ໃນວັນທີ 4 ຕຸລາ 2024 ສະພາປະຊາຊົນແຂວງຫຼວງນໍ້າທາ ໄດ້ລົງຕິດຕາມກວດກາການຈັດຕັ້ງປະຕິບັດມະຕິກອງປະຊຸມສະໄໝສາມັນຂອງສະພາແຫ່ງຊາດ ຂົງເຂດຍຸຕິທຳ ແລະ ປກຊ-ປກສ ຢູ່ເມືອງສິງ ໂດຍການເປັນປະທານຂອງ ທ່ານ ກົງເພັດ ແກ້ວບົວພາ ກຳມະການພັກແຂວງ ຮອງປະທານສະພາປະຊາຊົນແຂວງ, ເຂົ້າຮ່ວມມີ ທ່ານ ຄຳຜາຍ ສຸລິຂັນ ຮອງເລຂາພັກເມືອງ ປະທານອົງການກວດກາພັກ-ລັກ-ເມືອງ, ຫົວໜ້າຄະນະສະມາຊິກສະພາປະຊາຊົນແຂວງປະຈຳເຂດເລືອກຕັ້ງເມືອງສິງ, ທ່ານ ຈັນທະສຸລິນ ໝັ້ນປະດິດ ຄະນະປະຈຳສະພາປະຊາຊົນແຂວງ ປະທານຄະນະກຳມະການຍຸຕິທຳ ແລະ ປກຊ-ປກສ, ເຂົ້າຮ່ວມມີ ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງສິງ, ປະທານສານເຂດ2, ຫົວໜ້າອົງການໄອຍະການເຂດ2, ຫ້ອງການຍຸຕິທຳ ປກຊ-ປກສ ແລະ ອົງການທີ່ກ່ຽວຂ້ອງຂັ້ນເມືອງເຂົ້າຮ່ວມທັງໝົດ 17 ທ່ານ.

ກອງປະຊຸມໄດ້ຮັບຟັງການລາຍງານຈາກຫ້ອງການທີ່ກ່ຽວຂ້ອງໃນການຈັດຕັ້ງປະຕິບັດຕາມມະຕິຂອງກອງປະຊຸມສະພາແຫ່ງຊາດໃນໄລຍະຜ່ານມາ ເຊິ່ງເຫັນວ່າພາກສ່ວນທີ່ກ່ຽວຂ້ອງໄດ້ເອົາໃຈໃສ່ໃນການຈັດຕັ້ງປະຕິບັດຕາມມະຕິດັ່ງກ່າວ ຈົນມີຜົນສຳເລັດຫລາຍດ້ານຕາມທີ່ໄດ້ກຳນົດ ໃນຕອນທ້າຍປະທານກອງປະຊຸມໄດ້ມີຄຳເຫັນເນັ້ນໜັ້ກໃຫ້ພາກສ່ວນທີ່ກ່ຽວຂ້ອງ, ເອົາໃຈໃສ່ຍົກສູງຄວາມຮັບຜິດຊອບຂອງຕົນຕື່ມອີກໃນການຈັດຕັ້ງປະຕິບັດຕາມພາລະບົດບາດຂອງຕົນໃຫ້ມີຜົນສຳເລັດ, ແກ້ໄຂດ້ານອ່ອນ, ຂໍ້ຄົງຄ້າງຂອງຕົນໃຫ້ສຳເລັດ.

ໃນໂອກາດທີ່ລົງເຄື່ອນໄຫວວຽກງານໃນຄັ້ງນີ້ ທ່ານ ກົງເພັດ ແກ້ວບົວພາ ພ້ອມດ້ວຍຄະນະ ໄດ້ນຳເອົາເຄື່ອງບັນເທົາທຸກຈຳນວນໜຶ່ງໄປມອບໃຫ້ປະຊາຊົນ ບ້ານຈອມ ເມືອງສິງ ທີ່ໄດ້ຮັບຜົນກະທົບຈາກໄພພິບັດຈາກນ້ຳຖ້ວມໃນໄລຍະຜ່ານມາ ເຄື່ອງປະກອບມີ ເຂົ້າສານ ຈຳນວນ 480 ກິໂລກຣາມ, ອາຫານແຫ້ງ 100 ຖົງ ແລະ ເສື້ອໂປໂລຈໍານວນ 100 ຜືນ ລວມມູນຄ່າທັງໝົດ 31,600,000 ກີບ.

ໂດຍ ມິກສະຫວັນ ແກ້ວບົວພາ