ໃນວັນທີ 16 ພຶດສະພາ 2023 ນີ້. ທີ່ຫ້ອງປະຊຸມສະພາປະຊາຊົນແຂວງ ໄດ້ຈັດກອງປະຊຸມຕິດຕາມກວດກາ ການປະເມີນການຈັດຕັ້ງປະຕິບັດກົດໝາຍ 4 ສະບັບ ໃນຂົງເຂດຍຸຕິທໍາ. ໂດຍການເປັນປະທານຂອງທ່ານ ຄໍາແພງ ວິລະພັນ ປະທານກໍາມາທິການຍຸຕິທໍາ ສະພາແຫ່ງຊາດ, ມີທ່ານ ນາງ ມີນາພອນ ໄຊສົມພູ ປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 17, ປະທານສະພາປະຊາຊົນແຂວງ, ມີບັນດາທ່ານ ສະມາຊິກສະພາແຫ່ງຊາດປະຈໍາເຂດເລືອກຕັ້ງ, ຄະນະເລຂາທິການ, ຄະນະຈາກສະພາແຫ່ງຊາດ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ທັງນີ້, ເພື່ອສະຫຼຸບຕີລາຄາຄືນ ແລະ ປະເມີນຜົນການຈັດຕັ້ງປະຕິບັດກົດໝາຍ 4 ສະບັບໃນຂົງເຂດຍຸຕິທຳ ເຫັນໄດ້ດ້ານຜົນສໍາເລັດ, ດ້ານອ່ອນຂໍ້ຄົງຄ້າງ, ສາເຫດ, ບົດຮຽນທີ່ຖອດຖອນໄດ້, ວິທີທາງແກ້ໄຂ, ກອງປະຊຸມຈະໄດ້ຮັບຟັງ ການລາຍງານຂອງສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ກ່ຽວກັບຜົນການ ຕິດຕາມກວດກາ ການປະເມີນຜົນການຈັດຕັ້ງປະຕິບັດ ກົດໝາຍ 4 ສະບັບໃນຂົງເຂດເຂດຍຸຕິທໍາ, ຮັບຟັງການລາຍງານຈາກອົງການໄອຍະການປະຊາຊົນແຂວງ ແລະ ສານປະຊາຊົນແຂວງ ກ່ຽວກັບການປະເມີນຜົນການຈັດຕັ້ງປະຕິບັດກົດໝາຍວ່າດ້ວຍອົງການໄອຍະການປະຊາຊົນ, ກົດໝາຍວ່າດ້ວຍຄະດີອາຍາ, ກົດໝາຍວ່າດ້ວຍສານປະຊາຊົນ ແລະ ກົດໝາຍວ່າດ້ວຍການດໍາເນີນຄະດີແພ່ງ.
ພ້ອມກັນນີ້, ຜູ້ເຂົ້າຮ່ວມຈະໄດ້ພ້ອມກັນຄົ້ນຄວ້າ,ວິເຄາະ, ວິໄຈບັນຫາ ແລະ ແລກປ່ຽນຄວາມຄິດຄວາມເຫັນ ຕໍ່ບັນດາເນື້ອໃນຂອງກົດໝາຍຢ່າງເລິກເຊິ່ງ ດ້ວຍເຫັນຜົນ ແລະ ບົນພື້ນຖານຄວາມເປັນຈິງ ເພື່ອເຮັດໃຫ້ບັນດາເນື້ອໃນຕ່າງໆມີຄວາມຫຼາກຫຼາຍ, ອຸດົມສົມບຸນ ແລະ ສາມາດເປັນຂໍ້ມູນພື້ນຖານສໍາຄັນໃຫ້ແກ່ຄະນະທີ່ມາເຄື່ອນໄຫວຄັ້ງນີ້ ນໍາໄປລາຍງານຕໍ່ຄະນະປະຈໍາສະພາແຫ່ງຊາດ ກໍຄື ການນໍາໄປສູ້ການພິຈາລະນາຮັບຮອງເອົາ ເນື້ອໃນດັ່ງກ່າວໃນກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດຊຸດທີ IX ທີ່ຈະເປີດຂື້ນໃນມໍ້ນີ້.
(ວິນັດ)