ວັນທີ 14 ສິງຫາ 2024 ສະມາຊິກສະພາແຫ່ງຊາດ (ສສຊ) ຊຸດທີ IX ປະຈຳເຂດເລືອກຕັ້ງທີ 1 ນະຄອນຫຼວງວຽງຈັນ (ນວ) ແລະ ສະມາຊິກສະພາປະຊາຊົນ ນະຄອນຫຼວງວຽງຈັນ (ສສນວ) ຊຸດທີ II ນໍາໂດຍ ທ່ານ ບຸນທາມ ພຸດທະວົງສາ, ຮອງປະທານ ຄະນະສະມາຊິກສະພາແຫ່ງຊາດ ຊຸດທີ IX ປະຈຳເຂດເລືອກຕັ້ງທີ 1, ຮອງປະທານສະພາປະຊາຊົນ ນວ ຊຸດທີ II ພ້ອມດ້ວຍຄະນະໄດ້ລົງເຄື່ອນໄຫວພົບປະຜູ້ມີສິດເລືອກຕັ້ງ ແລະ ເຜີຍແຜ່ຜົນສຳເລັດກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດຊຸດທີ IX ແລະ ສະພາປະຊາຊົນ ນວ ຊຸດທີ II ພ້ອມທັງຟັງຄຳຄິດເຫັນ ແລະ ຄຳສະເໜີຂອງຜູ້ມີສິດເລືອກຕັ້ງຢູ່ສະໂມສອນເມືອງໄຊທານີ ນວ ຖືກຕ້ອນຮັບຂອງ ທ່ານ ນາງ ດຳດວນ ຈັນທະວົງ, ຮອງເຈົ້າເມືອງໄຊທານີ, ມີບັນດາທ່ານຄະນະນຳເມືອງ ແລະ ພະນັກງານຫຼັກແຫຼ່ງອ້ອມຂ້າງເມືອງເຂົ້າຮ່ວມ.
ໃນການລົງພົບປະຄັ້ງນີ້ ສສຊ-ສສນວ ໄດ້ຮັບຟັງລາຍງານສະພາບກ່ຽວກັບການພັດທະນາເສດຖະກິດ-ສັງຄົມຂອງເມືອງໄຊທານີໃນຜ່ານມາໄດ້ເອົາໃຈໃສ່ໃນການນຳພາ-ຊີ້ນຳວຽກງານພັດທະນາແຕ່ລະດ້ານໃຫ້ມີການເຕີບໃຫຍ່ຂະຫຍາຍຕົວເປັນກ້າວໆ ໂດຍສະເພາະດ້ານເສດຖະກິດເມືອງໄຊທານີຍັງສືບຕໍ່ຂະຫຍາຍຕົວ ລວມຍອດຜະລິດຕະພັນພາຍປີ 2024 ຂະຫຍາຍຕົວປະມານ 6,17% ຄາດຄະເນລວມຍອດລາຍຮັບພາຍໃນເມືອງ ປະມານ 7,48 ຕື້ກວ່າກີບ ສະເລ່ຍຕໍ່ຫົວຄົນ 33,21 ລ້ານກີບຕໍ່ປີ ແລະ ອື່ນໆ. ພາຍຫຼັງທີ່ໄດ້ຮັບຟັງລາຍງານສະພາບລວມການພັດທະນາຂອງ ເມືອງໄຊທານີ, ສສຊ-ສສນວ ໄດ້ຜັດປ່ຽນກັນໂອ້ລົມ ແລະ ເຜີຍແຜ່ຜັນຂະຫຍາຍເນື້ອໃນຜົນສໍາເລັດຂອງກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນ ນວ ຊຸດທີ II ໃຫ້ຜູ້ມີສິດເລືອກຕັ້ງໄດ້ຮັບຮູ້ ແລະ ເຂົ້າໃຈຢ່າງກ້ວາງຂວາງຕໍ່ບັນດາເນື້ອໃນ ແລະ ວຽກງານທີ່ສຳຄັນຕ່າງໆ ພ້ອມນີ້ຍັງໄດ້ນຳເອົາບາງຄຳສະເໜີໃນໂອກາດລົງພົບປະຊາຊົນຜູ້ມີສິດເລືອກຕັ້ງເ ມືອງໄຊທານີ ມາສະເໜີແລກປ່ຽນນຳພາກສ່ວນກ່ຽວຂ້ອງແຕ່ລະຂົງເຂດ ເປັນຕົ້ນ: ບັນຫາປະຊາຊົນສະເໜີຢາກໃຫ້ແກ້ໄຂຫຼາຍທີ່ສຸດກ່ຽວກັບການຄຸ້ມຄອງລາຄາສິນຄ້າເຄືື່ອງອຸປະໂພກ-ບໍລິໂພກ, ສະພາບເສັ້ນທາງ ໂດຍສະເພາະ ຈຸດລອດອຸໂມງທາງລົດໄຟລາວ-ຈີນ ເຂດຜ່ານເມືອງໄຊທານີ ເກີດມີນໍ້າຖ້ວມຂັງໃນລະດູຝົນ ເຮັດໃຫ້ລົດຈັກ-ລົດໃຫຍ່ທີ່ຕໍ່າເດີນທາງໄປມາລຳບາກ ແລະ ໃຫ້ແກ້ໄຂສະພາບນໍ້າຖ້ວມຂັງເຂດບ້ານນາແຄ, ບ້ານໄຊ ຈາກການຖົມດິນຕັນທາງນໍ້າໄຫຼຂອງໂຄງການສ້າງເສັ້ນທາງດ່ວນ ໝາຍເລກ 1 ນວ, ພ້ອມທັງສະເໜີໃຫ້ພາກສ່ວນກ່ຽວຂ້ອງປັບປຸງສ້ອມແປງບັນດາຄອງຊົນລະປະທານທີ່ເປ່ເພ ເພື່ອສະໜອງນໍ້າເຂົ້າໃນການຜະລິດກະສິກຳ ແລະ ສະເໜີໃຫ້ສ້ອມແປງເສັ້ນທາງແຕ່ບ້ານທ່າງອນ-ບ້ານເວີນຄຳ-ບ້ານໂພນໄຊ ເພາະເສັ້ນທາງດັ່ງກ່າວໄດ້ເປ່ເພໜັກສົມຄວນ ແລະ ບັນຫາອື່ນໆຈຳນວນໜຶ່ງທີ່ຕິດພັນກັບສະພາບລວມຂອງການແກ້ໄຂຄວາມຫຍຸ້ງຍາກທາງດ້ານເສດຖະກິດ-ສັງຄົມ ຂອງປະເທດເຮົາພົບພໍ້ຢູ່ປັດຈຸບັນ ເພື່ອແນໃສ່ໃຫ້ພາກສ່ວນກ່ຽວຂ້ອງນຳໄປພິຈາລະນາຄົ້ນຄວ້າ ແລະ ຊອກຫາວິທີການແກ້ໄຂຮ່ວມກັນໃນຕໍ່ໜ້າໃຫ້ຖືກຕ້ອງສອດຄ່ອງຍິ່ງຂຶ້ນ.
