(ສພຊ) ວັນທີ 3 ພະຈິກ 2023 ທີ່ສະພາແຫ່ງຊາດ ນະຄອນຫຼວງວຽງຈັນ ໄດ້ມີພິທີມອບ-ຮັບ ເຄື່ອງປຣິນເຕີ ຈຳນວນ 5 ເຄື່ອງ ລວມມູນຄ່າ 19 ລ້ານກວ່າກີບ ໂດຍແມ່ນບໍລິສັດ ແທງເກິວິນ ຈຳກັດຜູ້ດຽວ ມອບໃຫ້ແກ່ສະພາແຫ່ງຊາດ ເພື່ອນຳໃຊ້ເຂົ້າໃນວຽກງານລວມຂອງສະພາແຫ່ງຊາດ ເຊິ່ງຕາງໜ້າບໍລິສັດ ມອບໂດຍທ່ານ ດຣ. ຄິມ ຊັງ ຈິກ ຜູ້ອຳນວຍການບໍລິສັດ ແທງເກິວິນ ຈຳກັດຜູ້ດຽວ ແລະ ຕາງໜ້າຮັບໂດຍທ່ານ ປອ. ອາລຸນຍາເດດ ຣາຊະພົນ ຫົວໜ້າກົມບໍລິຫານ-ພິທີການ ຄະນະເລຂາທິການສະພາແຫ່ງຊາດ ພ້ອມດ້ວຍພາກສ່ວນທີ່ກ່ຽວຂ້ອງຂອງທັງສອງຝ່າຍເຂົ້າຮ່ວມເປັນສັກຂີພິຍານ

ໂອກາດດັ່ງກ່າວ, ທ່ານ ປອ. ອາລຸນຍາເດດ ຣາຊະພົນ ໄດ້ຕາງໜ້າໃຫ້ຄະນະເລຂາທິການສະພາແຫ່ງຊາດ ມອບໃບຍ້ອງຍໍຂອງຄະນະເລຂາທິການສະພາແຫ່ງຊາດ ໃຫ້ບໍລິສັດ ແທງເກິວິນ ຈຳກັດຜູ້ດຽວ ທີ່ມີຜົນງານດີເດັ່ນໃນການປະກອບສ່ວນອຸປະຖຳໃນຄັ້ງນີ້.