ໃນລະຫວ່າງວັນທີ 5-8 ກຸມພາ 2024 ປະທານຄະນະສະມາຊິສະພາແຫ່ງຊາດປະຈໍາເຂດເລືອກຕັ້ງທີ 11 ແຂວງບໍລິຄໍາໄຊ  ແລະ ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງທ່າພະບາດ, ການນໍາຂອງເມືອງ ແລະ ວິຊາການຊ່ວຍວຽກຈໍານວນໜຶ່ງ ໄດ້ລົງພົບປະ ປະຊາຊົນ ແລະ ເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ  IX ແລະ ຂອງສະພາປະຊາຊົນແຂວງຊຸດທີ II ໃຫ້ປະຊາຊົນໄດ້ຮັບຮູ້ບັນດາເນື້ອໃນສໍາຄັນຕ່າງໆ ທີ່່ລັດຖະບານສະເໜີຕໍ່ກອງປະຊຸມສະພາ ແລະ ທັງເປັນການຢ້ຽມຢາມ-ຖາມຂ່າວຟັງຄໍາຄິດເຫັນ, ຄໍາສະເໜີຂອງພໍ່ແມ່ປະຊາຊົນຢູ່ 6 ບ້ານຄື: ບ້ານ ໂພນສະຫວັນ, ບ້ານນາຄໍາ, ບ້ານດອນຄອນລາດ, ບ້ານຫາດໄຄ້, ບ້ານ ຍາງເຄືອ, ບ້ານ ສາຍພາຍ, ບ້ານ ນາແຄນ, ບ້ານ ພະບາດໂພນສັນ (ຄຸ້ມນາເຂົ້າພະ), ບ້ານໂພນງາມ, ເມືອງທ່າພະບາດ ໂດຍການໃຫ້ກຽດນໍາພາໂດຍ ທ່ານ ປອ ສຸວັນນີ ໄຊຊະນະ, ປະທານສະພາປະຊາຊົນແຂວງ, ປະທານຄະນະສະມາຊິສະພາແຫ່ງຊາດປະຈໍາເຂດເລືອກຕັ້ງທີ 11  ພ້ອມດ້ວຍສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງທ່າພະບາດ, ພະນັກງານກໍ່ສ້າງຮາກຖານ ຫ້ອງການທີ່ກ່ຽວຂ້ອງ ຕະຫຼອດຮອດພໍ່ແມ່ປະຊາຊົນເຂົ້າຮ່ວມຮັບຟັງ.

ການລົງເຄື່ອນໄຫວເຜີຍແຜ່ໃນຄັ້ງນີ້ ໄດ້ຮັບຟັງການລາຍງານໂດຍຫຍໍ້ກ່ຽວກັບສະພາບຈຸດພິເສດທີ່ຕັ້ງຂອງບ້ານ, ການຊີ້ນໍາ-ນຳພາຂອງອົງການປົກຄອງບ້ານ ແລະ ການພັດທະນາເສດຖະກິດ-ສັງຄົມຂອງບ້ານໃນໄລຍະຜ່ານມາ, ພ້ອມຄຳສະເໜີຫຼາຍບັນຫາເປັນຕົ້ນແມ່ນ: ບັນຫາທີ່ດິນ, ບັນຫາເສັ້ນທາງເປ່ເພ ແລະ ອື່ນໆ ຕໍ່ຄະນະ ສສຊ ແລະ ສສຂ ເພື່ອຂໍທິດຊີ້ນໍາ ແລະ ຊຸກຍູ້ພາກສ່ວນທີ່ກ່ຽວຂ້ອງແກ້ໄຂຊ່ວຍຕາມຄວາມເໝາະສົມ ຈາກທ່ານ ນາຍບ້ານແຕ່ລະບ້ານ; ຈາກນັ້ນ, ສສຊ ແລະ ສສຂ ກໍໄດ້ຜັດປ່ຽນກັນເຜີຍແຜ່ຜົນສໍາເລັດຂອງກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ IX ແລະ ສະພາປະຊາຊົນແຂວງ ຊຸດທີ II ໂດຍໄດ້ຍົກໃຫ້ເຫັນບັນຫາສໍາຄັນຕ່າງໆທີ່ໄດ້ຄົ້ນຄວ້າ, ພິຈາລະນາ ແລະ ຮັບຮອງເອົາໃນກອງປະຊຸມ ແລະ ບັນດາເນື້ອໃນຕ່າງໆທີ່  ສສຊ ແລະ ສສຂ ໄດ້ສະເໜີຕໍ່ກອງປະຊຸມ ໂດຍສະເພາະບັນດາປະກົດການຫຍໍ້ທໍ້ຕ່າງໆທີ່ເກີດຂຶ້ນໃນສັງຄົມ ກໍຄືແຂວງບໍລິຄໍາໄຊ, ພ້ອມກັນນັ້ນ ໄດ້ຮັບຟັງຄຳສະເໜີຈາກພໍ່ແມ່ປະຊາຊົນ ແລະ ໄດ້ຮັບເອົາຄໍາຄິດ-ຄໍາເຫັນ ຄໍາສະເໜີຂັດຂ້ອງໝອງໃຈຂອງປະຊາຊົນ ເພື່ອນໍາໄປຄົ້ນຄວ້າ ພິຈາລະນາ ແລະ ສະເໜີຕໍ່ອົງການປົກຄອງແຂວງ-ເມືອງ ເພື່ອແກ້ໄຂ ແລະ ອະທິບາຍ-ຊີ້ແຈງ ໃຫ້ປະຊາຊົນຮັບຊາບ.

ຂ່າວ-ພາບ: ໂສລະຢ໋າ