ໃນລະຫວ່າງວັນທີ 16-17 ສິງຫາ 2024 ທ່ານ ນາງ ປິ່ງຄໍາ ລາຊະສິມມາ ກໍາມະການສູນກາງພັກ, ປະທານກໍາມາທິການເສດຖະກິດ ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ ພ້ອມດ້ວຍຄະນະ ໄດ້ລົງເຄື່ອນໄຫວຕິດຕາມກວດກາ ແລະ ປະເມີນຄືນ ຜົນການຈັດຕັ້ງປະຕິບັດການດໍາເນີນງານ ຂອງບັນດາໂຄງການລົງທຶນພັດທະນາເຂື່ອນໄຟຟ້າພະລັງງານນໍ້າ ພາຍໃນແຂວງຄໍາມ່ວນ, ເຂົ້າຮ່ວມຕິດຕາມກວດກາ ແລະ ເຮັດວຽກໂດຍມີ ທ່ານ ນາງ ສາທິດ ຈັນສີ ກຳມະການຄະນະປະຈໍາສະພາປະຊາຊົນຂັ້ນແຂວງ ປະທານຄະນະກຳມະການເສດຖະກິດ, ແຜນການ ແລະ ການເງິນ ສະພາປະຊາຊົນແຂວງຄໍາມ່ວນ ແລະ ພະແນກການທີ່ກ່ຽວຂ້ອງຂອງແຂວງເຂົ້າຮ່ວມ.

ຈຸດປະສົງໃນການເຄື່ອນໄຫວຄັ້ງນີ້: ເພື່ອຕິດຕາມກວດກາ ປະເມີນຄືນການຈັດຕັ້ງປະຕິບັດ ກົດໝາຍ, ນິຕິກໍາ ແລະ ລະບຽບການທີ່ກ່ຽວ ຂ້ອງ ທີ່ຕິດພັນກັບການພັດທະນາໂຄງການ; ຕິດຕາມກວດກາການຈັດຕັ້ງປະຕິບັດ ມາດຕະຖານເຕັກນິກການກໍ່ສ້າງເຂື່ອນ ຮັບປະກັນຄວາມປອດໄພຂອງປະຊາຊົນ ແລະ ສິ່ງແວດລ້ອມ ທີ່ຢູ່ອາໃສລຸ່ມເຂື່ອນ; ຕິດຕາມກວດກາບັນດາໂຄງການ ກ່ຽວກັບປະສິດທິພາບທາງດ້ານເສດຖະກິດ, ຜົນກະທົບຕໍ່ສິ່ງແວດລ້ອມ, ສັງຄົມ ແລະ ທໍາມະຊາດ ຕິດພັນກັບການຊົດເຊີຍ, ການຍົກຍ້າຍຈັດສັນປະຊາຊົນ ລວມໄປເຖິງການຟື້ນຟູຊີວິດການເປັນຢູ່ຂອງປະຊາຊົນຫຼັງຖືກຍົກຍ້າຍ; ເພື່ອຊອກໃຫ້ເຫັນດ້ານດີທີ່ຄວນເສີມຂະຫຍາຍ ແລະ ດ້ານອ່ອນ-ຂໍ້ຄົງຄ້າງ ທີ່ຈະຕ້ອງຊອກຫາວິທີການແກ້ໄຂ ໃນການຈັດຕັ້ງປະຕິບັດກົດໝາຍ, ນິຕິກໍາ ແລະ ລະບຽບການທີ່ກ່ຽວຂ້ອງ ທີ່ພົວພັນກັບວຽກງານໂຄງການ ເຂື່ອນໄຟຟ້າພະລັງງານນໍ້າ ທີ່ໄດ້ຮັບອະນຸມັດຈາກລັດຖະບານ ສປປ ລາວ; ເພື່ອເປັນຂໍ້ມູນພື້ນຖານ ແລະ ບ່ອນອີງໃນການສັງລວມລາຍງານ ຄະນະປະຈໍາສະພາແຫ່ງຊາດ ເພື່ອກະກຽມລາຍງານຕໍ່ກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX.