ໃນຕອນບ່າຍຂອງວັນທີ 4 ສິງຫາ 2023 ທ່ານ ບຸນມີ ພິມມະສອນ ປະທານສະພາປະຊາຊົນແຂວງຄໍາມ່ວນ ພ້ອມດ້ວຍ ຄະນະສະມາຊິກສະພາປະຊາຊົນຂັ້ນແຂວງ ແລະ ພະນັກງານສະພາປະຊາຊົນແຂວງຄໍາມ່ວນ ໄດ້ລົງຕິດຕາມສະພາບນໍ້າຖ້ວມຢູ່ເຂດບໍ່ໂພນຕີ້ວເມືອງຫີນບູນ ໂດຍໃນການລົງຕິດຕາມຄັ້ງນີ້ຄະນະການນໍາຂອງເມືອງກໍໄດ້ຮ່ວມຕ້ອນຮັບ ແລະ ນໍາພາລົງເບິ່ງຈຸດສໍາຄັນທີ່ຖືກນໍ້າຖ້ວມໃນຄັ້ງນີ້.

ໃນໂອກາດນີ້, ຄະນະນໍາຂອງເມືອງ ກໍ່ໄດ້ລາຍງານສະພາບລວມເບື້ອງຕົ້ນ ເຊິ່ງໃຫ້ຮູ້ວ່າ: ຕາມຂໍ້ມູນຂອງຄະນະກຳມະການຄຸ້ມຄອງໄພພິບັດ ເມືອງຫີນບູນ ແຂວງຄຳມ່ວນໃນວັນທີ 4 ສິງຫາ 2023 ໃຫ້ຮູ້ວ່າ: ເມືອງຫີນບູນ ກໍ່ເປັນເມືອງໜຶ່ງຢູ່ໃນແຂວງຄຳມ່ວນ ທີ່ໄດ້ຮັບຜົນກະທົບຈາກໄພພິບັດ (ນໍ້າຖ້ວມ) ສົ່ງຜົນເຮັດໃຫ້ເນື້ອທີ່ທຳການຜະລິດ ແລະ ເຮືອນຊານບ້ານຊ່ອງຂອງປະຊາຊົນໄດ້ຮັບຜົນເສຍຫາຍ ໃນນັ້ນ ຈຸດທີ່ຖືກຖ້ວມຫຼາຍກວ່າໝູ່ ແມ່ນເຂດບໍ່ໂພນຕິ້ວ ໂດຍສະເພາະຈຳນວນບ້ານທີ່ຕັ້ງຢູ່ລຽບແຄມຫ້ວຍນໍ້າປະແທນ ເຊິ່ງເຂດດັ່ງກ່າວແມ່ນມີຈຳນວນ 186 ຫຼັງຄາເຮືອນ ໃນ 4 ບ້ານ ທີ່ໄດ້ຮັບຜົນກະທົບ ປະກອບມີ ບ້ານນາຄຳ 135 ຫຼັງຄາເຮືອນ, ບ້ານ ມ່ວງໄຂ່ 20 ຫຼັງຄາເຮືອນ, ບ້ານນ້ອຍ 17 ຫຼັງຄາເຮືອນ ແລະ ບ້ານບົງ 14 ຫຼັງຄາເຮືອນ. ນອກຈາກເຮືອນຊານບ້ານຊ່ອງທີ່ຖືກຖ້ວມແລ້ວ ເສັ້ນທາງ ກໍ່ຖືກຕັດຂາດ ບໍ່ສາມາດສັນຈອນໄປ-ມາລະຫວ່າງບ້ານຕໍ່ບ້ານໄດ້ ລວມເຖິງລະບົບໄຟຟ້າ ແລະ ໂທລະຄົມມະນາຄົມກໍ່ຖືກຕັດຂາດ.

ນອກນີ້ເຂດທີ່ມີຄວາມສ່ຽງສູງທີ່ອາດຈະຖືກນໍ້າຖ້ວມ  ຄືເຂດນໍ້າຫີນບູນຕອນລຸ່ມ ໂດຍສະເພາະຈຸດຂົວນໍ້າຫີນບູນ (ບ້ານຄຳແກ້ວ) ເຊິ່ງລະດັບນໍ້າຫີນບູນໄດ້ຂຶ້ນກາຍເຂດອັນຕະລາຍ ຢູ່ໃນລະດັບ 11,88 ແມັດ (ເຂດອັນຕະລາຍແມ່ນ 10,00 ແມັດ) ດັ່ງນັ້ນ ຈຶ່ງຂໍແຈ້ງເຕືອນມາຍັງພໍ່ແມ່ປະຊາຊົນ ແລະ ທຸກພາກສ່ວນ ໃຫ້ເພີ່ມທະວີການກະກຽມຄວາມພ້ອມຮັບມື ແລະ ກະກຽມຍົກຍ້າຍປະຊາຊົນ, ວັດຖຸສິ່ງຂອງທີ່ມີຄ່າ, ສັດລ້ຽງ, ຜົນຜະລິດກະສິກຳ ແລະ ອື່ນໆ ໄປໄວ້ບ່ອນທີ່ປອດໄພ ເພື່ອຫຼຸດຜ່ອນຄວາມສ່ຽງ ແລະ ການສູນເສຍຕໍ່ຊີວິດ ແລະ ຊັບສິນຂອງປະຊາຊົນ. ຈາກນັ້ນ, ທ່ານ ປະທານສະພາປະຊາຊົນແຂວງຄໍາມ່ວນ ກໍ່ໄດ້ສະແດງຄວາມເປັນຫ່ວງເປັນໃຍ ພ້ອມທັງໃຫ້ທິດຊີ້ນໍາວ່າ: ສໍາລັບຈຸດທີ່ຖືກນ້ຳຖ້ວມໜັກ ແລະບໍ່ສາມາດສັນຈອນໄປມາໄດ້ ແມ່ນໃຫ້ຄະນະຄວບຄຸມໄພພິບັດຂັ້ນເມືອງ ກໍ່ຄືການນໍາຂອງເມືອງຈົ່ງຕິດຕາມເຝົ້າລະວັງ ແລະກ້ຽມພ້ອມຕະຫຼອດເວລາ, ໂຄສະນາປຸກລະດົມພໍ່ແມ່ປະຊາຊົນໃຫ້ພາກັນອົບພະຍົບໄປຢູ່ໃນເຂດທີ່ປອດໄພ, ກະກຽມເຮືອໄວ້ໃນແຕ່ລະຈຸດທີ່ປະຊາຊົນຕ້ອງໄດ້ເຄື່ອນຍ້າຍ ຫຼືເດີນທາງ ທັງນີ້ກໍ່ເພື່ອອໍານວຍຄວາມສະດວກໃຫ້ປະຊາຊົນ.

ໂດຍ: ເອື້ອ ມະໂນສິງ.