(ສພຊ) ທ່ານ ວູບ ເກລເລີດທ໌ (Wulf Gallert) ພ້ອມຄະນະ ໄດ້ເຂົ້າຮ່ວມ ກອງປະຊຸມພົບປະ 2 ຝ່າຍກັບ ກໍາມາທິການການຕ່າງປະເທດສະພາແຫ່ງຊາດລາວນຳໂດຍ ທ່ານ ສັນຍາ ປະເສີດ ປະທານກຳມາທິການການຕ່າງປະເທດ ໃນວັນທີ 15 ສິງຫາ ທີ່ ສະພາແຫ່ງຊາດ. ໃນກອງປະຊຸມດັ່ງກ່າວທັງສອງຝ່າຍໄດ້ແຈ້ງໃຫ້ກັນຊາບໂດຍຫຍໍ້ກ່ຽວກັບການພັດທະນາເສດຖະກິດ-ສັງຄົມ ແລະ ອົງການນິຕິບັນຍັດໃຫ້ກັນແລະກັນຊາບ ແລະ ທັງຕີລາຄາສູງຕໍ່ການພົວພັນຮ່ວມມືລະຫວ່າງສອງປະເທດ ກໍຄືສອງອົງການ ຕິນິບັນຍັດໃນໄລຍະຜ່ານມາ ເຊັ່ນ: ການພົວພັນການທູດ ຄົບຮອບ 65 ປີ ແລະ ການພົວພັນສະພາແຫ່ງຊາດລາວ ແລະ ລັດຖະສະພາສະຫະພັນເຢຍລະມັນ , ພ້ອມທັງສະໜັບສະໜູນ ເຊິ່ງກັນ ແລະ ກັນໃນເວທີລັດຖະສະພາພາກພື້ນ ແລະ ສາກົນ ເປັນຕົ້ນໃນກອບຄູ່ຮ່ວມເຈລະຈາລັດຖະສະພາອາຊີ-ເອີຣົບ (ASEP), ສະພັນລັດຖະສະພາສາກົນ (IPU) ແລະ ອື່ນໆ. ພ້ອມກັນນີ້, ຍັງໄດ້ໄຫ້ການຊ່ວຍເຫຼືອ ແລະ ໃຫ້ການສະ ໜັບສະໜູນ ໃນການເສີມສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ໂດຍຜ່ານໂຄງການ (CEGGA) ຕັ້ງແຕ່ປີ 2011 ແລະ ກອງປະຊຸມຍັງໄດ້ປຶກສາຫາລື, ແລກປ່ຽນບົດຮຽນໃນຫົວຂໍ້ຕ່າງໆ ແລະ ສຶກສາສະພາບການຕົວຈິງ ຂອງ ສປປ ລາວ ກໍ່ຄື ທິດທາງແຜນການຕ່າງໆ ຂອງສະພາແຫ່ງຊາດລາວ ທີ່ມີຄວາມຮຽກຮ້ອງຕ້ອງການ ສະເໜີໃຫ້ ຝ່າຍເຢຍລະມັນ ສະໜັບສະໜູນຊ່ວຍເຫຼືອ ທັງເປັນການປະກອບສ່ວນອັນສຳຄັນເຂົ້າໃນການເສີມຂະຫຍາຍສາຍພົວພັນມິດຕະພາບທີ່ມີມາແຕ່ດົນນານ ແລະ ການຮ່ວມມືທີ່ມີ ໝາກຜົນ ລະຫວ່າງ ສາທາລະນະລັດປະຊາທິປະໄຕປະຊາຊົນລາວ ແລະ ສາທາລະນະລັດ ສະຫະພັນ ເຢຍລະມັນ ໃຫ້ໄດ້ຮັບການພັດທະນາ ແລະ ເສີມຂະຫຍາຍຢ່າງບໍ່ຢຸດຢັ້ງ.

ໃນຕອນບ່າຍຂອງວັນດຽວກັນ, ຄະນະ ທ່ານ ວູບ ເກລເລີດທ໌ (Wulf Gallert) ຍັງໄດ້ເຂົ້າຢ້ຽມຂໍ່ານັບ ແລະ ແຈ້ງຈຸດປະສົງໃນການມາຢ້ຽມຢາມ ແລະ ເຮັດວຽກ ໃນລະຫວ່າງວັນທີ 14-19 ສິງຫາ 2023 ຄັ້ງນີ້ຕໍ່ ທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ພ້ອມທັງສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນຈາກທ່ານຮອງປະທານສະພາແຫ່ງຊາດ ແລະ ຕີລາຄາສູງຕໍ່ການພົວພັນຮ່ວມມືຂອງສອງຝ່າຍໃນໄລຍະຜ່ານມາ ແລະ ເຫັນດີໃຫ້ມີການສືບຕໍ່ສ້າງສາຍພົວພັນອັນດີງາມຮ່ວມກັນໃນຕໍ່ໜ້າ ທັງດ້ານການພົວພັນລະຫວ່າງສອງປະເທດ ກໍຄືສອງອົງການນິຕິບັນຍັດ ໃຫ້ນັບມື້ແໜ້ນແຟ້ນຍິ່ງໆຂຶ້ນ.

ໃນໂອກາດດັ່ງກ່າວ ທ່ານຮອງປະທານສະພາແຫ່ງຊາດ ໄດ້ກ່າວສະແດງຄວາມຍິນດີຕ້ອນຮັບ ຄະນະ ພ້ອມທັງຕີລາຄາສູງ ຕໍ່ການຢ້ຽມຢາມ ແລະ ເຮັດວຽກຄັ້ງນີ້ ເຊິ່ງເປັນໂອກາດດີໃຫ້ແກ່ສອງຝ່າຍ ໄດ້ປຶກສາຫາລື, ແລກປ່ຽນບົດຮຽນ ກ່ຽວກັບການພົວພັນຮ່ວມມື ລະຫວ່າງ 2 ຝ່າຍ ໃນຕໍ່ໜ້າ ໂດຍສະເພາະແມ່ນການສືບຕໍ່ໃຫ້ການຊ່ວຍເຫຼືອ ສປປ ລາວ ຂອງ ເຢຍລະມັນ ອັນເປັນການປະກອບສ່ວນເຂົ້າໃນການເສີມຂະຫຍາຍ ສາຍພົວພັນມິດຕະພາບທີ່ມີມາແຕ່ດົນນານ ແລະ ການຮ່ວມມືທີ່ມີໝາກຜົນ ລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ສາທາລະນະລັດ ສະຫະພັນ ເຢຍລະມັນ ເວົ້າລວມ, ເວົ້າສະເພາະ ລະຫວ່າງລັດຖະສະພາຂອງ 2 ປະເທດ ໃຫ້ໄດ້ຮັບການພັດທະນາ ແລະ ຂະຫຍາຍຕົວ ຍິ່ງໆຂຶ້ນ. ພ້ອມດຽວກັນນີ້,ທ່ານ ຍັງໄດ້ຕີລາຄາສູງຕໍ່ຜົນສໍາເລັດຂອງການພົບປະເຮັດວຽກງານ ລະຫວ່າງ ກຳມາທິການການຕ່າງປະເທດ ພັກຊ້າຍເຢຍລະມັນ ກັບ ກໍາມາທິການການ ຕ່າງປະເທດສະພາແຫ່ງຊາດລາວ ແລະ ຕາງໜ້າຄະນະພົວພັນຕ່າງປະເທດສູນກາງພັກ ແລະ ຊົມເຊີຍ ສອງກໍາມາທິການການຕ່າງປະເທດ ຂອງ ສະພາແຫ່ງຊາດລາວ ແລະ ພັກຊ້າຍເຢຍລະມັນ ທີ່ໄດ້ຮ່ວມກັນຈັດກອງປະຊຸມສໍາມະນາເພື່ອແລກປ່ຽນຄໍາຄິດຄໍາເຫັນ ແລະ ບົດຮຽນໃນບັນດາຫົວຂໍ້ ທີ່ສອງຝ່າຍມີຄວາມສົນ ໃຈຮ່ວມກັນ ແລະ ສະເໜີໃຫ້ສືບຕໍ່ແລກປ່ຽນຄະນະຜູ້ແທນໄປມາຫາສູ່ກັນ, ສະໜັບສະໜູນ ແລະ ຊ່ວຍເຫຼືອເຊິ່ງກັນແລະກັນ ໃນເວທີລັດຖະສະພາພາກພື້ນ ແລະ ສາກົນ ເຊິ່ງໃນປີ 2024 ສປປ ລາວ ຈະໄດ້ຮັບກຽດເປັນປະທານອາຊຽນ ແລະ ເປັນເຈົ້າພາບກອງປະຊຸມສຸດຍອດອາຊຽນ, ສ່ວນສະພາແຫ່ງຊາດລາວ ກໍຈະເປັນປະທານໄອປາ ແລະ ຈະເປັນເຈົ້າພາບຈັດກອງປະຊຸມໃຫຍ່ສະມັດຊາລັດຖະສະພາລະຫວ່າງຊາດອາຊຽນ (AIPA) ຄັ້ງທີ 45 ຫວັງເປັນຢ່າງຍິ່ງວ່າ ຈະໄດ້ຮັບການສະໜັບສະໜູນຈາກເຢຍລະມັນ ເພື່ອເຮັດໃຫ້ ສປປ ລາວ ກໍຄືສະພາແຫ່ງຊາດລາວ ເຮັດຫຼ້ອນໜ້າທີ່ໃນການເປັນເຈົ້າພາບຄັ້ງນີ້.