ເພື່ອເຮັດໃຫ້ການຕິດຕາມກວດກາ ວຽກງານປ້ອງກັນຊາດ-ປ້ອງກັນຄວາມສະຫງົບ ຕິດພັນກັບ ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ແລະ ບັນຫາຊາຍແດນລະຫວ່າງປະເທດ, ໃນຕອນເຊົ້າວັນທີ 25 ມີນາ 2024 ທີ່ຫ້ອງປະຊຸມສະພາປະຊາຊົນແຂວງ ສະຫວັນນະເຂດ ໄດ້ເປີດກອງປະຊຸມຂຶ້ນ ເພື່ອໃຫ້ພາກສ່ວນທີ່ກ່ຽວຂ້ອງລາຍງານວຽກງານຂົງເຂດ ປກຊ-ປກສ, ໂດຍການເປັນປະທານຮ່ວມ ຂອງທ່ານ ພົຕ ປອ ວົງສັກ ພັນທະວົງ ກໍາມະການຄະນະປະຈໍາສະພາແຫ່ງຊາດ, ປະທານກໍາມາທິການປ້ອງກັນຊາດ-ປ້ອງກັນຄວາມສະຫງົບ ສະພາແຫ່ງຊາດ ແລະ ທ່ານ ກົງແກ້ວ ມີວໍລະຈັກ ຮອງເລຂາພັກແຂວງ ປະທານສະພາປະຊາຊົນແຂວງ, ມີບັນດາທ່ານ ປະທານ, ຮອງປະທານ ຄະນະກໍາມະການຍຸຕິທໍາ ແລະ ປກຊ-ປກສ ສະພາປະຊາຊົນແຂວງ ບັນດາທ່ານຕາງໜ້າກອງບັນຊາການທະຫານແຂວງ, ກອງບັນຊາການ ປກສ ແຂວງ ແລະ ສະຫະພັນນັກຮົບເກົ່າ, ຫົວໜ້າ ແລະ ຮອງຫົວໜ້າຂະແໝງ ປກຊ-ປກສ, ພ້ອມດ້ວຍພະນັກງານຈາກສະພາແຫ່ງຊາດ ເຂົ້າຮ່ວມ.

ປະທານກອງປະຊຸມ ໄດ້ກ່າວຈຸດປະສົງໃນການຈັດກອງປະຊຸມໃນຄັ້ງນີ້, ພ້ອມທັງ ຮັບຟັງການລາຍງານການຈັດຕັ້ງປະຕິບັດການວຽກງານທີ່ຜ່ານມາຈາກ ຄະນະກໍາມະການຍຸຕິທໍາ ແລະ ປກຊ-ປກສ ສະພາປະຊາຊົນແຂວງ, ຮັບຟັງການລາຍງານຂອງກອງບັນຊາການທະຫານແຂວງ, ກອງບັນຊາການ ປກສ ແຂວງ ແລະ ສະຫະພັນນັກຮົບເກົ່າ ເຊິ່ງແຕ່ລະພາກສ່ວນຍົກໃຫ້ເຫັນເຖິງຜົນງານດ້ານດີ, ດ້ານອ່ອນ ແລະ ຂ້ຄົງຄ້າງ, ໃນນີ້ປະທານກອງປະຊຸມ ຍັງໄດ້ລົງເລິກເຈາະຈິ້ມບາງບັນຫາທີ່ກ່ຽວພັນກັບ ການຈັດຕັ້ງແກ້ໄຂບັນຫາຢາເສບຕິດ, ບັນຫາຊາຍແດນລະຫວ່າງປະເທດ, ບັນຫາປະກົດການຫຍໍ້ທໍ້ທີ່ເກີດຂຶ້ນຂອງສັງຄົມ ແລະ ວຽກງານການຄຸ້ມຄອງ, ແກ້ໄຂບັນຫາຕ່າງໆຢູ່ພາຍໃນແຂວງ

ທ້າຍສຸດປະທານກໍ່ໄດ້ສະຫຼຸບ ຍ້ອງຍໍຊົມເຊີຍຕໍ່ກັບຜົນງານຂອງສະພາປະຊາຊົນແຂວງ ແລະ ບັນດາພະແນກການກົມກອງທີ່ໄດ້ເອົາໃຈໃສ່ປະຕິບັດວຽກງານຂອງຕົນໄດ້ໃນໄລຍະຜ່ານມາ ສ່ວນບັນດາຂໍ້ມູນທີ່ທາງບັນດາພະແນກການ, ກົມກອງໄດ້ສະໝອງໃນຄັ້ງນີ້, ຈະໄດ້ນໍາໄປລາຍງານໃນກອງປະຊຸມຄະນະປະຈໍາສະພາແຫ່ງຊາດໃນຂັ້ນຕໍ່ໄປ.