(ສພຊ) ໃນລະຫວ່າງວັນທີ 24- 25 ກັນຍາ 2023 ທ່ານ ຮສ. ປອ. ລິນຄຳ ດວງສະຫວັນ ກຳມະການສຳຮອງສູນກາງພັກ, ກຳມະການຄະນະປະຈຳ, ປະທານກຳມາທິການເສດຖະກິດ ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ ໄດ້ລົງເຄື່ອນໄຫວເຮັດວຽກຢູ່ແຂວງສາລະວັນ ເພື່ອຕິດຕາມກວດກາ, ການຈັດຕັ້ງປະຕິບັດການກໍ່ສ້າງ, ບູລະນະສ້ອມແປງ, ປ້ອງກັນຕາຝັ່ງເຈື່ອນ ຕາມແລວແມ່ນໍ້າ ທີ່ເປັນຊາຍແດນລະຫວ່າງຊາດ, ເສັ້ນທາງສາຍຫຼັກ ແລະ ເສັ້ນທາງຫຼວງແຫ່ງຊາດ ຢູ່ແຂວງສາລະວັນ ໂດຍການເຂົ້າຮ່ວມຂອງທ່ານ ພູທົງ ຄຳມະນີວົງ ຮອງເຈົ້າແຂວງ ຜູ້ຊີ້ນໍາຂົງເຂດເສດຖະກິດຂັ້ນແຂວງ, ທ່ານ ຂັນໄຊ ລັດຖະເຮົ້າ ຮອງປະທານສະພາປະຊາຊົນແຂວງ, ມີບັນດາທ່ານຫົວໜ້າ-ຮອງຫົວໜ້າກົມ, ຫົວໜ້າ-ຮອງຫົວໜ້າພະແນກ ແລະ ວິຊາການ ຈາກສູນກາງ ແລະ ທ້ອງຖິ່ນເຂົ້າຮ່ວມ.

ທ່ານ ຮສ. ປອ. ລິນຄຳ ດວງສະຫວັນ ໄດ້ໃຫ້ຮູ້ຈຸດປະສົງຂອງການມາເຄື່ອນໄຫວເຮັດວຽກໃນຄັ້ງນີ້ ແມ່ນເພື່ອຕິດຕາມ, ຊຸກຍູ້ສົ່ງເສີມການຈັດຕັ້ງປະຕິບັດວຽກງານ ການກໍ່ສ້າງບູລະນະສ້ອມແປງປ້ອງກັນຕາຝັ່ງເຈື່ອນ ຕາມແລວແມ່ນໍ້າ ທີ່ເປັນຊາຍແດນລະຫວ່າງຊາດ, ເສັ້ນທາງສາຍຫຼັກ ແລະ ເສັ້ນທາງຫຼວງແຫ່ງຊາດ ທັງເປັນການເກັບກໍາຂໍ້ມູນ ແລະ ສະພາບການປະຕິບັດຕົວຈິງກ່ຽວກັບວຽກງານດັ່ງກ່າວ ແລະ ເປັນບ່ອນອີງໃນການສັງລວມລາຍງານ ຕໍ່ຄະນະປະຈຳສະພາແຫ່ງຊາດ. ພ້ອມທັງເອົາໃຈໃສ່ ເພີ່ມທະວີການຕິດຕາມ ກວດກາ ການກໍ່ສ້າງຕາຝັ່ງເຈື່ອນ ຂອງບໍລິສັດຜູ້ຮັບເໝົາ ຢ່າງເປັນປົກກະຕິ ເພື່ອຮັບປະກັນໃຫ້ໄດ້ຕາມມາດຕະຖານທາງດ້ານເຕັກນິກ ແລະ ຄຸນນະພາບ ໃຫ້ສາມາດນໍາໃຊ້ໄດ້ຍາວນານ. ຮ່ວມກັນຄົ້ນຄວ້າ, ປຶກສາຫາລື ປະກອບຄຳເຫັນໃສ່ບາງຄຳຖາມເຈາະຈີ້ມເປັນຕົ້ນ: ວຽກງານປ້ອງກັນຕາຝັ່ງເຈື່ອນ ສະພາບການ ກໍ່ສ້າງ ແລະ ບູລະນະສ້ອມແປງ ປ້ອງກັນຕາຝັ່ງເຈື່ອນ, ການຈັດສັນໂຄງການກໍ່ສ້າງ ແລະ ບູລະນະສ້ອມແປງ ປ້ອງກັນຕາຝັ່ງເຈື່ອນ ເຂົ້າໃນແຜນການລົງທຶນຂອງລັດ, ການຈັດຕັ້ງປະຕິບັດກົດໝາຍ ແລະ ນິຕິກຳໃຕ້ກົດໝາຍທີ່ຕິດພັນກັບການກໍ່ສ້າງ ແລະ ບູລະນະສ້ອມແປງ, ການຄຸ້ມຄອງ ແລະ ຕິດຕາມ ກວດກາ ການກໍ່ສ້າງຕາຝັ່ງເຈື່ອນ ຂອງບໍລິສັດຜູ້ຮັບເໝົາ, ວຽກງານກໍ່ສ້າງ ແລະ ບູລະນະສ້ອມແປງເສັ້ນທາງໃນການດໍາເນີນການບູລະນະສ້ອມແປງເສັ້ນທາງ ທີ່ເປ່ເພໃນໄລຍະຜ່ານມາ, ການຈັດບຸລິມະສິດໂຄງການກໍ່ສ້າງ ແລະ ບູລະນະສ້ອມແປງເສັ້ນທາງ ເພື່ອຮັບປະກັນໃຫ້ການຈະລາຈອນ, ຂົນສົ່ງສິນຄ້າ ແລະ ບໍລິການ ມີຄວາມສະດວກ, ວ່ອງໄວ ພາຍໃນເທສະບານແຂວງ ໄດ້ມີການກໍານົດເສັ້ນທາງແລ່ນລົດຂົນສົ່ງສິນຄ້າ, ໂດຍສານ, ໄດ້ມີການຄຸ້ມຄອງກວດກາຊັ່ງນໍ້າໜັກລົດບັນທຸກ, ລົດຂົນສົ່ງສິນຄ້າການຄຸ້ມຄອງ ແລະ ຕິດຕາມ ກວດກາ ການກໍ່ສ້າງ ແລະ ສ້ອມແປງເສັ້ນທາງ ຂອງບໍລິສັດຜູ້ຮັບເໝົາ ເພື່ອຮັບປະກັນດ້ານເຕັກນິກໃຫ້ມີຄຸນນະພາບ ສາມາດນໍາໃຊ້ໄດ້ຍາວນານ ທັງນີ້ ກໍເພື່ອເຮັດໃຫ້ວຽກງານດັ່ງກ່າວ ໄດ້ຮັບການຈັດຕັ້ງປະຕິບັດໃຫ້ມີປະສິດທິຜົນດີຂຶ້ນ.

ພ້ອມນັ້ນ, ໃນກອງປະຊຸມ ກໍໄດ້ຮັບຟັງການລາຍງານໂດຍສັງເຂບຈາກພະແນກໂຍທາທິການ ແລະ ຂົນສົ່ງ ໄດ້ລາຍງານກ່ຽວກັບວຽກງານປ້ອງກັນຕາຝັ່ງເຈື່ອນ ເຊິ່ງແຂວງສາລະວັນ ແມ່ນແຂວງໜຶ່ງທີ່ນອນໃນພາກໃຕ້ຂອງລາວມີແມ່ນ້ຳຂອງໄຫຼຜ່ານລວງຍາວ 94,6 ກິໂລແມັດ ເປັນເຂດແດນລະຫວ່າງແຂວງສາລະວັນ ສປປລາວ ກັບ ຈັງຫວັດອຸບົນລາຊະທານີ ປະເທດໄທ ຕາມລຳແມ່ນ້ຳຂອງເຂດແຂວງສາລະວັນ ຄຸ້ມຄອງຈຳນວນ 14 ດອນ ມີບ້ານລຽບແຄມແມ່ນ້ຳຂອງ 9 ບ້ານ ໃນນັ້ນ ຍັງປະກອບມີ ແມ່ນໍ້າສາຂາສອງສາຍຄື: ນໍ້າເຊບັງນວນ ແລະ ນໍ້າເຊໂດນ ເນື່ອງຈາກສະພາບການປ່ຽນແປງຂອງດິນຟ້າອາກາດ ເປັນຕົ້ນ: ໄພນໍ້າຖ້ວມເຮັດໃຫ້ແຄມຝັ່ງແມ່ນໍ້າໄດ້ມີການເຊາະເຈື່ອນໃນແຕ່ລະປີ, ການກໍ່ສ້າງປ້ອງກັນຕາຝັ່ງເຈື່ອນ ກໍເພື່ອເປັນການຮັກສາເຂດນ້ຳແດນດິນຕາມແຄມຝັ່ງແມ່ນໍ້າຂອງ ທັງເປັນການປັບປຸງທັດສະນີຍະພາບແຄມຕາຝັ່ງໃຫ້ມີຄວາມສວຍງາມ ຕິດພັນກັບການທ່ອງທ່ຽວ ເປັນຕົ້ນ: ແມ່ນການກໍ່ສ້າງປ້ອງກັນຕາຝັ່ງເຈື່ອນໃນເຂດຕົວເມືອງ, ບ້ານ ຫຼື ບາງແຫຼ່ງທ່ອງທ່ຽວທີ່ມີແມ່ນໍ້າໄຫຼຜ່ານ. ນອກນັ້ນ ວຽກງານກໍ່ສ້າງ ແລະ ບູລະນະ ສ້ອມແປງປ້ອງກັນຕາຝັ່ງ ໃນໄລຍະຜ່ານມາ ໄດ້ສຶກສາເກັບກຳຂໍ້ມູນຕາມຕາຝັ່ງແມ່ນໍ້າ ແລະ ໄດ້ມີການກຳນົດຈຸດທີ່ມີການກັດເຊາະ ພ້ອມທັງຈັດລຽງບຸລິມະສິດຄວາມຈຳເປັນໃນການກໍ່ສ້າງ ແລະ ສ້ອມແປງ ໄດ້ມີການສຶກສາສຳຫຼວດ-ອອກແບບ, ຂຽນບົດສະເໜີໂຄງການເພື່ອສະເໜີເຂົ້າແຜນງົບປະມານປະຈຳປີ ໂດຍປະຕິບັດຕາມວິໄນແຜນການ-ການເງິນ ແລະ ໄດ້ແຕ່ງຕັ້ງຄະນະຄຸ້ມຄອງໂຄງການ, ດຳເນີນການປະມູນຈັດຊື້-ຈັດຈ້າງ ເອົາບໍລິສັດທີ່ປຶກສາ ແລະ ບໍລິສັດຮັບເໝົາ ເພື່ອດຳເນີນການກໍ່ສ້າງ ແລະ ບັນດາໜ້າວຽກອື່ນໆ.

ນອກນັ້ນ, ທ່ານ ຮສ. ປອ. ລິນຄໍາ ດວງສະຫວັນ ກໍໄດ້ມອບຄອມພິວເຕີຕັ້ງໂຕະ 2 ຊຸດ ທີ່ໄດ້ຮັບການຊຸກຍູ້ຈາກກອງທຶນຊ່ວຍເຫຼືອສັງຄົມ ສະພາແຫ່ງຊາດ ໃຫ້ສະພາປະຊາຊົນແຂວງ ເພື່ອນຳໃຊ້ເຂົ້າໃນການຈັດຕັ້ງປະຕິບັດໜ້າທີ່ວຽກງານ, ໂດຍການຮັບຂອງທ່ານ ຂັນໄຊ ລັດຖະເຮົ້າ ຄະນະປະຈໍາພັກແຂວງ ຮອງປະທານສະພາປະຊາຊົນແຂວງ; ຫຼັງຈາກນັ້ນ, ຄະນະກໍໄດ້ເດີນທາງໄປຕິດຕາມໂຄງການພາກສະໜາມຕົວຈິງ ຢູ່ເມືອງ 3 ເມືອງຄື: ໂຄງການກໍ່ສ້າງທາງເລກທີ 3.6946 ແຕ່ບ້ານອົ້ນແບ່ງ-ບ້ານໜອງຈົວ ເມືອງເລົ່າງາມ ແຂວງສາລະວັນ; ໂຄງການກໍ່ສ້າງທາງເລກທີ 3.6912 ແຕ່ເທສະບານເມືອງເລົ່າງາມ-ເມືອງປາກຊ່ອງ; ໂຄງການກໍ່ສ້າງທາງເລກທີ 2.6902 ແຕ່ບ້ານຫໍກອງ ເມືອງເລົ່າງາມ-ແຍກທາງ 13 ໃຕ້ ເມືອງຄົງເຊໂດນ ແຂວງສາລະວັນ; ໂຄງການກໍ່ສ້າງຂົວຂ້າມເຊໂດນ ບ້ານບົວລະພາ ເມືອງຄົງເຊໂດນ; ໂຄງການກໍ່ສ້າງປ້ອງກັນຕາຝັ່ງເຈື່ອນ ດ່ານພົມແດນປາກຕະພານ ບ້ານປາກຕະພານ ຫາ ບ້ານໂຮງສາຍທອງ ຫາ ບ້ານປາກສະນົມ ເມືອງລະຄອນເພັງ ແຂວງສາລະວັນ.

(ກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ)