ຕອນບ່າຍຂອງວັນສຸກ, ວັນທີ 21 ເມສາ 2023, ຢູ່ທີ່ຫ້ອງປະຊຸມສະພາປະຊາຊົນແຂວງ ກໍາມະບານຮາກຖານສະພາປະຊາຊົນແຂວງອຸດົມໄຊ, ໄດ້ປະຖະກະຖາ ມູນເຊື້ອວັນກໍາມະກອນສາກົນ ຄົບຮອບ 137 ປີ(1 ພຶດສະ ພາ 1886-1 ພຶດສະພາ 2023), ໂດຍການເປັນປະທານຂອງສະຫາຍ ນ. ຄໍາພອນ ພິມມະຈັນ ຄະນະບໍລິຫານງານສະຫະພັນກຳມະບານແຂວງ, ຮອງປະທານສະພາປະຊາຊົນແຂວງ, ມີຮອງປະທານສະພາປະຊາຊົນແຂວງ, ບັນດາທ່ານໃນຄະນະປະຈໍາ, ຄະນະກຳມະບານ ແລະ ສະມາຊິກກໍາມະບານພາຍໃນຮາກຖານສະພາປະຊາຊົນແຂວງເຂົ້າຮ່ວມ.

ຈຸດປະສົງ, ເພື່ອເປັນການໂຄສະນາໃຫ້ແກ່ສະມາຊິກກໍາມະບານໃຫ້ຮັບຮູ້, ເຂົ້າໃຈກ່ຽວກັບມູນເຊື້ອ, ປະ ຫວັດຄວາມເປັນມາ, ການເຕີບໃຫຍ່ຂະຫຍາຍຕົວຂອງກໍາມະກອນສາກົນ ຕິດພັນກັບການເຕີບໃຫຍ່ຂະຫຍາຍຕົວຂອງກໍາມະກອນລາວ, ຜົນງານການປະກອບສ່ວນປົກປັກຮັກສາ ແລະ ພັດທະນາປະເທດຊາດ ຂອງຊົນຊັ້ນກໍາມະກອນລາວ ແລະ ອື່ນໆ.   

ພ້ອມນັ້ນ, ໃນຕອນເຊົ້າຂອງວັນເສົາ, ວັນທີ 22 ເມສາ 2023, ຢູ່ອ້ອມຂ້າງສຳນັກງານ ເຮັດວຽກຂອງສະພາປະຊາຊົນແຂວງ ກໍາມະບານຮາກຖານສະພາປະຊາຊົນແຂວງອຸດົມໄຊ, ໄດ້ອອກແຮງງານ ແລະ ອະນາໄມລວມອ້ອມຂ້າງສຳນັກງານ ນໍາໂດຍສະຫາຍ ນ. ຄໍາພອນ ພິມມະຈັນ ຄະນະບໍລິຫານງານສະຫະພັນກຳມະບານແຂວງ, ຮອງປະທານສະພາປະຊາຊົນແຂວງ, ມີສະຫາຍ ຄໍາດີ ວົງລ້ອມ ຮອງເລຂາພັກແຂວງ, ປະທານສະພາປະຊາຊົນແຂວງ, ບັນດາທ່ານໃນຄະນະປະຈໍາ, ຄະນະກຳມະບານ ແລະ ສະມາຊິກກໍາມະບານພາຍໃນຮາກຖານສະພາປະຊາຊົນແຂວງເຂົ້າຮ່ວມຢ່າງພ້ອມພຽງ.

ຈຸດປະສົງ, ກໍ່ເພືອເປັນການປະຕິບັດຕາມແຈ້ງການແນະນໍາຂອງສະຫະພັນກໍາມະບານແຂວງ, ສະບັບເລກທີ 295/ສກຂ, ລົງວັນທີ 13 ເມສາ 2023 ເລື່ອງການສະເຫຼີມສະຫຼອງວັນກໍາມະກອນສາກົນ ຄົບຮອບ 137 ປີ(1 ພຶດສະ ພາ 1886-1 ພຶດສະພາ 2023) ໃຫ້ມີເນື້ອໃນເລິກເຊິ່ງ, ບັນລຸຕາມຈຸດປະສົງ, ຄາດໝາຍ ແລະ ເປັນຂະບວນຟົ້ດຟື້ນໃນທົ່ວແຂວງ.