ໃນລະຫວ່າງວັນທີ 5-7 ຕຸລາ 2023 ທ່ານ ບຸນມີ ພິມມະສອນ ຮອງເລຂາພັກແຂວງ ປະທານສະພາປະຊາຊົນແຂວງຄໍາມ່ວນ, ທ່ານ ບົວພັນ ແສງຈັນ ກຳມະການພັກແຂວງ ຮອງປະທານສະພາປະຊາຊົນແຂວງຄໍາມ່ວນ ພ້ອມດ້ວຍຄະນະ ໄດ້ເຄື່ອນໄຫວຕິດຕາມກວດກາ, ການຈັດຕັ້ງປະຕິບັດ ລັດຖະທຳມະນູນ, ກົດໝາຍ ໃນຂົງເຂດ ຍຸຕິທຳ ແລະ ປກຊ-ປກສ, ຢູ່ 5 ເມືອງຄື: ເມືອງມະຫາໄຊ, ເມືອງຍົມມະລາດ, ເມືອງນາກາຍ, ເມືອງຄູນຄໍາ ແລະ ເມືອງຫີນບູນ  ໂດຍໃຫ້ກຽດຕ້ອນຮັບ ແລະ ເຂົ້າຮ່ວມເຮັດວຽກຂອງທ່ານ ເຈົ້າເມືອງ ພ້ອມດ້ວຍບັນດາທ່ານ ຄະນະປະຈໍາພັກເມືອງ, ຄະນະສະມາຊິກສະພາປະຊາຊົນຂັ້ນແຂວງປະຈໍາເຂດເລືອກຕັ້ງເມືອງ, ອົງການກວດກາພັກ-ລັດເມືອງ, ຄະນະກອງບັນຊາການ ປກຊ-ປກສ ເມືອງ, ສານປະຊາຊົນເຂດ, ໄອຍະການປະຊາຊົນເຂດ, ໄອຍະການປະຊາຊົນປະຈໍາເມືອງ, ຫ້ອງການຍຸຕິທຳເມືອງ, ຫົວໜ້າ-ຮອງຫົວໜ້າຫ້ອງການທີ່ກ່ຽວຂ້ອງເຂົ້າຮ່ວມ.

ຈຸດປະສົງ ໃນການເຄື່ອນໄຫວວຽກງານ ຄັ້ງນີ້: ເນື້ອແທ້ກໍແມ່ນກວດກາ-ຕີລາຄາຄືນໃນການຈັດຕັ້ງປະຕິບັດພາລະບົດບາດ ຂອງ ສະພາປະຊາຊົນແຂວງຄໍາມ່ວນ ໃນການເຄື່ອນໄຫວ, ຕິດຕາມກວດກາ, ຊຸກຍູ້ການຈັດຕັ້ງປະຕິບັດລັດຖະທຳມະນູນ ແລະ ກົດໝາຍ ກໍ່ຄື:ຄໍາຮ້ອງ-ຄໍາສະເໜີ, ຂໍຄວາມເປັນທຳ ຂອງນາຍ ແລະ ພົນທະຫານ, ນາຍ ແລະ ພົນຕໍາຫຼວດ ຕະຫລອດຮອດ ປະຊາຊົນບັນດາເຜົ່າຊາວແຂວງຄໍາມ່ວນ, ພ້ອມກັນນັ້ນ, ແມ່ນການຕິດຕາມກວດກາຈັດຕັ້ງປະຕິບັດບັນດາມະຕິ ກອງປະຊຸມສະໄໝສາມັນເທື່ອທີ 4-5 ຂອງສະພາປະຊາຊົນແຂວງຄໍາມ່ວນ ຊຸດທີ II, ເພື່ອບັນລຸເປົ້າໝາຍໃນການຈັດຕັ້ງປະຕິບັດໜ້າທີວຽກງານ ມີຄວາມໂປ່ງໃສ, ເປັນທຳ ແລະ ຖືກຕ້ອງຕາມກົດໝາຍ, ເພື່ອເຮັດໃຫ້ວຽກງານຕິດຕາມກວດກາ ແລະ ແກ້ໄຂຄໍາຮ້ອງທຸກຂອງປະຊາຊົນ ໃຫ້ມີປະສິດທິພາບຍິ່ງຂຶ້ນ.

ໃນວາລະການຕິດຕາມກວດກາໄດ້ຮັບຟັງການລາຍງານ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ການຈັດຕັ້ງປະຕິບັດວຽກງານຂອງ ປກຊ-ປກສ ເມືອງ, ໄອຍະການປະຊາຊົນ, ຫ້ອງການຍຸຕິທຳເມືອງ, ອົງການກວດກາພັກ-ລັດເມືອງ, ໂດຍສະເພາະແມ່ນການຈັດຕັ້ງປະຕິບັດວະລາແຫ່ງຊາດ, ການແກ້ໄຂຄະດີ, ການຄຸ້ມຄອງຄົນຕ່າງປະເທດທີ່ມາເຄື່ອນໄຫວຢູ່ເມືອງ, ວຽກງານຫ້ອງການຍຸຕິທຳ ໃນການຈັດຕັ້ງປະຕິບັດຄໍາຕັດສິນຂອງສານ ແລະ ວຽກງານການແກ້ໄຂຄໍາຮ້ອງ-ຄໍາສະເໜີ, ວຽກງານຕ້ານ ແລະ ສະກັ້ນການສໍ້ລາດບັງຫຼວງ. ພາຍຫຼັງຮັບຟັງການລາຍງານຂອງບັນດາຫ້ອງການ ແລະ ຂະແໜງການທີ່ກ່ຽວຂ້ອງ, ປະທານ ກອງປະຊຸມໄດ້ມີຄໍາເຫັນຊີ້ນຳ ແລະ ສະເໜີໃຫ້ຄະນະກຳມະການສະພາປະຊາຊົນແຂວງ ເຈາະຈີ້ມວຽກງານຕາມພາລະບົດບາດຂອງຕົນ, ຈາກນັ້ນ, ແຂກຜູ້ເຂົ້າຮ່ວມກອງປະຊຸມກໍໄດ້ມີການແລກປ່ຽນຄໍາຄິດ-ຄໍາເຫັນ ຢ່າງກົງໄປກົງມາ ໃນການຈັດຕັ້ງປະຕິບັດວຽກງານຕົວຈິງໃນໄລຍະຜ່ານມາ ຍົກໃຫ້ເຫັນ ດ້ານດີ ແລະ ຂໍ້ຄົງຄ້າງ ເພື່ອຄົ້ນຄວ້າແກ້ໄຂວຽກງານດັ່ງກ່າວໃນຕໍ່ໜ້າໃຫ້ມີປະສິດພາບ ແລະ ປະສິດທິຜົນຂຶ້ນເປັນກ້າວໆ.

ໃນໂອກາດເຄື່ອນໄຫວຢ້ຽມຢາມ ແລະ ເຮັດວຽກຢູ່ບັນດາເມືອງຄັ້ງນີ້, ທ່ານ ບຸນມີ ພິມມະສອນ ປະທານສະພາປະຊາຊົນແຂວງຄໍາມ່ວນ ໄດ້ມີຄໍາເຫັນໂອ້ລົມ ແລະ ໃຫ້ທິດຊີ້ນຳ ເຊິ່ງກ່ອນອຶ່ນ ທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານໃນການຈັດຕັ້ງປະຕິບັດວຽກງານໄລຍະຜ່ານມາ ແລະ ຕີລາຄາສູງຕໍ່ຜົນງານທີ່ຄະນະນຳຂອງເມືອງ ແລະ ຂະແໜງການຍາດມາໄດ້, ພ້ອມດຽວກັນນັ້ນ, ທ່ານໄດ້ເນັ້ນຫລາຍບັນຫາເປັນຕົ້ນ: ໃຫ້ເອົາໃຈໃສ່ໂຄສະນາປຸກລະດົມ, ເສີມຂະຫຍາຍບັນດາແນວທາງນະໂຍບາຍຂອງພັກ ແລະ ແຜນພັດທະນາເສດຖະກິດ-ສັງຄົມ, ຫັນເອົານະໂຍບາຍ ແລະ ແຜນດັ່ງກ່າວເປັນໂຄງການອັນລະອຽດທີ່ແທດເໝາະກັບສະພາບຕົວຈິງ ແລະ ທ່າແຮງບົ່ນຊ້ອມຂອງເມືອງ; ພ້ອມນັ້ນ ຕ້ອງຖືເອົາການຫັນລົງກໍ່ສ້າງຮາກຖານ ຢູ່ຂັ້ນບ້ານ, ເອົາໃຈໃສ່ວຽກງານການສຶກສາອົບຮົມການເມືອງ-ແນວຄິດໃຫ້ຖັນແຖວພະນັກງານຫຼັກແຫຼ່ງ, ສະມາຊິກພັກໃຫ້ກຳແໜ້ນ ແລະ ເຊື່ອມຊຶມແນວທາງຂອງພັກຢ່າງເລິກເຊິ່ງ, ເອົາໃຈໃສ່ວຽກງານປ້ອງກັນຊາດ-ປ້ອງກັນຄວາມສະຫງົບ, ແກ້ໄຂປະກົດການຫຍໍ້ທໍ້ໃນສັງຄົມ ເປັນຕົ້ນ: ການແກ້ໄຂບັນຫາຢາເສບຕິດ, ສະກັດກັ້ນການຄ້າຂາຍເຖື່ອນ ແລະ ບັນຫາອຶ່ນໆໃຫ້ໝົດໄປ; ຄຽງຄູ່ກັນນັ້ນຈົ່ງເຊີດຊູຄວາມຮັບຜິດຊອບໃນໜ້າທີ່ການເມືອງຂອງຕົນ, ເຕົ້າໂຮມຄວາມສາມັກຄີເປັນປຶກແຜນ, ຕັ້ງໜ້າຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງເມືອງໃຫ້ບັນລຸຕາມຄາດໝາຍ, ເອົາໃຈໃສ່ຈັດຕັ້ງປະຕິບັດວຽກງານໃນຂົງເຂດ ຍຸຕິທຳ ແລະ ປກຊ-ປກສ ໃຫ້ນັບມື້ດີຂຶ້ນເທື່ອລະກ້າວ, ຕິດພັນກັບການໂຄສະນາເຜີຍແຜ່ບັນດາກົດໝາຍ ແລະ ນິຕິກຳໃຕ້ກົດໝາຍ, ໃຫ້ທົ່ວສັງຄົມໄດ້ຮັບຮູ້ຢ່າງທົ່ວເຖິງ, ຮັບປະກັນກ້າວໄປສູ່ການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ.

ໂດຍ: ເອື້ອ ມະໂນສິງ