ໃນຕອນຄໍ່າຂອງວັນທີ 7 ສິງຫາ 2023 ທ່ານ ບຸນມີ ພິມມະສອນ ຮອງເລຂາພັກແຂວງ ປະທານສະພາປະຊາຊົນແຂວງຄໍາມ່ວນ ພ້ອມດ້ວຍບັນດາການນຳຂັ້ນສູງຂອງແຂວງ ໄດ້ສືບຕໍ່ເຄື່ອນໄຫວຕິດຕາມສະພາບນໍ້າຖ້ວມຢູ່ເມືອງຄູນຄໍາ ເປັນກຽດເຂົ້າຮ່ວມເຮັດວຽກ ແລະລາຍງານຄັ້ງນີ້ໂດຍ ທ່ານ ແກ້ວວິໄລ ໄຊຍະບຸດ ເຈົ້າເມືອງຄູນຄໍາ, ພ້ອມດ້ວຍ ຄະນະສະມາຊິກສະພາປະຊາຊົນຂັ້ນແຂວງປະຈໍາເຂດເມືອງຄູນຄໍາ , ມີຄະນະກໍາມະການຄຸ້ມຄອງໄພພິບັດຂັ້ນສູນກາງ, ຂັ້ນທ້ອງຖິ່ນ ແລະ ການຈັດຕັ້ງທຸກພາກສ່ວນທີ່ກ່ຽວຂ້ອງເຂົ້າຮ່ວມ.

ເຊິ່ງໃນປະຈຸບັນນີ້ໃນ 10 ຕົວເມືອງທົ່ວແຂວງຄໍາມ່ວນ ຜ່ານການປະເມີນເບື້ອງຕົ້ນ: ທີ່ໄດ້ຮັບຜົນກະທົບຈາກໄພນໍ້າຖ້ວມປະກອບມີ 3 ເມືອງຄື: ເມືອງຄູນຄໍາ, ເມືອງນາກາຍ ແລະ ເມືອງຫີນບູນ, ໂດຍໜຶ່ງໃນ 3 ເມືອງດັ່ງກ່າວແມ່ນເມືອງທີ່ຖືກຜົນກະທົບໜັກແມ່ນເມືອງຄູນຄໍາ ຍ້ອນເກີດມີຝົນຕົກໜັກຕິດຕໍ່ກັນຫຼາຍວັນ ເປັນເຫດເຮັດໃຫ້ມີ 2 ເຫດການຄື: ເຫດການທີ່ໜຶ່ງແມ່ນເກີດມີໄພນໍ້າຖ້ວມຢ່າງໜັກ ເຮັດໃຫ້ພໍ່ແມ່ ປະຊາຊົນໄດ້ຮັບຜົນກະທົບຈໍານວນ 14 ບ້ານ.ໃນນັ້ນບ້ານທີ່ຖືກຜົນກະທົບຮ້າຍແຮງມີ 9 ບ້ານ, ມີ 2 ພັນກວ່າຄອບຄົວ ແລະ ປະຊາຊົນຈຳນວນ 12 ພັນກວ່າຄົນ ໄດ້ຮັບຜົນກະທົບ. ຕໍ່ກັບເຫດການດັ່ງກ່າວ ຄະນະການນໍາຂອງແຂວງ, ເມືອງ ກໍ່ໄດ້ລົງຕິດຕາມ, ຊຸກຍູ້ ແລະ ຊີ້ນໍາ ກ່ຽວກັບການແກ້ໄຂໄພພິບັດ ເປັນຕົ້ນແມ່ນການກອບກູ້ ແລະ ຍົກຍ້າຍປະຊາຊົນທີ່ຖືກຜົນກະທົບອອກມາຢູ່ເຂດທີ່ປອດໄພ ແລະ ຍັງປະຊາຊົນອີກຈຳນວນໜຶ່ງທີ່ຍັງມີຄວາມເປັນຫ່ວງຕໍ່ຊັບສິນຂອງເຂົາເຈົ້າ ກໍ່ຍັງອາໄສຢູ່ຕາມເຮືອນທີ່ມີຄວາມສູງ ທີ່ນໍ້າຍັງບໍ່ຂຶ້ນເຖິງ. ສຳລັບສັດລ້ຽງຈຳນວນໜຶ່ງກໍ່ໄດ້ຍົກຍ້າຍໄປຢູ່ບ່ອນທີ່ສູງ ແລະ ຈຳນວນທີ່ລົ້ມຕາຍກໍ່ມີຢ່າງຫຼວງຫຼາຍ, ສ່ວນວ່າປະຊາຊົນທີ່ໄດ້ຮັບຜົນກະທົບ ທາງການຈັດຕັ້ງກໍ່ໄດ້ເອົາໃຈໃສ່ ແກ້ໄຂບັນເທົາທຸກໃນເບື້ອງຕົ້ນ ໂດຍສະເພາະແມ່ນໄດ້ລະດົມ ແລະ ນຳເອົາ ເຂົ້າສານອາຫານແຫ້ງ ແລະ ນໍ້າດື່ມ ລວມເຖິງເຄື່ອງນຸ່ງຫົ່ມໄປມອບໃຫ້ແກ່ເຂົາເຈົ້າ, ສ່ວນເຫດການທີສອງ ແມ່ນເຫດການດິນເຈື່ອນຖັບຖົມທາງ ຢູ່ເສັ້ນທາງເລກທີ 8A (ໃນກິໂລແມັດທີ 46-65) ຢູ່ລະຫວ່າງເຂດແດນຂອງເມືອງຄູນຄໍາ ແຂວງຄໍາມ່ວນ ແລະ ເມືອງຄໍາເກີດ ແຂວງບໍລິຄໍາໄຊ ເຊິ່ງເຮັດໃຫ້ມີພາຫະນະທີ່ຕົກຄ້າງ ໃນປະຈຸບັນແມ່ນໄດ້ມີການກອບກູ້ເອົາຈຳນວນຜູ້ຕົກຄ້າງອອກມາໄດ້ຢ່າງປອດໄພ. ຕໍ່ກັບສະພາບການດັ່ງກ່າວແມ່ນໄດ້ສົ່ງຜົນກະທົບຢ່າງໃຫຍ່ຫຼວງຕໍ່ກັບຊີວິດ ແລະ ຊັບສິນຂອງພໍ່ແມ່ປະຊາຊົນ ແລະ ປະຊາຊົນຈຳນວນດັ່ງກ່າວກໍ່ໄດ້ຮັບການຊ່ວຍເຫຼືອແກ້ໄຂບັນເທົາທຸກດ້ວຍການປະກອບສ່ວນຂອງສັງຄົມທັງພາຍໃນແຂວງ ແລະ ຕ່າງແຂວງ ແລະ ໃນໂອກາດນີ້ກໍ່ຮຽກຮ້ອງມາຍັງພໍ່ແມ່ປະຊາຊົນຊາວແຂວງຄຳມ່ວນ ຈົ່ງໄດ້ເອົາໃຈໃສ່ຕິດຕາມເຝົ້າລະວັງກ່ຽວກັບສະພາບການນໍ້າຖ້ວມທີ່ອາດຈະເກີດຂຶ້ນໃນຕໍ່ໜ້ານີ້ ເນື່ອງຈາກວ່າສະພາບຝົນແມ່ນຍັງສືບຕໍ່ຕົກຢ່າງຕໍ່ເນື່ອງ, ນໍ້າໃນແມ່ນໍ້າຕ່າງໆກໍ່ເພີ່ມລະດັບສູງຂຶ້ນເລື້ອຍໆ ໃນບາງແມ່ນໍ້າຢູ່ບັນດາເມືອງຕ່າງໆກໍ່ໄດ້ຂຶ້ນກາຍເຂດເຕືອນໄພ ແລະ ກາຍເຂດອັນຕະລາຍ ໃຫ້ປະຊາຊົນຢູ່ໃນເຂດທີ່ມີຄວາມສ່ຽງຈົ່ງໄດ້ຕິດຕາມເຜົ້າລະວັງ ແລະ ໃຫ້ອຳນາດການປົກຄອງເມືອງ ຕິດຕາມຢ່າງໃກ້ຊິດ ເພື່ອແຈ້ງເຕືອນຕໍ່ປະຊາຊົນກະະກຽມພ້ອມຮັບມື ພ້ອມນີ້ກໍ່ຮຽກຮ້ອງມາຍັງທຸກພາກສ່ວນໃນສັງຄົມຈົ່ງໄດ້ໃຫ້ການຊ່ວຍເຫຼືອທາງດ້ານວັດຖຸ ແລະ ຈິດໃຈ ປະກອບສ່ວນແກ້ໄຂບັນຫາອຸທົກກະໄພໃນຄັ້ງນີ້ ເພື່ອຫຼີກລ້ຽງການເສຍຊີວິດຂອງປະຊາຊົນ ແລະ ຫຼຸດຜ່ອນຕໍ່ຜົນການເສຍທາງດ້ານຊັບສິນຂອງປະຊາຊົນໃຫ້ໜ້ອຍທີ່ສຸດ.