(ສພຊ) – ຕອນແລງວັນເສົາທີ 19 ຕຸລາຜ່ານມາ ທີ່ຫໍປະຊຸມແຫ່ງຊາດ, ທ່ານ ຄຳແພງ ວິລະພັນ ປະທານກໍາມາທິການກົດໝາຍ ພ້ອມດ້ວຍຄະນະ ໄດ້ພົບປະທ່ານ ຊົວ ຣາມິສ ໂອກລູ ຊູກູຣອບ (Zaur Ramiz Oglu SHUKUROV) ສະມາຊິກສະພາແຫ່ງຊາດ ແຫ່ງ ສາທາລະນະລັດ ອາແຊກໄບຊານ ໃນໂອກາດທີ່ເຂົ້າຮ່ວມກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຫຼື ໄອປາ ຄັ້ງທີ 45 ທີ່ ສປປລາວ ເປັນເຈົ້າພາບ.

ການພົບປະຄັ້ງນີ້ ສອງຝ່າຍໄດ້ປຶກສາຫາລືກັນເພື່ອຊຸກຍູ້ເພີ່ມທະວີສາຍພົວ ພັນມິດຕະພາບ ແລະ ການຮ່ວມມືລະຫວ່າງສອງປະເທດ ກໍຄືສອງອົງການນິຕິບັນຍັດ ລາວ-ອາແຊກໄບຊານ ໃຫ້ນັບມື້ນັບຂະຫຍາຍຕົວຍິ່ງໆຂຶ້ນ; ນັບແຕ່ ສປປລາວ ແລະ ສ.ອາແຊກໄບຊານ ສ້າງຕັ້ງສາຍພົວພັນການທູດນຳກັນໃນວັນທີ 22 ພຶດສະພາ 1995 ເປັນຕົ້ນມາ, ສະພາແຫ່ງຊາດລາວ ແລະ ສະພາແຫ່ງຊາດອາແຊກໄບຊານ ໄດ້ມີການພົວພັນ ແລະ ຮ່ວມມືທີ່ດີນໍາກັນ ເຖິງແມ່ນວ່າຍັງບໍ່ທັນມີການແລກປ່ຽນຄະ ນະຜູ້ແທນຂັ້ນສູງ ແລະ ຂັ້ນຕ່າງໆນຳກັນເທົ່າທີ່ຄວນ ແຕ່ກໍໄດ້ມີການແລກປ່ຽນຂໍ້ມູນຂ່າວສານ, ສົ່ງສານອວຍພອນ ແລະ ສານຊົມເຊີຍໃນໂອກາດວັນສຳຄັນຕ່າງໆ ແລະ ມີການພົບປະກັນໃນໂອກາດກອງປະຊຸມລັດຖະສະພາລະດັບພາກພື້ນ ແລະ ສາກົນ. ສອງຝ່າຍໄດ້ສະເໜີບາງທິດທາງແຜນການພົວພັນ ແລະ ຮ່ວມມືໃນຕໍ່ໜ້າ ເປັນຕົ້ນແລກປ່ຽນຄະນະຜູ້ແທນທີ່ຕິດພັນກັບການແລກປ່ຽນປະສົບການທີ່ດີໃນການປະຕິບັດພາລະບົດບາດຂອງອົງການນິຕິບັນຍັດ ແລະ ບັນຫາອື່ນໆທີ່ມີຄວາມສົນໃຈຮ່ວມກັນ; ແລກປ່ຽນໄປມາຫາສູ່ລະຫວ່າງປະຊາຊົນດ້ວຍກັນ, ໂຄສະນາເຜີຍ ແຜ່ຂໍ້ມູນຂ່າວສານ ແລະ ທ່າແຮງຂອງປະເທດຕົນ; ສືບຕໍ່ໃຫ້ການສະໜັບສະໜູນເຊິ່ງກັນແລະກັນໃນເວທີລັດຖະສະພາພາກພື້ນ ແລະ ສາກົນ.

(ນາງ ກຸກກິກ ບຸດດາໄຊ)