(ສພຊ) ວັນທີ 5 ກຸມພາ 2023 ທ່ານ ຮສ. ປອ. ລິນຄຳ ດວງສະຫວັນ ປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດ ລ້ອມ ພ້ອມດ້ວຍຄະນະ ໄດ້ລົງເຄື່ອນໄຫວເກັບກຳຂໍ້ມູນຕົວຈິງ ກ່ຽວກັບການຂໍຫັນປ່ຽນທີ່ດິນປ່າໄມ້ທຳມະຊາດ ໄປເປັນທີ່ດິນອຸດສາຫະກຳ ລັກສະນະຖາວອນ ແລະ ລັກສະນະຊົ່ວຄາວ ເພື່ອນໍາໃຊ້ເຂົ້າໃນໂຄງການຂຸດຄົ້ນ ແລະ ປຸງແຕ່ງແຮ່ຄຳ ຂອງບໍລິສັດ ມໍລະກົດ ເປນຊຽນ ບໍ່ແຮ່ ຈຳກັດ ຢູ່ເຂດບ້ານໂຄກສະຫວັນ ເມືອງປາກລາຍ ແຂວງໄຊຍະບູລີ ໂດຍມີຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງທີ 7 ແຂວງໄຊຍະບູລີ, ເຈົ້າເມືອງໆປາກລາຍ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ທັງນີ້, ກໍເພື່ອຮັບຟັງຄວາມຄິດຄວາມເຫັນຂອງປະຊາຊົນ, ອໍານາດການປົກຄອງທ້ອງຖິ່ນ, ສະມາຊິກສະພາແຫ່ງຊາດ ປະຈຳເຂດ ເລືອກຕັ້ງ ແລະ ສະມາຊິກສະພາປະຊາຊົນແຂວງ ກ່ຽວກັບການພັດທະນາໂຄງການດັ່ງກ່າວ, ພ້ອມທັງເກັບກຳຂໍ້ມູນ ແລະ ລົງເບິ່ງພື້ນທີ່ຕົວຈິງ ກ່ຽວກັບທີ່ດິນປ່າໄມ້ທຳມະຊາດທີ່ລັດຖະບານສະເໜີຂໍຫັນປ່ຽນ ໄປເປັນທີ່ດິນອຸດສາຫະກຳ ລັກສະນະຊົ່ວຄາວ ແລະ ລັກສະນະຖາວອນ ສັງລວມລາຍງານຕໍ່ກອງປະຊຸມ ຄະນະປະຈຳສະພາແຫ່ງຊາດ ພິຈາລະນາ ໃນເດືອນມັງກອນຜ່ານມາ.

ໂອກາດດັ່ງກ່າວ, ຄະນະ ໄດ້ຮັບຟັງການລາຍງານຈາກຕາງໜ້າຜູ້ພັດທະນາໂຄງການ. ຈາກນັ້ນ, ທ່ານປະທານກຳມາທິການເສດຖະ ກິດ, ເຕັກໂນໂລຊີ ແລະ ສິ່ງແວດລ້ອມ ກໍໄດ້ມີຄຳເຫັນໂອ້ລົມ ເຊິ່ງທ່ານມີຄວາມເປັນຫ່ວງເປັນໃຍຕໍ່ລະບົບນິເວດທຳມະຊາດ ແລະ ສະເໜີໃຫ້ ໂຄງການເອົາໃຈໃສ່ຕໍ່ບັນຫາດັ່ງກ່າວ, ສ້າງວຽກເຮັດງານທຳໃຫ້ປະຊາຊົນໃນຊຸມຊົນ, ສ້າງຖະໜົນຫົນທາງ ເພື່ອໃຫ້ປະຊາຊົນໄປມາສະດວກ ສະບາຍ ສ້າງເງື່ອນໄຂໃນການຂົນສົ່ງການຜະລິດ.