ອີງຕາມການລາຍງານຂອງທ່ານ ຄໍາແສນ ພະສະແຫວງ ຫົວໜ້າພະແນກພະລັງງານ ແລະ ບໍ່ແຮ່ແຂວງເຊກອງ ຕໍ່ກອງປະຊຸມສະໄໝສາມັນ ເທື່ອທີ 4 ຂອງສະພາປະຊາຊົນແຂວງ ເຊກອງ ຊຸດທີ II ວ່າ: ເວລາໃດ ຂະແໜງພະແນກພະລັງງານ ແລະ ບໍ່ແຮ່ແຂວງ ປະສານສົມທົບກັບ ລັດວິສາຫະກິດໄຟຟ້າລາວສາຂາແຂວງເຊກອງ ເອົາໃຈໃສ່ຊຸກຍູ້ ແລະ ນໍາພາ-ຊີ້ນໍາສະມາຊິກພັກ, ພະນັກງານ-ລັດຖະກອນປະຕິບັດໜ້າທີ່ວຽກງານວິຊາການ-ວິຊາສະເພາະຂອງຕົນ ໂດຍໄດ້ເອົາໃຈໃສ່ຕໍ່ການຂະຫຍາຍຕາຂ່າຍໄຟຟ້າເຂົ້າຫາປະຊາຊົນຢູ່ເຂດຊົນນະບົດຫ່າງໄກສອກຫຼີກເພື່ອໃຫ້ປະຊາຊົນໄດ້ຊົມໃຊ້ກະແສໄຟຟ້າຢ່າງທົ່ວເຖິງ.

         ທົ່ວແຂວງເຊກອງ ມີລະບົບຕາຂ່າຍໄຟຟ້າ 22 KV (ກິໂລໂວນ) ຄວາມຍາວທັງໝົດ 942,43 Km (ກິໂລແມັດ); ຕາຂ່າຍ 12,7 KV ຄວາມຍາວ 29,89 Km; ຕາຂ່າຍ 0,23 KV ຄວາມຍາວ 1,65 Km; ຕາຂ່າຍ 0,4 KV ຄວາມຍາວ 423,27 Km; ໝໍ້ແປງ 600 ໜ່ວຍ, ມີກໍາລັງຕິດຕັ້ງ 82,77 KVA (ກິໂລໂວນອໍາແປ); ມີໝໍ້ນັບໄຟທັງໝົດ 20.460 ໜ່ວຍ; ມີບ້ານທີ່ຊົມໃຊ້ໄຟຟ້າໃນລະບົບ 164 ບ້ານ 18.305 ຫຼັງຄາເຮືອນ ກວມເອົາ 85,29% ທຽບໃສ່ຫຼັງຄາເຮືອນທົວແຂວງ (21.461 ຫຼັງຄາເຮືອນ).

           ທ່ານ ຄໍາແສນ ພະສະແຫວງ ໃຫ້ຮູ້ຕື່ມອີກວ່າ: ປັດຈຸບັນ ແຂວງເຊກອງ ມີໂຄງການພັດທະນາດ້ານພະລັງງານໄຟຟ້າທັງໝົດ 47 ໂຄງການ ໃນນີ້ຂັ້ນສູນກາງຄຸ້ມຄອງມີ 16 ໂຄງການ ແລະ ຂັ້ນແຂວງຄຸ້ມຄອງ 31 ໂຄງການ; ເຊິ່ງບັນດາໂຄງການດັ່ງກ່າວ ໄດ້ມີສັນຍາສໍາປະທານ (CA) 10 ໂຄງການ; ມີສັນຍາພັດທະນາໂຄງການ (PDA) 14 ໂຄງການ ແລະ ມີບົດບັນທຶກຄວາມເຂົ້າໃຈ (MOU) 23 ໂຄງການ.

—

ຂ່າວ: ສັນຍາ

ພາບ: ນາລີວັນ.