ຂ່າວຄະນະກມະການຍຸຕິທຳລົງເມືອງ

ວັນທີ 19-20 ພຶດສະພາ 2022 ນີ້ ທ່ານ ຈັນທະສຸລິນ ໝັ້ນປະດິດ ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 3 ແຂວງຫລວງນ້ຳທາ ປະທານຄະນະກຳມະການຍຸຕິທຳ ແລະ ປກຊ-ປກສ ພ້ອມດ້ວຍຄະນະ ໄດ້ລົງເຄື່ອນໄຫວຕິດຕາມກວດກາການຈັດຕັ້ງປະຕິບັດວຽກງານໃນຂົງເຂດຍຸຕິທຳ ແລະ ປກຊ-ປກສ ຢູ່ເມືອງສິງ ແລະ ເມືອງຫລວງນໍ້າທາ ໂດຍການເຂົ້າຮ່ວມຂອງຄະນະນຳຂອງເມືອງ, ຄະນະປະຈຳພັກເມືອງ, ມີບັນດາທ່ານສະມາຊິກສະພາປະຊາຊົນແຂວງປະຈຳເຂດເລືອກຕັ້ງເມືອງ, ຫົວຫນ້າຮອງຫົວຫນ້າຫ້ອງການຍຸຕິທຳ, ສານປະຊາຊົນເຂດ,ອົງກາຍໄອຍະການປະຊາຊົນ, ສອງກອງບັນຊາການປ້ອງກັນຊາດປ້ອງການຄວາມສະຫງົບເມືອງສິງ ແລະ ເມືອງຫລວງນໍ້າທາ ເຂົ້າຮ່ວມຢ່າງພ້ອມພຽງ

ໃນກອງປະຊຸມໄດ້ຮັບຟັງການລາຍງານການຈັດຕັ້ງປະຕິບັດວຽກງານໃນໄລຍະຜ່ານມາພ້ອມທັງ, ຂໍ້ສະດວກ, ຂໍ້ຫຍຸ້ງຍາກ ແລະ ຂໍ້ສະເໜີຂອງແຕ່ລະພາກສ່ວນພ້ອມນັ້ນຜູ້ເຂົ້າຮ່ວມກອງປະຊຸມໄດ້ພ້ອມກັນແລກປ່ຽນປະກອບຄຳເຫັນຢ່າງກົງໄປກົງມາຕໍ່ກັບການປະຕິບັດຫນ້າທີ່ໃນໄລຍະຜ່ານມາຂອງແຕ່ລະພາກສ່ວນທັງນີ້ກໍເພື່ອເຮັດໃຫ້ການຈັດຕັ້ງປະຕິບັດໜ້າທີວຽກງານສະດວກວ່ອງໄວ ແລະ ມີຄຸນນະພາບຂຶ້ນກວ່າເກົ່າ

ໃນຕອນທ້າຍທ່ານປະທານກອງປະຊຸມຍັງມີຄຳເຫັນໂອ້ລົມ ແລະ ເນັ້ນໜັກ ເຊິ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານການຈັດຕັ້ງປະຕິບັດວຽກງານໃນໄລຍະຜ່ານມາ ພ້ອມທັງເນັ້ນໜັກໃຫ້ອົງການທີ່ເຮັດວຽກງານຍຸຕິທຳຕ້ອງເພີ່ມທະວີຄວາມເປັນເອກະພາບ, ເຄົາລົບສິດ ແລະ ໜ້າທີ່ຕາມການແບ່ງງານ ພ້ອມທັງປະສານສົມທົບກັນຢ່າງແໜ້ນແຟ້ນ, ປຶກສາຫາລື, ມີຄວາມເປັນເອກະພາບກັນບົນພຶ້ນຖານກົດໝາຍ ແລະ ຮັບປະກັນການປະສານສົມທົບລະຫວ່າງອົງການທີ່ເຮັດວຽກຍຸຕິທໍາ ເພື່ອເຮັດໃຫ້ການດໍາເນີນຄະດີ, ການຕັດສິນຄະດີ, ການປະຕິບັດຄຳຕັດສິນຂອງສານ ຖືກຕ້ອງຕາມກົດໝາຍ ເປັນໄປການຂະບວນຍຸຕິທຳ.