(ສພຊ) ທ່ານ ຮສ. ປອ. ລິນຄໍາ ດວງສະຫວັນ ປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດ ລ້ອມ ທັງເປັນປະທານຄະນະມິດຕະພາບລັດຖະສະພາ ສປປລາວ-ສ.ເກົາຫຼີ ໄດ້ພົບປະກັບທ່ານ ຊໍ ຊາມຊອກ (Seo Samseog) ປະທານກໍາມາທິການພິເສດ ງົບປະມານ ແລະ ການບັນຊີ ຂອງສະພາແຫ່ງຊາດ ແຫ່ງ ສ.ເກົາຫຼີ ໃນວັນທີ 02 ມັງກອນ 2024 ທີ່ຫໍສະພາແຫ່ງຊາດ ໃນໂອກາດເດີນທາງມາຢ້ຽມຢາມ ແລະ ເຮັດວຽກທີ່ ສປປລາວ.

ໃນໂອກາດດັ່ງກ່າວ, ທ່ານ ຮສ. ປອ. ລິນຄໍາ ດວງສະຫວັນ ໄດ້ສະແດງຄວາມຕ້ອນຮັບຢ່າງອົບອຸ່ນ ພ້ອມທັງຕີລາຄາສູງໃນການພົບປະໃນຄັ້ງນີ້ ເຊິ່ງຈະເປັນໂອກາດດີທີ່ຈະໄດ້ປຶກສາຫາລື ແລະ ຊຸກຍູ້ເສີມຂະຫຍາຍສາຍພົວພັນ ແລະ ການຮ່ວມມືລະຫວ່າງສອງປະເທດ ລາວ ແລະ ສ.ເກົາຫຼີ ກໍຄືສອງອົງການນິຕິບັນຍັດ ທີ່ມີມູນເຊື້ອດີງາມມາແຕ່ດົນນານ ແລະ ໃຫ້ໄດ້ຮັບການພັດທະນາ ແລະ ຂະຫຍາຍຕົວຢ່າງຕໍ່ເນື່ອງ. ທ່ານປະທານກໍາມາທິການ ໄດ້ລາຍງານຫຍໍ້ໃຫ້ຊາບກ່ຽວກັບທີ່ຕັ້ງ ແລະ ພາລະບົດບາດຂອງກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ໂດຍເນັ້ນໃຫ້ເຫັນ 03 ພາລະບົດບາດຕົ້ນຕໍ ເປັນຕົ້ນ: ການສ້າງ, ປັບປຸງກົດໝາຍ ແລະ ນິຕິກຳໃຕ້ກົດໝາຍ; ການພິຈາລະນາບັນຫາສໍາຄັນ ຂອງປະເທດຊາດ; ການຕິດຕາມກວດກາການຈັດຕັ້ງປະຕິບັດລັດຖະທຳມະນູນ, ກົດໝາຍ ແລະ ມະຕິຂອງສະພາແຫ່ງຊາດ, ແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ໃນຂົງເຂດວຽກງານເສດຖະກິດ, ເຕັກໂນໂລຊີ ແລະ ສິ່ງແວດລ້ອມ. ກຳມາທິການ ເຮັດວຽກຮ່ວມກັບ 6 ກະຊວງຄື: ກະຊວງກະສິກຳ ແລະ ປ່າໄມ້, ກະຊວງອຸດສາຫະກຳ ແລະ ການຄ້າ, ກະຊວງໂຍທາທິການ ແລະ ຂົນສົ່ງ, ກະຊວງເຕັກໂນໂລຊີ ແລະ ການສື່ສານ, ກະຊວງພະລັງງານ ແລະ ບໍ່ແຮ່, ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ. ໃນນາມເປັນປະທານຄະນະມິດຕະພາບລັດຖະສະພາ ລາວ-ສ.ເກົາຫຼີ, ທ່ານໄດ້ລາຍງານໃຫ້ຊາບກ່ຽວກັບພາລະບົດບາດຂອງຄະນະມິດຕະພາບລັດຖະສະພາລະຫວ່າງ ສະພາແຫ່ງຊາດລາວ ແລະ ສະພາແຫ່ງຊາດ ສ.ເກົາຫຼີ ຂອງສະພາແຫ່ງຊາດລາວຊຸດທີ IX ແລະ ລົງເລິກບັນດາກິດຈະກຳ ທີ່ໄດ້ພົບປະແລກປ່ຽນເຊິ່ງກັນ ແລະກັນ ໃນໄລຍະຜ່ານມາ ເປັນຕົ້ນການພົບປະສອງຝ່າຍໃນໂອກາດເຂົ້າຮ່ວມກອງປະ ຊຸມສາກົນຕ່າງໆ, ການຢ້ຽມຢາມແລກປ່ຽນບົດຮຽນເຊິ່ງກັນ ແລະກັນ; ພ້ອມດຽວກັນນີ້ ທ່ານຍັງສະແດງຄວາມຂອບໃຈຕໍ່ລັດຖະບານ ແລະ ປະຊາຊົນ ສ.ເກົາຫຼີ ທີ່ໄດ້ໃຫ້ການຊ່ວຍເຫຼືອແກ່ ສປປລາວ ເປັນຕົ້ນການຊ່ວຍເຫຼືອເພື່ອການພັດ ທະນາ, ການຊ່ວຍເຫຼືອດ້ານມະນຸດສະທຳ, ການຊ່ວຍເຫຼືອທາງດ້ານການສຶກສາ ແລະ ອື່ນໆ ເຊິ່ງເປັນການປະກອບສ່ວນໃນການພັດທະນາເສດຖະກິດ-ສັງຄົມຂອງ ສປປລາວ ໃຫ້ຂະຫຍາຍຕົວເປັນກ້າວໆ.

 

ຈາກນັ້ນ, ທ່ານປະທານກໍາມາທິການພິເສດ ງົບປະມານ ແລະ ການບັນຊີ ຂອງສະພາແຫ່ງຊາດ ແຫ່ງ ສ.ເກົາຫຼີ ໄດ້ສະແດງຄວາມຂອບໃຈຕໍ່ປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ທັງເປັນປະທານຄະນະມິດຕະພາບລັດຖະສະພາ ສປປລາວ-ສ.ເກົາຫຼີ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ໃຫ້ຄຳໝັ້ນວ່າຈະສືບຕໍ່ຊຸກຍູ້, ສົ່ງເສີມສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງສອງປະເທດ ກໍຄືສອງອົງການນິຕິບັນຍັດ ທີ່ມີມາແລ້ວນັ້ນ ໃຫ້ສືບຕໍ່ໄດ້ຮັບການເສີມຂະຫຍາຍ ແລະ ເປັນຮູບປະທຳຍິ່ງໆຂຶ້ນ.

(ພາບ ແລະ ຂ່າວ: ນາງ ສຸພາວັນ ຫອມສະນິດ)