ຕອນບ່າຍຂອງວັນທີ 9 ພຶດສະພາ 2023 ຜ່ານມາ; ທ່ານ ຮສ.ປອ ລິນຄຳ ດວງສະຫວັນ ກຳມະການສຳຮອງສູນກາງພັກ ປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ພ້ອມດ້ວຍຄະນະ ໄດ້ເດີນທາງມາເຄື່ອນໄຫວຕິດຕາມ, ຊຸກຍູ້ ແລະ ເກັບກຳຂໍ້ມູນ ກຸ່ມຜະລິດປູກກາເຟເປັນສິນຄ້າ ຂອງປະຊາຊົນບ້ານໜອງຈົວ ແລະ ຢ້ຽມຢຽມຄອບຄົວຕົວແບບເຈົ້າຂອງຟາມລ້ຽງໝູພັນ ສີລາເພັດ ບ້ານຕະກິດນ້ອຍ ເມືອງເລົ່າງາມ ແຂວງສາລະວັນ; ໂດຍການຕ້ອນຮັບ ແລະ ນຳພາເຄື່ອນໄຫວຂອງ ທ່ານ ຂັນໄຊ ລັດຖະເຮົ້າ ຄະນະປະຈໍາພັກແຂວງ ຮອງປະທານສະພາປະຊາຊົນແຂວງສາລະວັນ ແລະ ທ່ານ ສົມສັກ ທົງຄຳຫານ ກຳມະການພັກແຂວງ ເລຂາພັກ-ເຈົ້າເມືອງເລົ່າງາມ ແລະ ພາກສ່ວນທີ່ກ່ຽວຂ້ອງຂັ້ນແຂວງ ແລະ ຂັ້ນເມືອງຮ່ວມເຄື່ອນໄຫວໃນຄັ້ງນີ້.

ຈຸດປະສົງຂອງການມາເຄື່ອນໄຫວໃນຄັ້ງນີ້ ເພື່ອໃຫ້ຮູ້ເຖິງດ້ານດີ, ບັນຫາຂໍ້ຄົງຄ້າງ ແລະ ວິທີແກ້ໄຂ ບັນຫາດ້ານການຈັດຕັ້ງປະຕິບັດ ກ່ຽວກັບການຊຸກຍູ້ສົ່ງເສີມການຜະລິດສິນຄ້າ ເພື່ອທົດແນການນຳເຂົ້າ ແລະ ຄຸ້ມຄອງການນຳເຂົ້າສິນຄ້າ, ຄຸ້ມຄອງລາຄາ ແລະ ການຟື້ນຟູປ່າໄມ້ ການແບ່ງຂັ້ນຄຸ້ມຄອງລະຫວ່າງຂັ້ນສູນກາງ ແລະ ທ້ອງຖ່ິນ, ທັງເປັນການເກັບກຳຂໍ້ມູນໃນການຄົ້ນຄ້ວາ, ປະກອບຄຳຄິດຄຳເຫັນ ເຂົ້າໃສ່ຮ່າງຂອງກົດໝາຍ ວ່າດ້ວຍການຄຸ້ມຄອງລາຄາ ແລະ ຄ່າບໍລິການ ທີ່ຈະນຳເຂົ້າຄົ້ນຄວ້າໃນກອງປະຊຸມສະໄມສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ທີ່ຈະມາເຖິງນີ້.

ໃນການລົງເຄື່ອນໄຫວດັ່ງກ່າວ, ທ່ານ ຮສ.ປອ ລິນຄຳ ດວງສະຫວັນ ກຳມະການສຳຮອງສູນກາງພັກ ປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ໄດ້ຮັບຟັງການລາຍງານສະພາບຄວາມຄືບໜ້າ, ຂໍ້ສະດວກ, ຂໍ້ຫຍຸ້ງຍາກ ຂອງການປູກ ແລະ ຜະລິດກາເຟ ເປັນສິນຄ້າ ຂອງປະຊາຊົນບ້ານໜອງຈົວ; ຈາກນັ້ນ, ຄະນະທີມງານຈາກສະພາແຫ່ງຊາດ ກໍ່ໄດ້ເດີນທາງໄປ ຢ້ຽມຢາມ ຄອບຄົວຕົວແບບລ້ຽງໝູພັນ ຂອງຟາມລ້ຽງໝູພັນ ສີລາເພັດ ບ້ານຕະກິດນ້ອຍ ເພື່ອສະໜອງຊິ້ນໝູໃຫ້ແກ່ຕະຫຼາດພາຍໃນແຂວງ ເຊິ່ງເປັນການຫຼຸດຜ່ອນການນຳເຂົ້າສິນຄ້າ ກໍ່ຄືຊິ້ນໝູຈາກປະເທດໃກ້ຄຽງ ແລະ ເປັນປະກອບສ່ວນໃນການຈັດຕັ້ງປະຕິບັດ ວາລະແຫ່ງຊາດ ວ່າດ້ວຍການແກ້ໄຂບັນຫາເສດຖະກິດ-ການເງິນ ແນ່ໃສ່ເຮັດໃຫ້ສະພາບເສດຖະກິດໃນປັດຈຸບັນ ພາຍໃນປະເທດໃຫ້ດີຂຶ້ນເປັນກ້າວໆ.

ພາບ-ຂ່າວ: ດີລຳພົນ ພົມມະຈັນ