(ສພຊ) – ວັນສຸກທີ 18 ຕຸລາຜ່ານມາ ທີ່ຫໍປະຊຸມແຫ່ງຊາດ, ທ່ານ ຄຳແພງ ວິລະພັນ ປະທານກໍາມາທິການກົດໝາຍ, ປະທານຄະນະມິດຕະພາບລັດຖະສະພາລາວ-ບັນດາປະເທດອາຊີຕາເວັນຕົກ ພ້ອມດ້ວຍຄະນະ ໄດ້ພົບປະທ່ານ ນາງ ຊັນມາ ເບນາຊິດ (Salma BENAZIZ) ປະທານກໍາມາທິການການຕ່າງປະເທດ, ຫົວໜ້າຄະນະຜູ້ແທນລັດຖະສະພາມາຣົກ ພ້ອມດ້ວຍຄະນະ ໃນໂອກາດທີ່ເຂົ້າຮ່ວມກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຫຼື ໄອປາ (AIPA) ຄັ້ງທີ 45 ທີ່ ສປປລາວ ເປັນເຈົ້າພາບ.

ໃນການພົບປະ, ສອງຝ່າຍໄດ້ຕີລາຄາສູງຕໍ່ການພົວພັນ ແລະ ຮ່ວມມືລະຫວ່າງສະພາແຫ່ງຊາດລາວ ແລະ ສະ ພາຜູ້ແທນລາດສະດອນມາຣົກ ທີ່ມີການພົວພັນ ແລະ ຮ່ວມມືນໍາກັນ ເຖິງວ່າຈະບໍ່ມີການແລກປ່ຽນຢ້ຽມຢາມຂອງຄະ ນະຜູ້ແທນ, ແຕ່ກໍມີການແລກປ່ຽນຂໍ້ມູນຂ່າວສານກ່ຽວກັບການຈັດຕັ້ງປະຕິບັດພາລະບົດບາດຂອງອົງການນິຕິບັນຍັດ, ສົ່ງສານສະແດງຄວາມຊົມເຊີຍ ແລະ ສານອວຍພອນໃນວັນສຳຄັນຕ່າງໆ, ຮ່ວມມື ແລະ ສະໜັບສະໜູນເຊິ່ງກັນແລະກັນໃນເວທີລັດຖະສະພາພາກພື້ນ ແລະ ສາກົນ ເປັນຕົ້ນແມ່ນໄອປາ, ເວທີລັດຖະສະພາອາຊີ-ປາຊີຟິກ (APPF), ຄູ່ຮ່ວມເຈລະຈາລັດຖະສະພາອາຊີ-ເອີຣົບ (ASEP), ສະຫະພັນລັດຖະສະພາສາກົນ (IPU). ສອງຝ່າຍຍັງໄດ້ສະເໜີບາງທິດທາງແຜນການພົວພັນ ແລະ ຮ່ວມມືໃນຕໍ່ໜ້າ ເປັນຕົ້ນຊູກຍູ້ໃຫ້ມີການແລກປ່ຽນຄະນະຜູ້ແທນນໍາກັນ; ແລກ ປ່ຽນບົດຮຽນ, ຂໍ້ມູນຂ່າວສານ ກ່ຽວກັບການປະຕິບັດພາລະບົດບາດຂອງອົງການນິຕິບັນຍັດ ແລະ ຫົວຂໍ້ອື່ນໆທີ່ສອງຝ່າຍມີຄວາມສົນໃຈ; ຊຸກຍູ້ ແລະ ສົ່ງເສີມໃຫ້ສອງປະເທດ ເພີ່ມທະວີການຮ່ວມມືດ້ານເສດຖະກິດ, ການຄ້າ, ການລົງທຶນ, ການທ່ອງທ່ຽວ ແລະ ຂະແໜງການທີ່ສອງປະເທດມີທ່າແຮງນຳກັນ; ສືບຕໍ່ຮ່ວມມື ແລະ ສະໜັບສະໜູນເຊິ່ງກັນແລະກັນໃນການເຄື່ອນໄຫວຢູ່ເວທີລັດຖະສະພາພາກພື້ນ ແລະ ສາກົນ.

ສປປລາວ ແລະ ລາຊະອານາຈັກມາຣົກ ສ້າງຕັ້ງສາຍພົວພັນການທູດນຳກັນ ໃນວັນທີ 30 ມັງກອນ 1997.

(ນາງ ກຸກກິກ ບຸດດາໄຊ)