(ສພຊ) – ຕອນບ່າຍວັນທີ 13 ສິງຫານີ້ ທີ່ສະພາແຫ່ງຊາດ, ທ່ານ ຄໍາແພງ ວິລະພັນ ຄະນະປະຈໍາສະພາແຫ່ງຊາດ, ປະທານກໍາມາທິການກົດໝາຍ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ນາງ ເມແກນ ໂຈນສ໌ (Megan Jones) ເອກອັກຄະລັດຖະທູດ ແຫ່ງ ອົດສະຕຣາລີ ປະຈໍາ ສປປລາວ.

ທ່ານ ຄໍາແພງ ວິລະພັນ ໄດ້ສະແດງຄວາມຍິນດີຕ້ອນຮັບທ່ານ ນາງ ເມແກນ ໂຈນສ໌ ເຊິ່ງເປັນໂອກາດດີເພື່ອປຶກສາຫາລືບັນຫາຕ່າງໆທີ່ມີຄວາມສົນໃຈນໍາກັນ ໂດຍສະເພາະໃນຂົງເຂດນິຕິບັນຍັດ ທັງເປັນການປະກອບ ສ່ວນເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສປປລາວ ກັບ ອົດສະຕຣາລີ ກໍຄືລະຫວ່າງສອງອົງການນິຕິບັນຍັດ ໃຫ້ໄດ້ຮັບການພັດທະນາ ແລະ ຂະຫຍາຍຕົວຍິ່ງໆຂຶ້ນ ພ້ອມທັງສະແດງຄວາມຊົມເຊີຍທີ່ໄດ້ຮັບການແຕ່ງຕັ້ງເປັນເອກອັກຄະລັດຖະທູດອົດສະຕຣາລີຄົນໃໝ່ ປະຈຳ ສປປລາວ. ຕີລາຄາສູງຕໍ່ການພົວພັນຮ່ວມມືລະຫວ່າງສອງປະເທດ ລາວ-ອົດສະຕາລີ ຕະຫຼອດໄລຍະ 69 ປີທີ່ຜ່ານມາ ເຊິ່ງໄດ້ຮັບການພັດທະນາ ແລະ ເສີມຂະຫຍາຍເປັນກ້າວໆ; ພິເສດ, ມີພະນັກງານຂອງສະພາແຫ່ງຊາດລາວຈຳນວນຫຼາຍທ່ານ ທີ່ສຳເລັດການສຶກສາຢູ່ປະເທດອົດສະຕຣາລີ.

ສະພາແຫ່ງຊາດລາວ ແລະ ລັດຖະສະພາອົດສະຕຣາລີ ໄດ້ມີການພົວພັນຮ່ວມມືນຳກັນເປັນຢ່າງດີ ແລະ ຕໍ່ເນື່ອງໃນຫຼາຍລະດັບ ເຊິ່ງເປັນການປະກອບສ່ວນເຂົ້າໃນການເສີມສ້າງສາຍພົວພັນມິດຕະພາບ ແລະ ການຮ່ວມມືທີ່ມີມາແຕ່ດົນນານລະຫວ່າງສອງປະເທດ ທັງປະກອບສ່ວນສົ່ງເສີມສ້າງສັນຕິພາບ, ສະຖຽນລະພາບ ແລະ ການຮ່ວມມືເພື່ອການພັດທະນາຢູ່ໃນພາກພື້ນ ແລະ ໃນໂລກ. ສອງຝ່າຍໄດ້ແລກປ່ຽນການຢ້ຽມຢາມເຊິ່ງກັນແລະກັນຢ່າງປົກກະຕິ ແລະ ມີຫຼາຍລະດັບ ເຊິ່ງມີທັງຄະນະຜູ້ແທນຂັ້ນສູງນຳໂດຍປະທານສະພາແຫ່ງຊາດ, ກຳມາທິການ ແລະ ອື່ນໆ; ນອກນີ້, ກໍມີການຮ່ວມມືສະໜັບສະໜູນເຊິ່ງກັນແລະກັນໃນເວທີລັດຖະສະພາພາກພື້ນ ແລະ ສາກົນ.

ທ່ານ ຄໍາແພງ ວິລະພັນ ຍັງໄດ້ແຈ້ງໃຫ້ຊາບກ່ຽວກັບສະພາແຫ່ງຊາດລາວ ຊຸດທີ IX ແລະ ການປະຕິບັດໜ້າທີ່ຂອງກໍາມາທິການກົດໝາຍ ໂດຍສັງເຂບ ແລະ ໃນເດືອນຕຸລານີ້ ສະພາແຫ່ງຊາດລາວ ຈະເປັນເຈົ້າພາບຈັດກອງປະຊຸມໃຫຍ່ໄອປາ ຄັ້ງທີ 45, ຫວັງວ່າຈະໄດ້ຮັບການສະໜັບສະໜູນຈາກອົດສະຕຣາລີ ໃນການປະຕິບັດພັນ ທະດັ່ງກ່າວໃຫ້ມີຜົນສໍາເລັດ.

ທ່ານ ນາງ ເມແກນ ໂຈນສ໌ ກໍໄດ້ກ່າວສະແດງຄວາມຂອບໃຈການຕ້ອນຮັບຢ່າງອົບອຸ່ນ ແລະ ສະແດງຄວາມເປັນເອກະພາບຕໍ່ຄໍາຄິດເຫັນຂອງທ່ານປະທານກໍາມາທິການກົດໝາຍ ຕໍ່ສາຍພົວພັນມິດຕະພາບ ແລະ ການຮ່ວມມືອັນດີງາມລະຫວ່າງ ອົດສະຕຣາລີ ແລະ ສປປລາວ ກໍຄືລະຫວ່າງສອງອົງການນິຕິບັນຍັດ; ພ້ອມທັງເນັ້ນຢ້ຳວ່າ ໃນເວລາທີ່ປະຕິບັດໜ້າທີ່ທາງການທູດຢູ່ ສປປລາວ ຈະສືບຕໍ່ເປັນຂົວຕໍ່ທີ່ດີໃຫ້ແກ່ມິດຕະພາບສອງຝ່າຍ, ໃຫ້ ການຊ່ວຍເຫຼືອ ແລະ ຊຸກຍູ້ສົ່ງເສີມການພົວພັນຮ່ວມມືລະຫວ່າງສອງປະເທດ ກໍຄືສອງອົງການນິຕິບັນຍັດ ໃຫ້ໄດ້ຮັບການພັດທະນາຍິ່ງໆຂຶ້ນໃນຕໍ່ໜ້າ.