(ສພຊ) ໃນຕອນເຊົ້າຂອງວັນທີ 8 ກັນຍາ 2022 ທີ່ສະພາແຫ່ງຊາດ ທ່ານ ເກດແກ້ວ ສີຫາລາດ ຮອງປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ, ປະທານຄະນະມິດຕະພາບລັດຖະສະພາ ລາວ-ໂອເຊອານີ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ໂພລ ເຄລີ (Paul Kelly) ເອກອັກຄະລັດຖະທູດ ແຫ່ງ ອົດສະຕາລີ ປະຈໍາ ສປປລາວ ເພື່ອປຶກສາຫາລື ກ່ຽວກັບການຊຸກຍູ້ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສປປລາວ ແລະ ອົດສະຕາລີ ກໍຄືລະຫວ່າງ ສອງອົງການນິຕິບັນຍັດ ໃຫ້ໄດ້ຮັບການພັດທະນາ ແລະ ຂະຫຍາຍຕົວຍິ່ງໆຂຶ້ນ.

ໂອກາດດັ່ງກ່າວ ທ່ານ ເກດແກ້ວ ສີຫາລາດ ໄດ້ກ່າວສະແດງຄວາມຕ້ອນຮັນອັນອົບອຸ່ນຕໍ່ທ່ານ ໂພລ ເຄລີ ເອກອັກຄະລັດຖະທູດ ແຫ່ງ ອົດສະຕາລີ ປະຈໍາ ສປປລາວ ທີ່ໄດ້ເຂົ້າຢ້ຽມຂໍ່ານັບໃນຄັ້ງນີ້ ພ້ອມແຈ້ງໃຫ້ຮູ້ກ່ຽວກັບສະພາບການລວມຂອງ ສປປລາວ ໃນປັດຈຸບັນ; ແຈ້ງໃຫ້ຮູ້ກ່ຽວກັບການເຄື່ອນໄຫວຂອງສະພາແຫ່ງຊາດລາວ ເປັນຕົ້ນ ໄດ້ສຳເລັດການດຳເນີນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດລາວ ຊຸດທີ IX; ຕີລາຄາສູງຕໍ່ການພົວພັນຮ່ວມມື ລະຫວ່າງ ສອງປະເທດ ລາວ ແລະ ອົດສະຕາລີ ຕະຫຼອດໄລຍະ 70 ປີທີ່ຜ່ານມາ, ເຊິ່ງໄດ້ຮັບການພັດທະນາ ແລະ ຂະຫຍາຍຕົວເປັນກ້າວໆ, ເຫັນໄດ້ຈາກການແລກປ່ຽນການຢ້ຽມຢາມຢ່າງເປັນປົກກະຕິ ລະຫວ່າງ ການນຳຂັ້ນສູງ ແລະ ລະດັບຕ່າງໆ ຂອງສອງປະເທດ, ການຮ່ວມມືທາງດ້ານການເມືອງ, ການປ້ອງກັນຊາດ-ປ້ອງກັນຄວາມສະຫງົບ, ເສດຖະກິດ-ການຄ້າ, ການລົງທຶນ, ການສຶກສາ ແລະ ອື່ນໆ ໄດ້ມີການຂະຫຍາຍຕົວ. ໃນໄລຍະຜ່ານມາ ອົດສະຕາລີ ໄດ້ໃຫ້ການຊ່ວຍເຫຼືອລາວ ທາງດ້ານພັດທະນາຊັບພະຍາກອນມະນຸດຕະຫຼອດມາ ສະແດງຄວາມຊົມເຊີຍ ແລະ ຂອບໃຈ ຕໍ່ທ່ານທູດ ທີ່ໄດ້ເປັນຂົວຕໍ່ໃຫ້ແກ່ການພົວພັນຮ່ວມມື ລະຫວ່າງ ສອງປະເທດ ກໍຄືການຊ່ວຍເຫຼືອດ້ານຕ່າງໆ ໃຫ້ແກ່ລາວ ໃນໄລຍະຜ່ານມາ ໂດຍສະເພາະແມ່ນໃຫ້ການຊ່ວຍເຫຼືອເຫດການນ້ຳຖ້ວມຢູ່ແຂວງອັດຕະປື ແລະ ອົດສະຕາລີ ຍັງໄດ້ປະກາດໃຫ້ການຊ່ວຍເຫຼືອ ສປປລາວ ໃນການເຂົ້າເຖິງວັກຊີນປ້ອງກັນພະຍາດໂຄວິດ-19 ແລະ ຊ່ວຍເຫຼືອອຸປະກອນທາງການແພດ, ເປັນມູນຄ່າ 19,7 ລ້ານ ໂດລາອົດສະຕາລີ ແລະ ຕີລາຄາສູງຕໍ່ການພົວພັນຮ່ວມມື ລະຫວ່າງ ສະພາແຫ່ງຊາດລາວ ແລະ ລັດຖະສະພາອົດສະຕາລີ ທີ່ໄດ້ມີ ການພົວພັນ ແລະ ການຮ່ວມມືນຳກັນເປັນຢ່າງດີ ແລະ ຕໍ່ເນື່ອງໃນຫຼາຍລະດັບ ອັນໄດ້ປະກອບສ່ວນເຂົ້າໃນການເສີມສ້າງສາຍພົວພັນມິດຕະພາບ ແລະ ການຮ່ວມມືທີ່ມີມາແຕ່ດົນນານ ລະຫວ່າງ ສອງປະເທດ ແລະ ທັງປະກອບສ່ວນສົ່ງເສີມສັນຕິພາບ, ສະຖຽນລະພາບ ແລະ ການຮ່ວມມືເພື່ອການພັດທະນາຢູ່ໃນພາກພື້ນ ແລະ ສາກົນ. ສອງຝ່າຍໄດ້ມີການແລກປ່ຽນການຢ້ຽມຢາມ ເຊິ່ງກັນ ແລະ ກັນຢ່າງເປັນປົກກະຕິ ແລະ ມີຫຼາຍລະດັບ ເຊິ່ງມີທັງຄະນະຜູ້ແທນຂັ້ນສູງ ນຳໂດຍ ປະທານສະພາແຫ່ງຊາດ, ກຳມາທິການ ແລະ ພ້ອມທັງສະເໜີໃຫ້ມີການແລກປ່ຽນຄະນະຜູ້ແທນນຳກັນ ໃນລະດັບຕ່າງໆ ເປັນຕົ້ນຄະນະປະທານສະພາແຫ່ງຊາດ, ຄະນະປະທານກຳມາທິການ, ຄະນະມິດຕະພາບລັດຖະສະພາລາວ-ອົດສະຕາລີ ແລະ ຄະນະອື່ນໆ ຢ່າງເປັນປົກກະຕິ ແລະ ຕໍ່ເນື່ອງ; ການຮ່ວມມືທາງວິຊາການ, ໂດຍຮູບການຈັດສຳມະນາ, ເຝິກອົບຮົມ, ທັດສະນະສຶກສາ ແລະ ແລກປ່ຽນບົດຮຽນນຳກັນ ເພື່ອຍົກສູງຂີດຄວາມສາມາດ ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຂອງ ສປປລາວ ແລະ ສະເໜີໃຫ້ມີການສືບຕໍ່ແລກປ່ຽນຄຳເຫັນ ແລະ ສະໜັບສະໜູນ ເຊິ່ງກັນ ແລະ ກັນ ກ່ຽວກັບບັນຫາຕ່າງໆໃນເວທີລັດຖະສະພາພາກພື້ນ ແລະ ສາກົນ.

ທ່ານ ໂພລ ເຄລີ ກໍໄດ້ກ່າວສະແດງຄວາມຂອບໃຈຕໍ່ທ່ານ ເກດແກ້ວ ສີຫາລາດ ທີ່ໄດ້ເສຍສະຫລະເວລາອັນມີຄຸນຄ່າໃຫ້ການຕ້ອນຮັບໃນຄັ້ງນີ້ ພ້ອມທັງແຈ້ງຈຸດປະສົງຂອງການເຂົ້າຢ້ຽມຂໍ່ານັບ ແລະ ເຫັນດີຈະນໍາເອົາຂໍ້ສະເໜີຕ່າງໆ ທີ່ ສປປລາວ ສະເໜີ ນໍາໄປພິຈາລະນາ ແລະ ເປັນຂົວຕໍ່ປະສານງານຕໍ່ພາກສ່ວນກ່ຽວຂ້ອງ ເພື່ອຕອບສະໜອງຕາມຄວາມເໝາະສົມ.

(ພາບ ແລະ ຂ່າວ: ສອນສັກ ວັນວິໄຊ)