ໃນລະຫວ່າງວັນທີ 23-24 ມີນາ 2022 ທ່ານ ຮສ. ປອ. ລິນຄຳ ດວງສະຫວັນ ກຳມະການສຳຮອງສູນກາງພັກ, ຄະນະປະຈຳພັກສະພາແຫ່ງຊາດ, ກຳມະການຄະນະປະຈຳສະພາແຫ່ງຊາດ, ປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ ພ້ອມດ້ວຍຄະນະ ໄດ້ຮ່ວມກັບ ສະມາຊິກສະພາແຫ່ງຊາດ ປະຈຳເຂດເລືອກຕັ້ງ ທີ 13 ແຂວງສະຫວັນນະເຂດ ແລະ ສະພາປະຊາຊົນແຂວງສະຫວັນນະເຂດ ເຄື່ອນໄຫວຕິດຕາມກວດກາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ໄລຍະ 6 ເດືອນ ຕົ້ນປີ 2022 ແລະ ວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ຕາມມະຕິ ກອງປະ ຊຸມສະພາແຫ່ງຊາດ; ໂດຍລົງເລິກ ຕິດຕາມກວດກາ ແລະ ຊຸກຍູ້ ການຜະລິດ ເພື່ອທົດແທນການນຳເຂົ້າ ແລະ ເປັນສິນຄ້າສົ່ງອອກ; ການຈັດເກັບລາຍຮັບ ເຂົ້າງົບປະມານແຫ່ງລັດ; ບັນຫາການລົງທຶນຢູ່ເຂດເສດຖະກິດພິເສດສະຫວັນ-ເຊໂນ; ການພັດທະນາເຂດໂລຊິດສະຕິກ; ການເຮັດທົດລອງຂຸດຄົ້ນແຮ່ເຫຼັກ; ການຄຸ້ມຄອງແຮງງານ ແລະ ບັນຫາອື່ນໆທີ່ກ່ຽວຂ້ອງ.

ໃນໂອກາດດັ່ງກ່າວ, ຄະນະ ໄດ້ເຂົ້າພົບປະຢ້ຽມຢາມ ແລະ ເຮັດວຽກ ກັບ ທ່ານຮອງເຈົ້າແຂວງ; ຮັບຟັງການລາຍງານຫຍໍ້ ຈາກພະແນກການທີ່ກ່ຽວຂ້ອງ ກ່ຽວກັບການຈັດຕັ້ງປະຕິບັດ ບັນດາຄາດໝາຍ ແລະ ເນື້ອໃນ ທີ່ຕິດພັນກັບ ມະຕິ ດັ່ງກ່າວ. ພ້ອມກັນນັ້ນ, ກໍຍັງໄດ້ຮັບຟັງການລາຍງານສະພາບການຈັດຕັ້ງປະຕິບັດໂຄງການກໍ່ສ້າງຊົນລະປະທານອ່າງເກັບນຳ້ຫ້ວຍອາໄກ້ ເມືອງພິນ ແລະ ຊົນລະປະທານຫ້ວຍທ່າຮາວ ເມືອງອຸທຸມພອນ.

ພ້ອມນັ້ນ, ຄະນະຍັງໄດ້ລົງຢ້ຽມຢາມພື້ນທີ່ຕົວຈິງ ເປັນຕົ້ນ ໂຄງການທົດລອງຂຸດຄົ້ນແຮ່ເຫຼັກ ຢູ່ເມືອງພິນ, ໂຄງການຊົນລະປະທານ ຫ້ວຍອາໄກ້ ເມືອງພິນ, ຂົວມິດຕະພາບລາວ-ໄທ ແຫ່ງທີ 2 ແລະ ເຂດເສດຖະກິດພິເສດ ສະຫວັນ-ເຊໂນ.