ວັນທີ 30 ສິງຫາ 2024 ທີ່ຜ່ານມາ ທ່ານ ສາຍທອງ ໄຊຍະວົງ ຮອງເລຂາພັກແຂວງ ປະທານຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງທີ15 ທັງເປັນປະທານສະພາປະ ຊາຊົນແຂວງ, ພ້ອມດ້ວຍທ່ານ ວັນນະສັກ ຊາດຕະກຸນ ເຈົ້າເມືອງໆມຸນລະປາໂມກ ແລະ ທ່ານ ນາງ ສົມຫັວງ ມຸນສິງໂຄດຮອງເລຂາພັກເມືອງ ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງມຸນລະປາໂມກ ລົງພົບປະຢ້ຽມຢາມ ພະນັກງານຫຼັກແຫຼ່ງ,ພະນັກ ງານລັດຖະກອນ,ເພື່ອເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຈຳປາສັກ ຊຸດທີ II ພ້ອມທັງເກັບກຳສະພາບຫາງສຽງສັງຄົມໃນທົ່ວເມືອງ ເພື່ອນຳໄປຊຸກຍູ້ໃຫ້ຂະ ແໜງການທີ່ກ່ຽວກ້ອງນຳໄປຈັດຕັ້ງແກ້ໄຂ,ການລົງຢ້ຽມຢາມຈັດຂື້ນຢູ່ທີ່ສະໂມສອນຂອງເມືອງ ໂດຍໃຫ້ກຽດຕ້ອນຮັບຂອງທ່ານ ສີສະຫັວດ ພົມມະລິວັນ ຮອງເຈົ້າເມືອງໆມຸນລະປາໂມກ,ທ່ານ ຮອງເລຂາພັກເມືອງ,ຄະນະປະຈຳພັກເມືອງ,ກຳ ມະການພັກເມືອງ,ຫົວໜ້າ-ຄະນະຫ້ອງການ,ພະ ນັກງານກໍ່ສ້າງຮາກຖານແຂວງປະຈຳເມືອງ ພ້ອມດ້ວຍ ພະນັກງານລັດຖະກອນເຂົ້່າຮ່ວມຕ້ອນຮັບຢ່າງອົບອຸ່ນ.
ໃນພິທີ ທ່ານ ສີສະຫັວດ ພົມມະລິວັນ ຮອງເຈົ້າເມືອງ ກໍ່ລາຍງານໂດຍສັງເຂບກ່ຽວກັບການຈັດຕັ້ງປະຕິບັດ ແຜນພັດທະນາເສດຖະກິດ-ສັງ ຄົມຂອງເມືອງໃນໄລຍະຜ່ານມາ ໂດຍຍົກໃຫ້ເຫັນອັນພົ້ນເດັ່ນ ແລະ ຂໍ້ຄົງຄ້າງ,ໃນໂອກາດດັ່ງກ່າວນີ້ທ່ານ ສາຍທອງ ໄຊຍະວົງ ຮອງເລຂາພັກແຂວງ ປະທານຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງທີ15 ທັງເປັນປະທານສະພາປະຊາຊົນແຂວງແຂວງຈຳປາສັກ ພ້ອມຄະນະ ກໍ່ໄດ້ພົບປະໂອ້ລົມໂດຍນໍາເອົາເນື້ອໃນສຳຄັນຕ່າງໆ ທີ່ໄດ້ຮັບຮອງໃນກອງປະຊຸມສະໄໝສາມັນເທື່ອທີ 7 ຂອງສະ ພາແຫ່ງຊາດ ຊຸດທີ IX ແລະ ສະພາປະຊາຊົນແຂວງຈໍາປາສັກ ຊຸດທີ II, ຕິດພັນກັບແນວທາງນະໂຍບາຍຂອງພັກ,ລະບຽບກົດໝາຍຂອງລັດ ເຜີຍແຜ່,ເຊື່ອມຊຶມ ໃຫ້ພະນັກງານຫຼັກແຫຼ່ງ,ພະ ນັກງານລັດຖະກອນ ຮັບຮູ້ເຂົ້າໃຈຢ່າງເລີກເຊີ່ງ ແລະ ພ້ອມກັນນຳເອົາເນື້ອໃນຈິດໃຈໄປຜັນຂະ ຫຍາຍຈັດຕັ້ງປະຕິບັດຕາມມະຕິ,ຄຳສັ່ງຂອງຂັ້ນເທີງ.
ຈາກນັ້ນ ຄະນະນຳຂອງເມືອງ ກໍ່ໄດ້ໃຊ້ສິດປະ ຊາທິປະໄຕຂອງຕົນ ປະກອບຄໍາ ຄິດເຫັນ,ຄໍາສະເໜີ ຍົກໃຫ້ເຫັນຫຼາຍບັນຫາສໍາຄັນ ທີ່ເປັນບັນຫາອັນຈຳເປັນ ຕິດພັນກັບຊີວິດການເປັນຢູ່ ແລະ ການພັດທະນາເສດຖະກິດ-ສັງຄົມ ຂອງເມືອງ,ຕໍ່ກັບຄໍາສະເໜີ ທ່ານ ສາຍທອງ ໄຊຍະວົງປະທານສະພາປະຊາຊົນແຂວງ ກໍ່ໄດ້ອະທິບາຍຊີ້ແຈງຕໍ່ບາງຄໍາສະເໜີ ໃຫ້ຄະນະນຳຂອງເມືອງພ້ອມດ້ວຍບັນດາທ່ານທັງໝົດເຂົ້າຮ່ວມ,ຮັບຮູ້ເຂົ້າໃຈ ແລະ ຮັບເອົາຄໍາສະເໜີທີ່ເປັນບັນຫາໃຫ່ຍຕິດພັນກັບການຈັດຕັ້ງປະຕິບັດວຽກງານຂອງຂະແໜງການຕ່າງໆ ເຊິ່ງກອງເລຂາໄດ້ບັນທຶກຂໍ້ມູນຢ່າງລະອຽດ ເພື່ອນໍາໄປຄົ້ນຄົ້ວພິຈາລະນາໃນຄະນະປະຈໍາສະພາປະຊາຊົນແຂວງ ຈໍາປາສັກ,ຊຸກຍູ້ໃຫ້ພາກສ່ວນກ່ຽວຂ້ອງຈັດຕັ້ງປະຕິບັດແກ້ໄຂ.
ການລົງເຄື່ອນໄຫວຂອງບັນດາທ່ານໃນຄັ້ງນີ້ແມ່ນໄດ້ເຄື່ອນໄຫວແຕ່ວັນທີ 28 – 30 ສິງຫາ 2024 ຢູ່ໃນ 5 ຈຸດຂອງເຂດເລືອກຕັ້ງເມືອງມຸນລະປາໂມກຄື: ຈຸດບ້ານ ຫ້ວຍຍາງ,ບ້ານ ສະພັງເໜືອ ກຸ່ມສະພັງ,ບ້ານ ທ່ານ້ອງ,ບ້ານ ດອນເປືອຍ ແລະ ສະໂມສອນເມືອງ ກຸ່ມເວີນແຄນ ຈິ່ງສຳເລັດ.