ໃນຕອນເຊົ້າວັນທີ 13 ກັນຍາ 2024 ຜ່ານມາ ທີ່ສະພາປະຊາຊົນແຂວງຈໍາປາສັກ ທ່ານ ສາຍທອງ ໄຊຍະວົງ ປະທານຄະນະສະມາຊິກສະພາແຫ່ງຊາດ ປະເຂດເລືອກຕັ້ງທີ 15, ທັງເປັນປະທານສະພາປະຊາຊົນແຂວງຈໍາປາສັກ ໄດ້ຮັບເຄື່ອງຊ່ວຍເຫຼືອປະເພດອຸປະກອນການສຶກສາປະກອບມີ: ປຶ້ມແບບຮຽນ, ປື້ມຂຽນ, ບິກ, ສໍ ແລະ ບັນທັດ ມູນຄ່າ 5 ລ້ານກວ່າກີບ ຈາກບໍລິສັດ ໂຊກມະຫາຊັບ ຈໍາກັດ ແລະ ບັນດານິສິດເກົ່າ ສສ ຫວຽດນາມ ມອບໃຫ້ແກ່ຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 15 ກໍຄືສະພາປະຊາຊົນແຂວງຈໍາປາສັກ ນຳໄປມອບຕໍ່ຊ່ວຍເຫຼືອໃຫ້ໂຮງຮຽນຫຼາຍແຫ່ງຢູ່ເຂດເລືອກຕັ້ງເມືອງໂຂງ, ແຂວງຈໍາປາສັກ ຕາງໜ້າມອບແມ່ນ ທ່ານ ແກ້ວບັນດິດ ຂັນດາລາຕາງໜ້າໃຫ້ບັນດານິສິດເກົ່ານັກສຶກສາ ສສ ຫວຽດນາມ ແລະ ທ່ານ ຖະໜອມ ວົງສະແຫວງ ຕາງໜ້າບໍລິສັດ ໂຊກມະຫາຊັບ ຈໍາກັດ ມີບັນດາທ່ານສະມາຊິກສະພາແຫ່ງ ປະຈໍາເຂດເລືອກຕັ້ງທີ 15 ແລະ ພາກສ່ວນກ່ຽວຂ້ອງເຂົ້າຮ່ວມໃນພິທີມອບ-ຮັບ.

ທ່ານ ສາຍທອງ ໄຊຍະວົງ ປະທານຄະນະສະມາຊິກສະພາແຫ່ງ ປະຈໍາເຂດເລືອກທີ 15 ໄດ້ກ່າວສະແດງຄວາມຂອບໃຈ ແລະ ຍ້ອງຍໍຊົມເຊີຍຕໍ່ 2 ພາກສ່ວນ ທີ່ເຫັນໄດ້ຄວາມສຳຄັນຂອງວຽກການສຶກສາ ປະກອບສ່ວນໃຫ້ຊ່ວຍເຫຼືອອຸປະກອນການສຶກສາໃນຄັ້ງນີ້. ອຸປະກອນທີ່ໄດ້ຮັບ, ຄະນະສະມາຊິກສະພາແຫ່ງຊາດ ຈະໄດ້ນໍາໄປມອບຕໍ່ໃຫ້ບັນດາໂຮງຮຽນຫຼາຍແຫ່ງ ແລະ ແຈກຢາຍໃຫ້ນັກຮຽນທີ່ມີຄວາມຫຍຸ້ງຍາກ, ຂາດແຄນອຸປະກອນກະສຶກສາ ຢູ່ເຂດເລືອກຕັ້ງເມືອງໂຂງ ໃຫ້ເຂົ້າເຈົ້ານໍາໃຊ້ອຸປະກອນດັ່ງກ່າວເຂົ້າໃນວຽກງານການຮຽນການສອນໃຫ້ປະສິດທິພາບເພີ່ມຂື້ນ. ຕໍ່ກັບການປະກອບສ່ວນໃຫ້ການຊ່ວຍເຫຼືອໃນຄັ້ງນີ້, ເພື່ອເປັນການສະແດງຄວາມຮູ້ບຸນຄູນ ຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 15 ກໍຄືສະພາປະຊາຊົນແຂວງຈໍາປາສັກ ໄດ້ມອບໃບຂອບໃຈໃຫ້ແກ່ 2 ພາກສ່ວນອີກດ້ວຍ.