກົດ ຫາ ວັນທີ 2 ສິງຫາ 2024 ທີ່ສະໂມສອນເມືອງຜົ້ງສາລີ, ເມືອງຍອດອູ ແລະ ເມືອງບູນເໜືອ ແຂວງຜົ້ງສາລີ ທ່ານ ທອງສີ ເສົາສຸລິພົມ ຮອງເລຂາພັກແຂວງ, ປະທານສະພາປະຊາຊົນແຂວງ, ປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 2, ພ້ອມດ້ວຍທີມງານ ລົງເຄື່ອນໄຫວພົບປະຜູ້ມີສິດເລືອກຕັ້ງ ແລະ ຕິດຕາມກວດກາ ການຈັດຕັ້ງປະຕິບັດວຽກງານການເປັນເສນາທິການ ຂອງຄະນະສະມາຊິກສະພາປະຊາຊົນແຂວງ ປະຈໍາເມືອງ ໃຫ້ແກ່ຄະນະປະຈໍາສະພາປະຊາຊົນແຂວງ, ພ້ອມທັງຈັດຕັ້ງຜັນຂະຫຍາຍ ແລະ ໂຄສະນາເຜີຍແຜ່ເນື້ອໃນຜົນສໍາເລັດກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ແລະ ຂອງສະພາປະຊາຊົນຂັ້ນແຂວງ ຊຸດທີ II, ມີບັນດາທ່ານ ເລຂາພັກເມືອງ, ຮອງເລຂາພັກເມືອງ, ຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າ, ຮອງຫົວໜ້າຫ້ອງການເມືອງ, ອາດິດສະມາຊິກສະພາແຫ່ງຊາດ, ອາດິດສະມາຊິກສະພາປະຊາຊົນແຂວງ, ພະນັກງານບໍານານ, ອົງການທຽບເທົ່າຫ້ອງການຂັ້ນເມືອງ, ກອງບັນຊາການ ປກຊ-ປກສ ເມືອງ, ອົງການແນວລາວສ້າງຊາດ, ສະຫາພັນນັກຮົບເກົ່າ, ອົງການຈັດຕັ້ງມະຫາຊົນຂັ້ນເມືອງ ແລະ ອົງການຈັດຕັ້ງບ້ານ, ພ້ອມດ້ວຍພໍ່ແມ່ປະຊາຊົນ(ບ້ານ ພູຟ້າ, ບ້ານຈອມເມືອງ ທີ່ຂຶ້ນກັບເມືອງຜົ້ງສາລີ); (ບ້ານກາດ,ບ້ານລຸ່ມທີ່ຂຶ້ນກັບເມືອງຍອດອູ); (ບ້ານໂພນໂຮມ,ບ້ານໂພນໄຊ ທີ່ຂຶ້ນກັບເມືອງບຸນເໜືອ) ເຂົ້າຮ່ວມຮັບຟັງທັງໝົດ 587 ທ່ານ, ຍິງ 239 ທ່ານ.

ທັງນີ້ກໍເພື່ອເປັນການຈັດຕັ້ງປະຕິບັດຕາມພະລະບົດບາດ, ສິດ ແລະ ໜ້າທີ່ ຂອງສະມາຊິກສະແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ ຕາມທີ່ກົດໝາຍໄດ້ກໍານົດໄວ້, ໂດຍສະເພາະແມ່ນ ຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດໜ້າທີ່ວຽກງານ ຂອງຄະນະສະມາຊິກສະພາປະຊາຊົນແຂວງ ປະຈໍາເມືອງ ໃນການເປັນເສນາທິການໃຫ້ແກ່ຄະນະປະຈໍາສະພາປະຊາຊົນແຂວງ, ການຈັດຕັ້ງປະຕິບັດແຜນການເຄື່ອນໄຫວວຽກງານ ຂອງໜ່ວຍງານເສນາທິການຊ່ວຍວຽກຄະນະສະມາຊິກສະພາປະຊາຊົນແຂວງ ປະຈໍາເມືອງ ແລະ ຈັດຕັ້ງຜັນຂະຫຍາຍມະຕິ ວ່າດ້ວຍການພົບປະຜູ້ມີສິດເລືອກຕັ້ງ, ມະຕິ ກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ເພື່ອຮັບຟັງຄຳຄິດເຫັນ ແລະ ເກັບກໍາສະພາບການການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ແລະ ບັນຫາຕ່າງໆ ຂອງປະຊາຊົນບັນດາເຜົ່າ ແນໃສ່ເຮັດໃຫ້ບັນຫາພື້ນຖານຂອງຊາດ ກໍຄືຂອງທ້ອງຖິ່ນ ທີ່ສະພາແຫ່ງຊາດ ແລະ ສະພາປະຊາຊົນແຂວງຮັບຮອງເອົາ ໄດ້ຮັບການຈັດຕັ້ງຜັນຂະຫຍາຍເຂົ້າໃນວຽກງານຕົວຈິງ;

ທີ່ກອງປະຊຸມໄດ້ຮັບຟັງ ທ່ານ ເລຂາພັກເມືອງ-ເຈົ້າເມືອງຜົ້ງສາລີ, ເມືອງຍອດອູ ແລະ ເມືອງບຸນເໜືອ ຂຶ້ນການລາຍງານ ການຈັດຕັ້ງປະຕິບັດວຽກງານຮອບດ້ານ ປະຈໍາ 6 ເດືອນຕົ້ນປີ ແລະ ທິດທາງແຜນການປະຈໍາ 6 ເດືອນທ້າຍປີ 2024 ຂອງອົງການປົກຄອງເມືອງ, ຮັບຟັງ ທ່ານ ຫົວໜ້າຄະນະສະມາຊິກສະພາປະຊາຊົນແຂວງ ປະຈໍາເມືອງ ຂຶ້ນລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາ 6 ເດືອນຕົ້ນປີ ແລະ ແຜນການເຄື່ອນໄຫວວຽກງານປະຈໍາ 6 ເດືອນທ້າຍປີ 2024 ຂອງຄະນະສະມາຊິກສະພາປະຊາຊົນແຂວງ ປະຈໍາເມືອງ ແລະ ຮັບຟັງ ທ່ານ ຮອງຫົວໜ້າຫ້ອງວ່າການເມືອງ (ຜູ້ຊີ້ນໍາໜ່ວຍງານຊ່ວຍວຽກຄະນະສະມາຊິກສະພາປະຊາຊົນຂັ້ນແຂວງ ປະຈໍາເມືອງ) ຂຶ້ນລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາ 6 ເດືອນຕົ້ນປີ ແລະ ແຜນການເຄື່ອນໄຫວວຽກງານປະຈໍາ 6 ເດືອນທ້າຍປີ 2024 ຂອງໜ່ວຍງານເສນາທິການຊ່ວຍວຽກຄະນະສະມາຊິກສະພາປະຊາຊົນຂັ້ນແຂວງ ປະຈໍາເມືອງ;  ພ້ອມກັນນັ້ນ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ແລະ ສະມາຊິກສະພາປະຊາຊົນແຂວງ ກໍ່ໄດ້ພັດປ່ຽນກັນຂຶ້ນເຜີຍແຜ່ເນື້ອໃນມະຕິ ວ່າດ້ວຍການພົບປະຜູ້ມີສິດເລືອກຕັ້ງ, ມະຕິ ວ່າດ້ວຍການຮັບ ແລະ ພິຈາລະນາຄໍາຮ້ອງຂໍຄວາມເປັນທໍາ ແລະ ເນື້ອໃນມະຕິ ກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ມີ  20ສະບັບ. ໃນນີ້, ວຽກງານຂົງເຂດລັດຖະບານ ຈໍານວນ 04 ສະບັບ, ວຽກງານອົງການກວດສອບແຫ່ງລັດ ຈໍານວນ 01 ສະບັບ, ວຽກງານສະພາແຫ່ງຊາດ ຈໍານວນ 01 ສະບັບ, ວຽກງານສ້າງ ແລະ ປັບປຸງກົດໝາຍ ຈໍານວນ 13 ສະບັບ (ສ້າງໃໝ່ 02 ສະບັບ ແລະ ປັບປຸງ 11 ສະບັບ, ວຽກງານບຸກຄະລາກອນຈໍານວນ 01 ສະບັບ ແລະ ຂອງສະພາປະຊາຊົນແຂວງ ຊຸດທີ II ມີ 4 ສະບັບ. ໃນນີ້, ວຽກງານຂົງເຂດອົງການປົກຄອງແຂວງ ຈໍານວນ 03 ສະບັບ, ວຽກງານສະພາປະຊາຊົນແຂວງ ຈໍານວນ 01 ສະບັບ. ຈາກນັ້ນ, ຜູ້ເຂົ້າຮ່ວມກອງປະຊຸມ ກໍໄດ້ພັດປ່ຽນກັນປະກອບຄໍາຄິດຄໍາເຫັນ ຢ່າງກົງໄປກົງມາລັກສະນະສ້າງສັນ;

ຕອນທ້າຍຂອງກອງປະຊຸມ ທ່ານ ທອງສີ ເສົາສຸລິພົມ ຍັງໄດ້ເໜັ້ນໜັກບາງບັນຫາ ຕໍ່ກອງປະຊຸມ ໃຫ້ເອົາໃຈໃສ່ເປັນຕົ້ນແມ່ນ: ສະເໜີໃຫ້ອົງການປົກຄອງເມືອງ ແລະ ບັນດາທ່ານສະມາຊິກສະພາປະຊາຊົນແຂວງ ປະຈໍາເມືອງ ເອົາໃຈໃສ່ຍົກສູງປະສິດຕິພາບຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ, ກຳແໜ້ນແນວທາງນະໂຍບາຍຂອງພັກ, ລະບຽບກົດໝາຍຂອງລັດ ກໍ່ຄືທິດທາງໜ້າທີ່ກອງປະຊຸມໃຫຍ່ຄັ້ງທີ XI ຂອງອົງຄະນະພັກແຂວງ ກໍ່ຄືມະຕິກອງປະຊຸມໃຫຍ່ ຂອງອົງຄະນະພັກເມືອງວາງອອກໃຫ້ເລິກເຊິ່ງ, ເອົາໃຈໃສ່ຈັດຕັ້ງປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານ ຕິດພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການສະກັດກັ້ນ ແລະ ແກ້ໄຂບັນຫາຢາເສບຕິດ, ການແກ້ໄຂ 9 ໜໍ່ແໜ່ງ ທີ່ກໍ່ໃຫ້ເກີດປະກົດການຫຍໍ້ທໍ້ໃນສັງຄົມ ໃຫ້ແທດເຖິງຕົວຈິງ ແລະ ເຂັ້ມງວດກ່ວາເກົ່າ; ສືບຕໍ່ສຸມໃສ່ຈັດຕັ້ງປະຕິບັດ 2 ວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ຕາມ 5 ວຽກຕົ້ນຕໍ ແລະ ການສະກັດກັ້ນ ແລະ ແກ້ໄຂບັນຫາຢາເສບຕິດ ຕາມ 5 ວຽກຕົ້ນຕໍ ຢ່າງແຂງແຮງ ແລະ ແທດເຖິງ ຕາມແຜນການ, ໂຄງການ ທີ່ໄດ້ກໍານົດໄວ້; ສຸມໃສ່ການປະຕິບັດຄາດໝາຍດ້ານສະຫັດສະຫວັດ ເພື່ອການພັດທະນາ ແລະ ການພັດທະນາແບບຍືນຍົງ (SDGs) ໃນຂົງເຂດສັງຄົມ ໃຫ້ບັນລຸເພີ່ມຂຶ້ນ; ສຸມໃສ່ຈັດຕັ້ງປະຕິບັດ ໂຄງການຜະລິດເປັນສິນຄ້າເພື່ອສົ່ງອອກ ທີ່ມີຕະຫຼາດຮອງຮັບມາແລ້ວ; ສຶກຕໍ່ ສຸມໃສ່ສ້າງຂະບວນການຮອບດ້ານ ຕິດພັນກັບການຈັດຕັ້ງປະຕິບັດເນື້ອໃນແຂ່ງຂັນຮັກຊາດ ແລະ ພັດທະນາຂອງແຕ່ລະພາກສ່ວນ ໃຫ້ເຂົ້າສູ່ຕົວຈິງ ແລະ ປະກົດຜົນເປັນຈີງ ຕິດພັນກັບການກະກຽມດໍາເນີນ ກອງປະຊຸມໃຫ່ຍ 3 ຂັ້ນຂອງພັກ ໃຫ້ມີເນື້ອໃນເລິກເຊິ່ງ ແລະ ມີບັນຍາກາດຝົດຟື້ນ; ສືບຕໍ່ ນໍາພາ – ຊີ້ນໍາໃນການກໍ່ສ້າງພະນັກງານກັບທີ່, ການຫັນພະນັກງານລົງທ້ອງຖິ່ນຮາກຖານຕາມທິດ 3 ສ້າງ ຕິດພັນກັບການກໍ່ສ້າງຮາກຖານການເມືອງ ແລະ ການພັດທະນາຊົນນະບົດຮອບດ້ານ; ຄະນະພັກ ແລະ ອົງການປົກຄອງທຸກຂັ້ນຕ້ອງ ເອົາໃຈໃສ່ສຶກສາອົບຮົມປະຊາຊົນບັນດາເຜົ່າ ຮັບຮູ້ ເຂົ້າໃຈຕໍ່ຄວາມພະຍາຍາມຂອງພັກ, ລັດຖະບານ, ສະພາແຫ່ງຊາດ, ສະພາປະຊາຊົນແຂວງ ທີ່ໄດ້ອອກເຫື່ອເທແຮງຂຸດຄົ້ນທຸກຄວາມສາມາດບົ່ມຊ້ອນຂອງປະເທດ, ທັງຍາດແຍ່ງ ການພົວພັນຮ່ວມມືກັບຕ່າງປະເທດໃນການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ຢ່າງມີຈຸດສຸມ ແລະ ມີຄວາມຮັບຜິດຊອບສູງ.

ການເຄື່ອນໄຫວລົງພົບປະຜູ້ມີສິດເລືອກຕັ້ງ ແລະ ຕິດຕາມກວດກາ ການຈັດຕັ້ງປະຕິບັດວຽກງານການເປັນເສນາທິການ ຂອງຄະນະສະມາຊິກສະພາປະຊາຊົນແຂວງ ປະຈໍາເມືອງ ໃຫ້ແກ່ຄະນະປະຈໍາສະພາປະຊາຊົນແຂວງ ຄັ້ງນີ້ ໄດ້ຮັບການສະໜັບສະໜູນໂດຍ ໂຄງການສ້າງຄວາມເຂັ້ມແຂງໃຫ້ແກ່ ຂອງສະພາແຫ່ງຊາດ ແລະ ສະພາປະຊາຊົນແຂວງ (STEPS).

ພາບ-ຂາວ: ຈອມແສງ ສີວົງສາ