(ສພຊ) – ເພື່ອເປັນການປະກອບສ່ວນອັນສຳຄັນເຂົ້າໃນການເສີມຂະຫຍາຍການພົວພັນມິດຕະພາບ ແລະ ການຮ່ວມມືລະຫວ່າງ ສປປລາວ ແລະ ລາຊະອານາຈັກນອກແວ ໃຫ້ໄດ້ຮັບການພັດທະນາ ແລະ ເສີມຂະຫຍາຍຢ່າງບໍ່ຢຸດຢັ້ງ ເວົ້າລວມ, ເວົ້າສະເພາະ ແມ່ນລະຫວ່າງສອງອົງການນິຕິບັນຍັດຂອງ 2 ປະເທດ; ຕອນເຊົ້າວັນທີ 19 ຕຸລາ 2024 ທີ່ຫໍປະຊຸມແຫ່ງຊາດ, ທ່ານ ສັນຍາ ປຣະເສີດ ປະທານກຳມາທິການການຕ່າງປະເທດ, ປະທານຄະນະມິດຕະພາບລັດຖະສະພາລາວ-ອີຢູ ພ້ອມດ້ວຍຄະນະ ໄດ້ພົບປະ ແລະ ເຮັດວຽກຮ່ວມກັບທ່ານ ນາງ ອາສະລາກ ເຊັມ-ຈາຄັອບເຊັນ (Aslaug Sem-Jacobsen) ສະມາຊິກລັດຖະສະພາ ແຫ່ງ ລາຊະອານາຈັກນອກແວ ໃນໂອກາດທີ່ນຳພາຄະນະຜູ້ແທນເຂົ້າຮ່ວມກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຫຼື ໄອປາ ຄັ້ງທີ 45 ທີ່ ສປປລາວ ເປັນເຈົ້າພາບ.
ສປປລາວ ແລະ ລາຊະອານາຈັກນອກແວ ໄດ້ສ້າງຕັ້ງສາຍພົວພັນການທູດນໍາກັນໃນວັນທີ 12 ພະຈິກ 1991, ສະພາແຫ່ງຊາດລາວ ແລະ ລັດຖະສະພານອກແວ ກໍມີການພົວພັນຮ່ວມມືນໍາກັນຢ່າງປົກກະຕິ ເຊິ່ງມີການພົບປະໃນໂອກາດເຂົ້າຮ່ວມກອງປະຊຸມສາກົນ, ມີການແລກປ່ຽນສານຊົມເຊີຍ ແລະ ສານອວຍພອນໃນໂອກາດວັນສຳຄັນຕ່າງໆຂອງ 2 ປະເທດ, ສອງຝ່າຍຮ່ວມມືນໍາກັນໃນເວທີລັດຖະສະພາພາກພື້ນ ແລະ ສາກົນ ເປັນຕົ້ນແມ່ນເວທີ AIPA, ASEP, IPU ແລະ ອົງການອື່ນໆ; ປີ 1998 ອະດີດປະທານສະພາແຫ່ງຊາດລາວ ໄດ້ຢ້ຽມຢາມປະເທດນອກແວ, ສອງອົງການນິຕິບັນຍັດ ກໍບໍ່ໄດ້ມີການແລກປ່ຽນຄະນະຜູ້ແທນນໍາກັນເທື່ອ. ສະນັ້ນ, ໃນການພົບປະ, ສອງຝ່າຍຈຶ່ງສະເໜີຊຸກຍູ້ໃຫ້ສອງອົງການນີຕິບັນຍັດລາວ-ນອກແວ ມີການແລກປ່ຽນການຢ້ຽມຢາມຂອງຄະນະຜູ້ແທນຂັ້ນສູງ, ກຳມາທິການ, ຄະນະເລຂາທິການ ແລະ ຄະນະມິດຕະພາບລັດຖະສະພາຂອງສອງປະເທດ ເປັນປົກກະຕິນໍາກັນ; ຊຸກຍູ້ ແລະ ສົ່ງເສີມໃຫ້ລັດຖະບານຂອງສອງປະເທດ ເອົາໃຈໃສ່ຈັດຕັ້ງປະຕິບັດການຕົກລົງເຫັນດີນໍາກັນໃຫ້ມີປະສິດທິຜົນດີ; ສືບຕໍ່ຮ່ວມມື, ຊ່ວຍເຫຼືອ ແລະ ສະໜັບສະໜູນເຊິ່ງກັນແລະກັນໃນເວທີລັດຖະສະພາພາກພື້ນ ແລະ ສາກົນ.
(ນາງ ໄຊໂສພາພອນ ມິ່ງມຸງຄຸນ)