ລະຫວ່າງວັນທີ 20-21 ມິຖຸນາ 2023 ທີ່ຜ່ານມານີ້ ທ່ານ ຄຳຈັນ ໂສຕາປະເສີດ ປະທານກຳມາທິການບັນດາເຜົ່າ ສະພາແຫ່ງຊາດ ແລະ ທ່ານ ນາງ ທອງໃບ ໄຊຍະສານ ປະທານຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າ ສະພາປະຊາຊົນແຂວງສາລະວັນ ພ້ອມດ້ວຍຄະນະທີມງານຈາກສະພາແຫ່ງຊາດ ໄດ້ເຄື່ອນໄຫວຽກງານຕິດຕາມກວດກາ ແລະ ເກັບກຳຂໍ້ມູນ ວຽກງານພັດທະນາຊົນນະບົດແກ້ໄຂຄວາມທຸກຍາກ ແລະ ວຽກງານຊົນເຜົ່າ, ສາສະໜາ ຢູ່ທີ່ເມືອງຄົງເຊໂດນ ແຂວງສາລະວັນ; ໂດຍການຕ້ອນຮັບຂອງທ່ານ ປອ ສະໄໝ ໂພທິສານ ກຳມະການພັກແຂວງ ເລຂາພັກເຈົ້າເມືອງຄົງເຊໂດນ ພ້ອມດ້ວຍບັນດາທ່ານຫົວໜ້າຫ້ອງການອ້ອມຂ້າງເມືອງເຂົ້າຮ່ວມ.
ໃນການລົງເຄື່ອນໄຫວ ຄະນະທີມງານຈາກສະພາແຫ່ງຊາດ ແລະ ສະພາປະຊາຊົນແຂວງ ໄດ້ເຮັດວຽກຮ່ວມກັບ ອົງການປົກຄອງຂອງເມືອງຄົງເຊໂດນ ໂດຍຈັດກອງປະຊຸມເຊິ່ງໜ້າ ເຊິ່ງໄດ້ຮັບຟັງການລາຍງານ ສະພາບການຜົນສຳເລັດທີ່ພົ້ນເດັ່ນຂອງການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງເມືອງຄົງເຊໂດນ ແລະ ວຽກງານຜັນຂະຫຍາຍວາລະແຫ່ງຊາດ ໄລຍະ 6 ເດືອນຕົ້ນປີ 2023 ຜ່ານມາ ຈາກທ່ານເລຂາພັກເຈົ້າເມືອງຄົງເຊໂດນ, ພ້ອມທັງສົນທະນາແລກປ່ຽນປະກອບຄຳຄິດເຫັນລົງເລິກເຂົ້າໃສ່ວຽກງານ ການຈັດຕັ້ງປະຕິບັດວຽກງານຄຸ້ມຄອງຊົນເຜົ່າ ແລະ ສາສະໜາ ພາຍໃນເມືອງ ແລະ ຮັບຟັງການລາຍງານສະພາບ ການຈັດຕັ້ງປະຕິບັດ ດໍາລັດ 348/ລບ ວ່າດ້ວຍມາດຕະຖານພົ້ນທຸກ ແລະ ມາດຕະຖານພັດທະນາ ໂດຍລວມຄະນະຮັບຜິດຊອບຂັ້ນເມືອງໄດ້ຈັດຕັ້ງປະຕິບັດຜັນຂະຫຍາຍກຳນົດເຂົ້າໃນແຜນ 5 ປີຂອງຕົນ ແລະ ໄດ້ເກັບກຳຂໍ້ມູນ ຄອບຄົວພົ້ນທຸກ ແລະ ຄອບຄົວພັດທະນາ ຕາມແບບຟອມ ສາມາດປະເມີນໄລຍະຕົ້ນ ຕາມການລາຍງານຂອງຫ້ອງການກະສິກຳ ແລະ ປ່າໄມ້ເມືອງ: ພາຍໃນເມືອງຄົງເຊໂດນ ມີ 83 ບ້ານ, ມີ 5 ຈຸດສຸມ, ພົນລະເມືອງທັງໝົດ 69,741 ຄົນ, ຍິງ 36,287 ຄົນ, ຄອບຄົວທັງໝົດທົ່ວເມືອງມີ 10,293 ຄົວຄົວ, ໃນນັ້ນ ບ້ານພົ້ນທຸກມີ 83 ບ້ານ ເທົ່າກັບ 100%, ບ້ານພັດທະນາມີ 14 ບ້ານ ເທົ່າກັບ 16.09%; ຄອບຄົວພົ້ນທຸກມີ 10,283 ຄອບຄົວ ເທົ່າກັບ 99.90%, ຄອບຄົວພັດທະນາມີ 6,904 ຄອບຄົວ ເທົ່າກັບ 67.07%, ແຕ່ກໍ່ຍັງມີຄອບຄົວທຸກຍາກ 10 ຄອບຄົວ ເທົ່າກັບ 0.09% ທີ່ຜ່ານການປະເມີນຍັງບໍ່ທັນຄົບເງື່ອນໄຂ ແຕ່ຂັ້ນເມືອງໄດ້ມີແຜນສູ້ຊົນລົບລ້າງຄອບຄົວທຸກຍາກໃຫ້ສຳເລັດ ເພື່ອເຮັດໃຫ້ເມືອງກາຍເປັນເມືອງເຂັ້ມແຂງຮອບດ້ານໃນປີ 2024.
ພ້ອມດຽວກັນ ທ່ານ ຄຳຈັນ ໂສຕາປະເສີດ ພ້ອມດ້ວຍຄະນະ ກໍ່ໄດ້ຖືໂອກາດລົງເຄື່ອນໄຫວພົບປະຢ້ຽມຢາມຖາມຂ່າວ ພໍ່ແມ່ປະຊາຊົນ ທັງເປັນການເກັບກຳຂໍ້ມູນລາຍງານສະພາບຄວາມຄືບໜ້າບ້ານເປົ້າໝາຍພົ້ນທຸກ ຈຸດບ້ານບຶງກາງ, ບ້ານຫ້ວຍເຊົາ ແລະ ບ້ານໜອງຄຸລຸ ເມືອງຄົງເຊໂດນ ຕື່ມອີກ;
ຜົນຂອງການຕິດຕາມກວດກາຢູ່ແຂວງ ແລະ ຢູ່ຂັ້ນເມືອງຄັ້ງນີ້ ຈະນຳເອົາຂໍ້ມູນດັ່ງກ່າວ ນໍາສະເໜີຕໍ່ກອງປະຊຸມຄະນະປະຈໍາສະພາແຫ່ງຊາດ ແລະ ເປັນຂໍ້ມູນນຳເຂົ້າຄົ້ນຄວ້າໃນກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ທີ່ຈະມາເຖິງນີ້.
ພາບ-ຂ່າວ: ດີລຳພົນ ພົມມະຈັນ