ບົດລາຍງານຂອງທ່ານ ທອງລຸນ ສີສຸລິດ, ນາຍົກລັດຖະມົນຕີກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ ແລະ ແຜນງົບປະມານ ແຫ່ງລັດ 4 ເດືອນ, ຄາດຄະເນ 6 ເດືອນຕົ້ນປີ ແລະ ທິດທາງແຜນການໃນ 6 ເດືອນທ້າຍປີ 2019 ລາຍງານຕໍ່ ກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ VIII ຄັ້ງວັນທີ 5 ມິຖຸນາ 2019

ຮຽນ: –      ທ່ານ ບຸນຍັງ ວໍລະຈິດ, ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດ ທີ່ເຄົາລົບ ແລະ ນັບຖືຢ່າງສູງ,

–   ທ່ານ ນາງ ປານີ ຢາທໍ່ຕູ້, ປະທານສະພາແຫ່ງຊາດ ທີ່ເຄົາລົບ ແລະ ນັບຖື,

–   ຄະນະປະທານ ກອງປະຊຸມ ທີ່ເຄົາລົບ,

– ບັນດາທ່ານ ຜູ້ນຳພັກ ແລະ ລັດ, ສະມາຊິກສະພາແຫ່ງຊາດ, ບັນດາທ່ານ

ແຂກຜູ້ມີກຽດ ທີ່ນັບຖື ແລະ ຮັກແພງທັງຫຼາຍ.

ຂ້າພະເຈົ້າ ຮູ້ສຶກເປັນກຽດ ແລະ ປິຕິຍິນດີ ເປັນຢ່າງຍິ່ງ ທີ່ໄດ້ຕາງໜ້າລັດຖະບານ ຂຶ້ນລາຍງານສະພາບການຈັດຕັ້ງປະຕິິບັດແຜນພັດທະນາເສດຖະກິດ-ສັງຄົມ ແຫ່ງຊາດ ແລະ ແຜນງົບປະມານ ແຫ່ງລັດ 4 ເດືອນ, ຄາດຄະເນ 6 ເດືອນຕົ້ນປີ ແລະ ທິດທາງແຜນການ ໃນ 6 ເດືອນທ້າຍປີ 2019 ຂອງລັດຖະບານ.

ກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດ VIII ໄດ້ໄຂຂຶ້ນໃນເດືອນພະຈິກ 2018 ທີ່ຜ່ານມາ ແລະ ໄດ້ຮັບຮອງເອົາຫຼາຍເອກະສານສໍາຄັນຂອງລັດຖະບານ  ເປັນຕົ້ນ :

1. ຮັບຮອງເອົາບົດລາຍງານ ຂອງລັດຖະບານ ກ່ຽວກັັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ ປີ 2018 ແລະ ທິດທາງແຜນການ ປີ 2019 ຕາມມະຕິ ສະບັບເລກທີ 99/ສພຊ, ໃນເດືອນພະຈິກ 2018 ຊຶ່ງໄດ້ວາງຄາດໝາຍໃນດ້ານຕ່າງໆ ແລະ ຮັບຮອງເອົາທິດທາງ ແລະ ມາດຕະການ ເພື່ອໃຫ້ລັດຖະບານ ນຳໄປຈັດຕັ້ງປະຕິບັດເພີ່ມເຕີມອີກ 26 ຂໍ້.
2. ຮັບຮອງເອົາບົດລາຍງານ ຂອງລັດຖະບານ ກ່ຽວກັບການຈັດຕັ້ງປະຕິບັດ ແຜນງົບປະມານ ແຫ່ງລັດ 9 ເດືອນ, ຄາດຄະເນປະຕິບັດແຜນໝົດປີ 2018 ແລະ ແຜນການ ປະຈຳປີ 2019 ຕາມມະຕິ ສະບັບເລກທີ 100/ສພຊ, ໃນເດືອນພະຈິກ 2018 ແລະ ກໍໄດ້ຮັບຮອງເອົາມາດຕະການ ຈໍານວນໜຶ່ງ ໃຫ້ລັດຖະບານ ນໍາໄປຈັດຕັ້ງປະຕິບັດ.

ພາຍຫຼັງທີ່ສະພາແຫ່ງຊາດ ໄດ້ອອກມະຕິ ທັງ 2 ສະບັບດັ່ງກ່າວ, ລັດຖະບານ ກໍໄດ້ຖືເອົາ ບັນດາຄາດໝາຍ ແລະ ບັນດາມາດຕະການເຫຼົ່ານັ້ນ ເປັນພື້ນຖານໃນການປະຕິບັດວຽກງານຈຸດສຸມຂອງຕົນ ໂດຍໄດ້ຜັນຂະຫຍາຍ ເຂົ້າໃນແຜນພັດທະນາເສດຖະກິດ-ສັງຄົມ ແຫ່ງຊາດ ປະຈຳປີ 2019 ແລະ ໄດ້ອອກດຳລັດ ສະບັບເລກທີ 560/ນຍ, ໃນເດືອນທັນວາ 2018 ວ່າດ້ວຍການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ ແລະ ແຜນງົບປະມານ ແຫ່ງລັດ ປະຈຳປີ 2019.

ອີງຕາມການປຶກສາຫາລື ແລະ ເປັນເອກະພາບກັບສະພາແຫ່ງຊາດ, ໃນນາມຕາງໜ້າລັດຖະບານ, ຂ້າພະເຈົ້າ ຈະຂໍລາຍງານ ໂດຍສັງເຂບ ຜົນການຈັດຕັ້ງປະຕິບັດມະຕິຂອງສະພາແຫ່ງຊາດ ຂ້າງເທິງ ກໍ່ຄືແຜນພັດທະນາເສດຖະກິດ-ສັງຄົມ ແລະ ແຜນງົບປະມານ ແຫ່ງລັດ ປີ 2019 ຂອງລັດຖະບານ ດັ່ງນີ້:

1. ສະພາບ​ແວດລ້ອມ ​ຂອງພາກພື້ນ ແລະ ສາກົນ

ສະພາບການຂອງພາກພື້ນ ແລະ ສາກົນ ໃນ 4 ເດືອນຜ່ານມາໄດ້ຜັນແປຢ່າງສັບສົນ, ໂດຍສະເພາະແມ່ນບັນຫາເສດຖະກິດ ຂອງໂລກ ທີ່ຍັງບໍ່ທັນຂະຫຍາຍຕົວດີ ແລະ ຄວາມຂັດແຍ່ງທາງດ້ານການຄ້າ ລະຫວ່າງປະເທດມະຫາອຳນາດທາງດ້ານເສດຖະກິດ. ອັດຕາການຂະຫຍາຍຕົວຂອງເສດຖະກິດ ໃນພາກພື້ນຫຼຸດລົງ ຈາກລະດັບ 5,9% ໃນປີ 2018 ມາເປັນ 5,7% ໃນປີ 2019 ແລະ ປະເທດທີ່ກໍາລັງພັດທະນາໃນອາຊີ ຄາດວ່າຈະຂະຫຍາຍຕົວຫຼຸດລົງຈາກລະດັບ 6,4% ໃນປີ 2018 ມາເປັນ 6,2% ໃນປີ 2019. ນະໂຍບາຍປິດລ້ອມທາງການຄ້າ ໃນການສົ່ງອອກນໍ້າມັນ ໃນຕາເວັນອອກກາງ ໄດ້ສົ່ງຜົນໃຫ້ລາຄານໍ້າມັນໃນຕະຫຼາດໂລກ ເພີ່ມສູງຂຶ້ນ.

ສະພາບຂອງພາກພື້ນ ແລະ ສາກົນດັ່ງກ່າວ ໄດ້ສົ່ງຜົນກະທົບທາງກົງ ແລະ ທາງອ້ອມ ຕໍ່ການຄຸ້ມຄອງເສດຖະກິດມະຫາພາກ ຂອງປະເທດເຮົາ ທີ່ມີຄວາມບອບບາງຢູ່ແລ້ວ ໃຫ້ພົບຄວາມທ້າທາຍຂຶ້ນຕື່ມ. ພ້ອມກັນນີ້, ປະເທດຂອງພວກເຮົາ ຍັງໄດ້ຮັບຜົນກະທົບຈາກໄພພິບັດທາງທໍາມະຊາດ ໃນກາງປີ 2018 ເຊິ່ງຕາມການປະເມີນຜົນເສຍຫາຍທັງໝົດມີປະມານ 3.167 ຕື້ກີບ ຫຼື ປະມານ 372 ລ້ານໂດລາສະຫະລັດ, ຊຶ່ງເປັນບັນຫາໜັກໜ່ວງ ແລະ ເພີ່ມຄວາມຕ້ອງການທາງດ້ານງົບປະມານ ທີ່ຈໍາເປັນ ແລະ ເລັ່ງດ່ວນ ເພື່ອມາສຸມໃສ່ແກ້ໄຂ.

1. ສະພາບການພັດທະນາທາງດ້ານເສດຖະກິດ

ໂດຍລວມແລ້ວເຫັນວ່າ ເສດຖະກິດ ຍັງສືບຕໍ່ເຕີບໂຕໃນລະດັບດີ ເມື່ອທຽບກັບປະເທດໃນພາກພື້ນ ແຕ່ຢູ່ໃນຈັງວະທີ່ຊ້າລົງ ຖ້າທຽບໃສ່ຫຼາຍປີຜ່ານມາ. ຂ້າພະເຈົ້າ ຂໍຍົກບາງສະພາບ ທີ່ພົ້ນເດັ່ນ ສຳລັບໄລຍະ 4 ເດືອນ ດັ່ງນີ້:

• ​ຜົນ​ຜະ​ລິດເຂົ້ານາແຊງ ບັນລຸໄດ້ປະ​ມານ 453.230 ໂຕນ ເທົ່າກັບ 10,3% ຂອງແຜນການຜະລິດເຂົ້ານາແຊງ (ມະ​ຕິ​ສະ​ພາ 4,4 ລ້ານໂຕນ), ສາລີອາຫານສັດ ຄາດ​ຄະ​ເນຜົນ​ຜະ​ລິດປະ​ມານ 30.000 ໂຕນ ເທົ່າກັບ 3% ຂອງແຜນການ (ມະ​ຕິ​ສະ​ພາ 1 ລ້ານ​ໂຕນ), ມັນຕົ້ນ ຄາດ​ຄະ​ເນຜົນ​ຜະ​ລິດ​ປະ​ມານ 113.056 ໂຕນ ເທົ່າກັບ 4,9% ຂອງແຜນການ (ມະຕິສະພາ 2,28 ລ້ານ​ໂຕນ). ພ້ອມນີ້, ລັດຖະບານ ໄດ້ສຸມທຶນແກ້ໄຂສະພາບຜົນກະທົບຈາກອຸທົກກະໄພ ໃນປີ 2018 ຜ່ານມາ ໂດຍໄດ້ອະນຸມັດ ເງິນແກ້ໄຂສຸກເສີນໃຫ້ຂະແໜງກະສິກຳ-ປ່າໄມ້ ຈຳນວນ 40 ຕື້ກີບ ແລະ ເງິນຟື້ນຟູໄພພິບັດ ຈຳນວນ 115,52 ຕື້ກີບ, ເຊິ່ງມາຮອດປະຈຸບັນ ທຶນດັ່ງກ່າວ ໄດ້ຖືກຈັດຕັ້ງປະຕິບັດເປັນສ່ວນໃຫຍ່ ແລະ ຈຳນວນໜຶ່ງຢູ່ໃນຂັ້ນຕອນຈັດຊື້-ຈັດຈ້າງ, ຊກຜູ້ປະຕິບັດໂຄງການ ເພື່ອເຮັດໃຫ້ການຜະລິດກ້າວເຂົ້າສູ່ສະພາບປົກກະຕິ.
• ການນໍາເຂົ້າ-ສົ່ງອອກ ບັນລຸໄດ້ 2.573 ລ້ານໂດລາສະຫະລັດ ເທົ່າກັບ 22,7% ຂອງແຜນການ (ມະຕິສະພາ 11.291 ລ້ານໂດລາສະຫະລັດ), ໃນນີ້: ການນໍາເຂົ້າ: ໄດ້ປະມານ 1.217 ລ້ານໂດລາສະຫະລັດ, ເທົ່າ​ກັບ 21% ຂອງແຜນການ (ມະ​ຕິ​ສະ​ພາ 5.775 ລ້ານໂດລາສະຫະລັດ) ເຊິ່ງສິນຄ້າ​ນໍາ​ເຂົ້າ​ສ່ວນ​ໃຫຍ່​ແມ່ນ ນໍ້າມັນ​ເຊື້ອ​ໄຟ, ພາຫະນະ ​ແລະ ຊິ້ນ​ສ່ວນ​ອາ​ໄຫຼ່, ​ເຄື່ອງ​ໃຊ້​ໄຟຟ້າ, ອຸປະກອນ​ກົນ​ຈັກ ​ແລະ ອຸປະກອນ​ກໍ່ສ້າງ; ການສົ່ງອອກ: ປະຕິບັດໄດ້ 1.356 ລ້ານໂດລາສະຫະລັດ ເທົ່າກັບ 24,5 % ຂອງແຜນການ (ມະ​ຕິ​ສະ​ພາ 5.516 ລ້ານໂດລາສະຫະລັດ) ເຊິ່ງສິນຄ້າ​ສົ່ງ​ອອກ ​ຕົ້ນຕໍ​ແມ່ນ ​ໄຟຟ້າ, ​ແຮ່ທາດ, ມັນ​ຕົ້ນ, ຄໍາ​ປະສົມ, ​ເຄື່ອງນຸ່ງ​ຫົ່ມ ​ແລະ ​ເຄື່ອງ​ໃຊ້​ໄຟຟ້າ.
• ການຄຸ້ມຄອງລາຄາສິນຄ້າ ລວມທັງສິນຄ້າປະເພດສະບຽງອາຫານ ເຮັດໄດ້ດີຂຶ້ນ ແລະ ຊ່ວຍເຮັດໃຫ້ລາຄາສິນຄ້າເໜັງຕີງຢູ່ໃນລະດັບປົກກະຕິ ແລະ ສົມເຫດສົມຜົນ ໂດຍສະເພາະໃນໄລຍະເທດສະການຕ່າງໆ. ການຈໍລະຈອນສິນຄ້າ ສາມາດໄປທົ່ວເຖິງໃນຂອບເຂດທົ່ວປະເທດ ເຊິ່ງມີມູນຄ່າທັງໝົດ 15.500 ຕື້ກີບ, ທຽບໃສ່ແຜນປີປະຕິບັດໄດ້ 23,8% ເພີ່ມຂຶ້ນ 11,8% ທຽບໃສ່ໄລະຍະດຽວກັນຂອງປີຜ່ານມາ (ມະຕິສະພາ 64.375 ຕື້ກີບ).
• ການຄຸ້ມຄອງລາຄາສິນຄ້າ ໄດ້ດຳເນີນໄປຄຽງຄູ່ກັບ ການສົ່ງເສີມອຸດສາຫະກໍາປຸງແຕ່ງ ແລະ ຫັດຖະກໍາ ຕິດພັນກັບການຂະຫຍາຍຕະຫຼາດສົ່ງອອກຂອງ ສປປ ລາວ ໃນພາກພື້ນ ແລະ ສາກົນ ແລະ ສາມາດບັນລຸມູນຄ່າການຜະລິດອຸດສາຫະກໍາປຸງແຕ່ງ ແລະ ຫັດຖະກໍາ 3.240​ ຕື້ກີບ ທຽບໃສ່ແຜນປີເທົ່າກັບ 26,1% (ມະ​ຕິ​ສະ​ພາ 12.386 ຕື້​ກີບ) ແລະ ທຽບໃສ່ປີຜ່ານມາ ເພີ່ມຂຶ້ນ 33,6%.  ລັດຖະບານ ໄດ້ສົ່ງເສີມການຜະລິດເປັນສິນຄ້າຕິດພັນກັບຕະຫຼາດ ໂດຍສ້າງຍີ່ຫໍ້ສິນຄ້າ ຂອງ ສປປ ລາວ ໃນນັ້ນ, ອັນພົ້ນເດັ່ນ ແມ່ນການອອກໃບອະນຸຍາດໃຫ້ແກ່ສິນຄ້າໜຶ່ງເມືອງໜຶ່ງຜະລິດຕະພັນ (ODOP) ຈໍານວນ 6 ຫົວໜ່ວຍ, 18 ຜະລິດຕະພັນ, ມາເຖິງປັດຈຸບັນລວມທັງໝົດ 171 ຫົວໜ່ວຍ ແລະ 647 ຜະລິດຕະພັນ.
• ການຈັດຕັ້ງປະຕິບັດຄໍາສັ່ງເລກທີ 15/ນຍ ວ່າດ້ວຍການເພີ່ມທະວີຄວາມເຂັ້ມງວດໃນການຄຸ້ມຄອງ ແລະ ກວດກາການຂຸດຄົ້ນໄມ້, ເຄື່ອນຍ້າຍໄມ້ ແລະ ທຸລະກິດໄມ້ ໄດ້ສືບຕໍ່ດໍາເນີນໄປຢ່າງເຂັ້ມງວດ ໂດຍໄດ້ລົງກວດກາການລະເມີດ ແລະ ຍຸບເລີກໂຮງງານທີ່ຜິດລະບຽບ, ບໍ່ໄດ້ມາດຕະຖານ ເຮັດໃຫ້ສາມາດຫຼຸດຈໍານວນໂຮງງານອຸດສາຫະກໍາໄມ້ລົງເຫຼືອ 1.086 ໂຮງງານ ຈາກຈຳນວນ 1.595 ໃນປີ 2016. ພ້ອມກັນນີ້, ກໍສາມາດສົ່ງເສີມການຜະລິດພາຍໃນ ແລະ ສົ່ງອອກຜະລິດຕະພັນໄມ້ສໍາເລັດຮູບ ທັງໝົດຈໍານວນ 140.800 ແມັດກ້ອນ ເປັນມູນຄ່າ ປະມານ 71,8 ລ້ານໂດລາສະຫະລັດ.
•  ດ້ານພະລັງງານ ແລະ ບໍ່ແຮ່ ແມ່ນສາມາດຜະລິດກະ​ແສ​ໄຟຟ້າ ໄດ້ 7.590 ລ້ານ​ກິ​ໂລ​ວັດ​ໂມງ, ມູນ​ຄ່າປະມານ 3.750 ຕື້​ກີບ, ທຽບ​ໃສ່ໄລຍະດຽວຂອງປີຜ່ານມາ ​ເພີ່​ມຂຶ້ນ 2,3%,​ ທຽບໃສ່​ແຜນການປີປະຕິບັດໄດ້ 22,6 % (ມະ​ຕິ​ສະ​ພາ 33.874 ລ້ານກິໂລວັດໂມງມູນຄ່າ 16.575 ຕື້ກີບ), ໃນນີ້: ສົ່ງອອກຕ່າງປະເທດ 5.740 ລ້ານກິໂລວັດໂມງ ທຽບໃສ່​ໄລ​ຍະ​ດຽວ​ປີ​ຜ່ານ​ມາຫຼຸດລົງ 7,7% ເທົ່າກັບ 23% ຂອງແຜນການ (ມະ​ຕິ​ສະ​ພາ 25.625 ລ້ານກິໂລວັດໂມງ), ມູນ​ຄ່າ 334 ລ້ານໂດລາ ເທົ່າກັບ 23% ຂອງແຜນການ (ມະຕິສະພາ 1.451 ລ້ານໂດລາສະຫະລັດ). ພ້ອມກັນນີ້, ກໍ່ສາມາດຜະລິດແຮ່ທາດ ໄດ້ 3.199 ຕື້ກີບ ເທົ່າກັບ 26,9% ຂອງແຜນການ (ມະຕິສະພາ 11.864 ຕື້ກີບ).
•  ການຊໍາລະສະສາງໂຄງການລົງທຶນຂອງລັດ ໃຫ້ປະຕິບັດຕາມແຜນການ ແລະ ຫຼັກການ ທີ່ເປັນເອກະພາບ ແລະ ມີຄວາມໂປ່ງໃສ ໂດຍໄດ້ຊຳລະໃຫ້ 2.455 ໂຄງ​ການ ຄິດເປັນມູນຄ່າຊຳລະ 1.627,50 ຕື້ກີບ. ໃນປີນີ້, ການຊໍາລະສ່ວນໃຫຍ່ແມ່ນເລັ່ງໃສ່ການຊໍາລະໜີ້ຄ້າງ ແລະ ໂຄງການສືບຕໍ່ເປັນຕົ້ນຕໍ ທີ່ຜ່ານການກວດກາ ແລະ ຢັ້ງຢືນຖືກຕ້ອງ. ສ່ວນທຶນຊ່ວຍເຫຼືອທາງການເພື່ອການພັດທະນາ (ODA) ປະຕິບັດໄດ້ ປະມານ 1.507 ຕື້ກີບ ເທົ່າກັບ 21% ຂອງແຜນການປີ (ມະຕິສະພາ ໝົດປີ 7.113,3 ຕື້ກີບ) ຄາດວ່າໝົດປີ 2019 ຈະສາມາດບັນລຸໄດ້ຕາມແຜນການ.
• ການປັບປຸງຄວາມຍາກງ່າຍ ໃນການດຳເນີນທຸລະກິດ ກໍພວມດຳເນີນໄປຢ່າງຕັ້ງໜ້າ, ຂະແໜງການທີ່ກ່ຽວຂ້ອງ ໄດ້ເອົາໃຈໃສ່ປັບປຸງແກ້ໄຂ ບັນຫາທີ່ກ່ຽວພັນກັບຂະແໜງການຂອງຕົນ. ມາຮອດປະຈຸບັນ ຕີລາຄາໄດ້ວ່າ ໃນ 10 ຕົວຊີ້ວັດ, ສ່ວນໃຫຍ່ ແມ່ນມີຄວາມຄືບໜ້າດີແຕ່ຕົວຊີ້ວັດການຂຶ້ນທະບຽນຊັບສິນ, ຕົວຊີ້ວັດການເຂົ້າເຖິງສິນເຊື່ອ, ຕົວຊີ້ວັດການຊຳລະອາກອນ, ຕົວຊີ້ວັດການບັງຄັບໃຊ້ສັນຍາ ແລະ ຕົວຊີ້ວັດການແກ້ໄຂການລົ້ມລະລາຍ ຍັງບໍ່ທັນມີຄວາມຄືບໜ້າດີເທົ່າທີ່ຄວນ. ອີງຕາມການຄາດຄະເນຂອງລັດຖະບານ, ການຈັດອັນດັບຄວາມຍາກງ່າຍ ໃນການດຳເນີນທຸລະກິດ ຢູ່ ສປປ ລາວ ສຳລັບ ປີ 2020 ອາດຈະບໍ່ປ່ຽນແປງຫຼາຍ, ແຕ່ໜ້າຈະດີຂຶ້ນໃນປີ 2021.
• ການສົ່ງເສີມການລົງທຶນຂອງພາກເອກະຊົນ ພາຍໃນ ແລະ ຕ່າງປະເທດ ຢູ່ສູນກາງ ແລະ ທ້ອງຖິ່ນ ກໍດຳເນີນໄປຢ່າງຕັ້ງໜ້າ ແລະ ສາມາດບັນລຸໄດ້ ຈໍານວນ 1.266 ໂຄງການ ດ້ວຍທຶນຈົດທະບຽນ 4.735 ລ້ານໂດລາສະຫະລັດ ຫຼື ​ປະມານ 30.974 ຕື້​ກີບ (ມະ​ຕິ​ສະ​ພາ 23.086,1 ຕື້​ກີບ), ສຳລັບການນໍາເຂົ້າທຶນຕົວຈິງ ຜ່ານລະບົບທະນາຄານ, ນຳເຂົ້າເປັນວັດຖຸອຸປະກອນ ແລະ ພາຫະນະຮັບໃຊ້ທາງກົງ ມີມູນຄ່າ 1.090 ລ້ານໂດລາສະຫະລັດ ຫຼື ເທົ່າ​ກັບ 8.728 ຕື້​ກີບ ປະມານ 37,8% ຂອງ​ແຜນ​ການ​ປີ.
• ການຄຸ້ມຄອງເງິນຕາ ດຳເນີນໄປຢ່າງຮັດກຸມສົມຄວນ ແລະ ສາມາດຮັກສາໄດ້ ອັດຕາເງິນເຟີ້ ສະເລ່ຍໃນລະດັບ 1,5 % (ມະຕິສະພາໝົດ​ປີ ບໍ່​ເກີນ 5%), ປະລິມານເງິນ M2 ຢູ່ໃນລະດັບ 9 % (ມະຕິສະພາສະ​ເລ່ຍບໍ່ເກີນ 20%), ເງິນ​ກີບ ທຽບ​​ເງິນໂດ​ລາ​ສະຫະລັດ ສະ​ເລ່ຍອ່ອນຄ່າ 0,4 % ​ແລະ ເງິນກີບທຽບກັບເງິນບາດ ອ່ອນຄ່າ 3,4% ທຽບ​ໃສ່ທ້າຍ​​ປີຜ່ານ​ມາ (ມະ​ຕິ​ສະ​ພາ ±5%). ສ່ວນຕ່າງລະຫວ່າງອັດຕາແລກປ່ຽນທະນາຄານທຸລະກິດ ແລະ ຕະຫຼາດ ສໍາລັບເງິນກີບ ທຽບໃສ່ເງິນໂດລາ ສະເລ່ຍຢູ່ໃນລະດັບ 1,7% ແລະ ເງິນກີບທຽບໃສ່ເງິນບາດ ສະເລ່ຍຢູ່ໃນລະດັບ 0,4 %.
• ສິນເຊື່ອຂອງຂະແໜງການທະນາຄານ ຮອດທ້າຍເດືອນ 3/2019 ຢູ່​ໃນ​ລະດັບ 76.030,60 ຕື້ກີບ ເພີ່ມຂຶ້ນ 3,13%  ກວມເອົາ 46,32% ຂອງ GDP (​ແຜນການທ້າ​ຍປີ 2019 ແມ່ນ 55% ຂອງ GDP) ສິນ​ເຊື່ອ​​ແຍກ​ຕາມ​ຂະ​ແໜງການຄື: ກະສິກຳ 10,24%, ອຸດສາຫະກໍາ 28,09%, ບໍລິການ 46,03% ​ແລະ ຂະ​ແໜງອື່ນໆ 15,64%. ສະເພາະສິນເຊື່ອເພື່ອແກ້ໄຂຄວາມທຸກຍາກ ທີ່ທະນາຄານນະໂຍບາຍ ຮອດທ້າຍເດືອນ 3/2019 ມີຍອດ​ເຫຼືອສິນເຊື່ອທັງໝົດ 3.027,23 ຕື້ກີບ, ໃນນັ້ນ ເງິນກູ້ປ່ອຍຢູ່ເມືອງເປົ້າໝາຍທຸກຍາກທັງໝົດ 2.000,02 ຕື້ກີບ, ຈຸດສຸມລັດຖະບານ ແລະ ທ້ອງຖິ່ນທັງໝົດ 312,01 ຕື້ກີບ, ວຽກງານ 3​ ສ້າງມີທັງໝົດ 288,92 ຕື້ກີບ ແລະ ໂຄງການບູລິມະສິດຜະລິດເປັນສິນຄ້າ 426,28 ຕື້ກີບ. ສະເພາະສິນເຊື່ອໃຫ້​ແກ່ວິສາຫະກິດຂະໜາດນ້ອຍ ແລະ ຂະໜາດກາງ ຮອດເດືອນ 03/2019 ​ ​ມີ​ຍອດສິນ​ເຊື່ອ​ທັງໝົດ 14.077,01 ຕື້ກວ່າກີບ ກວມ​ເອົາ 19,52% ຂອງ​ຈຳນວນ​ສິນ​ເຊື່ອ​ທົ່ວ​ລະບົບ. ຄັງສໍາຮອງເງິນຕາຕ່າງປະເທດ ກຸ້ມການນໍາເຂົ້າໄດ້ 3,28 ​ເດືອນ (ມະຕິສະພາ ຫຼາຍກວ່າ 3 ເດືອນຂຶ້ນ​ໄປ​). ໜີ້ບໍ່​ເກີດດອກ​ອອກ​ຜົນ (NPL) ​ຢູ່​ໃນ​ລະ​ດັບ 3,1% ຂອງຍອດ​ສິນ​ເຊື່ອທັງ​ໝົດ (ມະຕິສະພາ ປີ 2019, NPL ແມ່ນບໍ່ໃຫ້ເກີນ 3%).
• ການຈັດຕັ້ງປະຕິບັດ ໂຄງການກໍ່ສ້າງພື້ນຖານໂຄງລ່າງຂະໜາດໃຫຍ່ ດຳເນີນໄປຕາມແຜນການ ເປັນຕົ້ນແມ່ນ: (1) ໂຄງການກໍ່ສ້າງທາງດ່ວນ (ຊ່ວງທີ1) ແຕ່ນະຄອນຫຼວງວຽງຈັນ-ວັງວຽງ ຄວາມຍາວ 109 ກິໂລແມັດ ປັດຈຸບັນ ປັກຫຼັກໝາຍເຂດນະຄອນຫຼວງວຽງຈັນໄດ້ 80% ແລະ ຊົດເຊີຍສິ່ງກີດຂວາງໄດ້ 3,6 ກິໂລແມັດ (2) ການກໍ່ສ້າງທາງລົດໄຟລາວ-ຈີນ ປະຕິບັດໄດ້ 64,2% ຊົດເຊີຍສິ່ງກີດຂວາງມາ​ຮອດ​ໄລ​ຍະ 3 ເດືອນ​ຕົ້ນ​ປີ ໄດ້ 851,53 ຕື້ກີບ.
• ການສົ່ງເສີມປີທ່ອງທ່ຽວ ລາວ-ຈີນ ກໍ່ດຳເນີນໄປຕາມແຜນ ໃນນັ້ນ, ລັດຖະບານໄດ້ສຸມໃສ່ການແກ້ໄຂຂອດອຸດຕັນຕ່າງໆ ເຊັ່ນ : ໄດ້ແຕ່ງຕັ້ງຄະນະແກ້ໄຂບັນຫາທີ່ສະມາຊິກສະພາແຫ່ງຊາດ ໄດ້ສະເໜີກ່ຽວກັບແຫຼ່ງທ່ອງທ່ຽວຢູ່ວັງວຽງ. ໃນໄລຍະ 4 ເດືອນຕົ້ນປີ 2019 ມີນັກທ່ອງທ່ຽວເຂົ້າມາລາວຫຼາຍກວ່າ 1.062.000 ເທື່ອຄົນ ເທົ່າກັບ 23% ຂອງແຜນການປີ, ຫຼຸດລົງຈາກໄລຍະດຽວກັນຂອງປີ 2018 ປະມານ 0,5%.

1. ສະພາບການພັດທະນາທາງດ້ານວັດທະນະທຳ-ສັງຄົມ:

• ໃນຂົງເຂດສຶກສາ ແມ່ນໄດ້ສໍາເລັດການສອບເສັງນັກຮຽນເກັ່ງທົ່ວປະເທດ ໃນລະດັບຊາດ ຊັ້ນມັດທະຍົມຕອນຕົ້ນ-ຕອນປາຍ ມີຜູ້ເຂົ້າຮ່ວມທັງໝົດ 144 ຄົນ, ຍິງ 55 ຄົນ. ສໍາເລັດການກະກຽມການມອບ-ຮັບເອົາແຜນງານອາຫານທ່ຽງ ໃນໂຮງຮຽນ ຈາກອົງການອາຫານໂລກ ຈໍານວນ 515 ໂຮງຮຽນ ແລະ ທະນາຄານໂລກ ຈໍານວນ 312 ໂຮງຮຽນ ໃນເດືອນມິຖຸນາ.
• ສຳລັບຂົງເຂດສາທາລະນະສຸກ ແມ່ນໄດ້ປະກາດບ້ານສາທາລະນະສຸກແບບຢ່າງ 04 ບ້ານ ຂອງເມືອງໜອງແຮດ, ແຂວງຊຽງຂວາງ. ເປີດໃຫ້ບໍລິການໂຮງໝໍມິດຕະພາບຫຼັງໃໝ່, ໄດ້ລົງກວດກາ-ສັ່ງໂຈະ ຄຣີນິກເສີມຄວາມງາມ ທີ່ດຳເນີນການບໍ່ຖືກກົດໝາຍ ຈຳນວນໜຶ່ງ.
• ສ່ວນຂົງເຂດແຮງງານ ແລະ ສະຫວັດດີການສັງຄົມ ແມ່ນໄດ້ສົ່ງເສີມໃຫ້ພາກລັດ ແລະ ເອກະຊົນ ຝຶກອົບຮົມໃນຫົວຂໍ້ຕ່າງໆ ໃຫ້ແຮງງານ ໄດ້ທັງໝົດ 12.707 ຄົນ, ຍິງ 5.260 ຄົນ, ເທົ່າ​ກັບ 8,1 % (ມະ​ຕິ​ສະ​ພາ 155.183 ຄົນ). ສະໜອງແຮງງານ ໃຫ້ພາຍໃນ-ຕ່າງປະເທດໄດ້ 22.350 ຄົນ, ຍິງ 10.883 ຄົນ (ມະ​ຕິ​ສະ​ພາ 119.000 ຄົນ).
• ວຽກງານພັດທະນາຊົນນະບົດຕາມ 4 ເນື້ອໃນ 4 ຄາດໝາຍ ຕິດພັນກັບວຽກງານ 3 ສ້າງ ໄດ້ດຳເນີນ​ຢ່າງ​ແຂງ​ແຮງ ແລະ ກ້າວເຂົ້າສູ່ລວງເລິກ ໂດຍໄດ້ສືບຕໍ່ສຸມໃສ່ຈັດຕັ້ງປະຕິບັດບັນດາແຫຼ່ງທຶນຕ່າງໆ ເຂົ້າໃສ່ 91 ຈຸດສຸມ ນອນໃນ 70 ເມືອງ ຂອງ 18 ແຂວງ ເພື່ອພັດທະນາພື້ນຖານໂຄງລ່າງ ເປັນຕົ້ນ ກໍ່ສ້າງ ແລະ ສ້ອມແປງເສັ້ນທາງລະຫວ່າງເມືອງ ຫາ ບ້ານ, ບ້ານ ຫາ ບ້ານ, ຊົນລະປະທານຂະໜາດນ້ອຍ, ໂຮງຮຽນ, ສຸກສາລາ-ຖົງຢາປະຈໍາບ້ານ, ນໍ້າລິນ, ວິດຖ່າຍ ແລະ ອື່ນໆ; ພ້ອມກັນນັ້ນ,ໄດ້ຝຶກອົບຮົມດ້ານວິຊາການປູກຝັງ, ສົ່ງເສີມການລ້ຽງສັດການເຂົ້າເຖິງແຫຼ່ງທຶນສິນເຊື່ອຕ່າງໆ ແນ່ໃສ່ຊຸກຍູ້ການຜະລິດເປັນສິນຄ້າ ເພື່ອຂາຍອອກສູ່ຕະຫຼາດ ແລະ ສ້າງລາຍຮັບໃຫ້ແກ່ປະຊາຊົນຜູ້ທຸກຍາກ. ພ້ອມກັນນີ້, ລັດຖະບານ ກໍ່ໄດ້ສືບຕໍ່ວຽກງານດ້ານນີ້ ຢ່າງແຂງແຮງ ໂດຍຖືເອົາ ປີ 2019 ເປັນປີລະດົມກຳລັງແຮງທົ່ວສັງຄົມ ແລະ ສ້າງຂະບວນການແຂ່ງຂັນ, ຮັກຊາດ ແລະ ພັດທະນາ ໃນຫົວຂໍ້ ‘‘ ພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ ’’ ເຊິ່ງຈະປະກາດເປີດຂະບວນການແຂ່ງຂັນ ໃນກອງປະຊຸມລັດຖະບານເປີດກວ້າງ ໃນວັນທີ 28 ມິຖຸນາ 2019 ທີ່ຈະມາເຖິງ.
• ການແກ້ໄຂບັນຫາທີ່ດິນ ກໍ່ດຳເນີນໄປດ້ວຍຄວາມຄືບໜ້າດີ ໂດຍໄດ້ປັບປຸງຮ່າງແຜນແມ່ບົດຈັດສັນທີ່ດິນແຫ່ງຊາດ, ກະກຽມການຈັດສັນທີ່ດິນຢູ່ 5 ແຂວງເປົ້າໝາຍຄື: ຫຼວງນໍ້າ ທາ, ບໍ່ແກ້ວ, ບໍລິຄໍາໄຊ, ເຊກອງ ແລະ ອັດຕະປື. ໄດ້ສຳເລັດການພັດທະນາ ແລະ ຄຸ້ມຄອງທີ່ດິນໃຫ້ມີຄວາມທັນສະໄໝ ສາມາດຕິດຕາມກວດກາຄືນ ບັນດາຂໍ້ມູນການເຊົ່າ-ສຳປະທານທີ່ດິນ ທົ່ວປະເທດ. ໄດ້ແຕ່ງຕັ້ງຄະນະກວດກາ ຈຳນວນ 438 ໂຄງການ ທີ່ເຊົ່າ-ສຳປະທານທີ່ດິນ ເພື່ອຈຳກັດ ແລະ ແກ້ໄຂບັນດາໂຄງການທີ່ ບໍ່ມີຄວາມຄືບໜ້າ, ຈັບຈອງເນື້ອທີ່ດິນ ຖ່ວງດຶງເວລາ, ບໍ່ປະຕິບັດພັນທະ, ມີຜົນກະທົບຕໍ່ສິ່ງແວດລ້ອມ ແລະ ບໍ່ດຳເນີນການຕາມສັນຍາ.ໃນຕໍ່ໜ້າ ທຸກການເຊົ່າ-ສຳປະທານທີ່ດິນ ແມ່ນໃຫ້ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ສຳຫຼວດວັດແທກ, ອອກແຜນທີ່ດິນລັດ ຫັນເອົາເຂົ້າລະບົບທັນສະໄໝ ເພື່ອເປັນບ່ອນອີງໃຫ້ກະຊວງການເງິນ ເກັບລາຍຮັບ ທັນກັບສະພາບການ.

1. ສະພາບວຽກງານດ້ານປ້ອງກັນຊາດ ແລະ ປ້ອງກັນຄວາມສະຫງົບ

ສາມາດຮັກສາຄວາມສະຫງົບ, ຄວາມເປັນລະບຽບຮຽບຮ້ອຍ ຂອງສັງຄົມ ໂດຍພື້ນຖານ ແລະ ສະຖຽນລະພາບທາງດ້ານການເມືອງ ຢ່າງໜັກແໜ້ນ, ສ້າງເງື່ອນໄຂອໍານວຍຄວາມສະດວກໃຫ້ແກ່ການພັດທະນາປະເທດຊາດ. ພ້ອມກັນນີ້, ກໍ່ໄດ້ສືບຕໍ່ເອົາໃຈໃສ່ເປັນພິເສດຕໍ່ການແກ້ໄຂບັນຫາຢາເສບຕິດ, ອຸບັດຕິເຫດຕາມທ້ອງຖະໜົນ ແລະ ປະກົດການຫຍໍ້ທໍ້ຕ່າງໆ ທາງສັງຄົມ ໂດຍສືບຕໍ່ຈັດຕັ້ງຜັນຂະຫຍາຍ ຄໍາສັ່ງ 27/ນຍ, ລົງວັນທີ 05/10/2011 ວ່າດ້ວຍການສະກັດກັ້ນ, ແກ້ໄຂປະກົດການຫຍໍ້ທໍ້ໃນສັງຄົມ, ຄໍາສັ່ງ 22/ຄລສພ, ລົງວັນທີ 10/8/2012 ວ່າດ້ວຍການເພີ່ມທະວີວຽກງານສະກັດກັ້ນ ແລະ ຕ້ານຢາເສບຕິດ.

1. ດ້ານລາຍຮັບ: ສາມາດບັນລຸໄດ້ ປະມານ 6.320 ຕື້ກີບ ເທົ່າກັບ 24% ຂອງແຜນການປີ, ລາຍຮັບພາຍໃນ ປະຕິບັດໄດ້ 6.242,50 ຕື້ກີບ ເທົ່າກັບ 25,7% ຂອງແຜນການປີ, ລາຍຮັບຈາກການຊ່ວຍເຫຼືອລ້າ ປະຕິບັດໄດ້ 78,8 ຕື້ກີບ ເທົ່າກັບ 3,8% ຂອງແຜນການປີ.
2. ດ້ານລາຍຈ່າຍ: ສາ​ມາດປະຕິບັດ​ໄດ້ 6.668 ຕື້​ກີບ  ເທົ່າກັບ 19,9 % ຂອງແຜນການປີໃນ​ນີ້ ສູນກາງປະຕິບັດໄດ້ 4.727 ຕື້ກີບ ເທົ່າກັບ 19,6 % ຂອງແຜນການປີ ແລະ ທ້ອງຖິ່ນປະຕິບັດໄດ້ 1.941 ຕື້ກີບ ເທົ່າກັບ 20,8 % ຂອງແຜນການປີ. ສະເພາະລາຍ​ຈ່າຍ​ເງິນ​ເດືອນ ແລະ ເງິນອຸດໜູນ 3.479 ຕື້ກີບ ເທົ່າກັບ 31,4% ຂອງແຜນການປີ ແລະ ລາຍຈ່າຍພາກປົກກະຕິອື່ນໆ ເຊັ່ນ: ເງິນບໍລິຫານ-ຊື້ໃໝ່ ແມ່ນຢູ່ໃນລະດັບ 10,7% ຂອງແຜນການປີ. ລາຍຈ່າຍຊໍາລະໜີ້ສິນພາຍໃນ  ແລະ ຕ່າງປະເທດ ປະຕິບັດຢູ່ໃນລະດັບ 24,6% ຂອງແຜນການປີ, ລາຍຈ່າຍລົງທຶນພາຍໃນ ແລະ ຕ່າງປະເທດ ປະຕິບັດໄດ້ 13% ຂອງແຜນການປີ.
3. ການດຸ່ນດ່ຽງ: ຜ່ານການຈັດຕັ້ງປະຕິບັດແຜນລາຍຮັບ – ລາຍຈ່າຍງົບປະມານແຫ່ງລັດ 04 ເດືອນ ທີ່ຜ່ານມາ ແມ່ນມີການຂາດດຸນ 347 ຕື້ກີບ, ນອກຈາກນີ້ ຍັງມີການທົດແທນຄືນຕົ້ນທຶນໜີ້ສິນພາຍໃນ ແລະ ຕ່າງປະເທດ ຢູ່ແຫຼ່ງດຸ່ນດ່ຽງ 2.432 ຕື້ກີບ, ການລະດົມທຶນ ເພື່ອມາດຸ່ນດ່ຽງງົບປະມານຈາກພາຍໃນ ແລະ ຕ່າງປະເທດ ແມ່ນສາມາດປະຕິບັດໄດ້ 3.453 ຕື້ກີບ ເທົ່າກັບ 19,6 % ຂອງແຜນການປີ.

ແຕ່ນີ້ຮອດ ທ້າຍເດືອນ 6 ປີ 2019 ລັດຖະບານ ຈະສືບຕໍ່ຈັດຕັ້ງປະຕິບັດວຽກຈຸດສຸມທີ່ໄດ້ກໍານົດໃນດໍາລັດ ເລກທີ 560/ນຍ ວ່າດ້ວຍການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ ແລະ ແຜນງົບປະມານແຫ່ງລັດ ປະຈໍາປີ 2019 ກໍ່ຄືມະຕິຂອງສະພາແຫ່ງຊາດ ສະບັບເລກທີ 99/ສພຊ ແລະ 100/ສພຊ. ພ້ອມກັນນີ້, ກໍ່ຄາດຄະເນການຈັດຕັ້ງປະຕິບັດແຜນງົບປະມານແຫ່ງລັດ 6 ເດືອນຕົ້ນ ປີ 2019 ດັ່ງນີ້:

1. ດ້ານລາຍຮັບ: ອີງຕາມແຜນການ 6 ເດືອນຕົ້ນປີ ທີ່ວາງໄວ້ໃນເບື້ອງຕົ້ນ ປະມານ 12.658 ຕື້ກີບ ເທົ່າກັບ 48,1% ແຕ່ຜ່ານການຈັດຕັ້ງປະຕິບັດຕົວຈິງ ໃນໄລຍະ 4 ເດືອນຜ່ານມາ ແລະ ອີງຕາມຖານຂໍ້ມູນລາຍຮັບ ຄາດວ່າຈະ​ປະ​ຕິ​ບັດໄດ້ 12.965 ຕື້​ກີບ, ເທົ່າ​ກັບ 49,2% ຂອງແຜນການປີ, ໃນນັ້ນ: ລາຍຮັບພາຍໃນ 12.128 ຕື້ກີບ, ເທົ່າກັບ 50% ຂອງແຜນການ ເຊິ່ງໄດ້ມາຈາກ: ລາຍຮັບສ່ວຍສາອາກອນ 5.918 ຕື້ກີບ ເທົ່າກັບ 48% ຂອງແຜນການປີ, ລາຍຮັບພາສີ 3.760 ຕື້ກີບ ເທົ່າກັບ 50% ຂອງແຜນການປີ, ຄຸ້ມຄອງວິສາຫະກິດລັດລົງທຶນ ແລະ ປະກັນໄພ 1.410 ຕື້ກີບ ເທົ່າກັບ 60% ຂອງແຜນການປີ, ລາຍຮັບຊັບສິນຂອງລັດ 1.038 ຕື້ກີບ ເທົ່າກັບ 50,07% ຂອງແຜນການປີ ແລະ ລາຍຮັບອື່ນໆ 1,3 ຕື້ກີບ ແລະ ລາຍຮັບຈາກການຊ່ວຍເຫຼືອລ້າ 834 ຕື້ກີບ, ເທົ່າກັບ 40% ຂອງແຜນການປີ.
2. ດ້ານລາຍຈ່າຍ: ອີງຕາມແຜນການ 6 ເດືອນຕົ້ນປີທີ່ວາງໄວ້ເບື້ອງຕົ້ນ ປະມານ 17.689 ຕື້ກີບ ເທົ່າກັບ 53% ແຕ່ຜ່ານການຈັດຕັ້ງປະຕິບັດຕົວຈິງໃນໄລຍະ 4 ເດືອນຜ່ານມາ ແລະ ອີງຕາມຖານຂໍ້ມູນລາຍຈ່າຍທີ່ມີຢູ່ ຄາດວ່າຈະປະຕິບັດໄດ້ 14.127 ຕື້ກີບ, ເທົ່າກັບ 42% ຂອງແຜນການປີ, ໃນ​ນັ້ນ: ລາຍ​ຈ່າຍ​ເງິນ​ເດືອນ ແລະ ເງິນອຸດໜູນ ປະມານ 5.500 ຕື້ກີບ, ເທົ່າກັບ 49% ຂອງແຜນການປີ, ລາຍຈ່າຍເງິນບໍລິຫານ-ຊື້ໃໝ່ ຢູ່ໃນລະດັບ 27,6%, ຊໍາລະໜີ້ສິນພາຍໃນ ແລະ ຕ່າງປະເທດ ຢູ່ໃນລະດັບ 60% ຂອງແຜນການປີ ແລະ ລາຍຈ່າຍລົງທຶນພາຍໃນ ແລະ ຕ່າງປະເທດ ຢູ່ໃນລະດັບ 40,3% ຂອງແຜນການປີ.
3. ດ້ານການດຸ່ນດ່ຽງ: ຈະຂາດດຸນງົບປະມານ ແຫ່ງລັດ ປະມານ 1.162 ຕື້ກີບ. ນອກຈາກນີ້ ຍັງມີແຜນການທົດແທນຄືນຕົ້ນທຶນໜີ້ສິນພາຍໃນ ແລະ ຕ່າງປະເທດ ຢູ່ແຫຼ່ງດຸ່ນດ່ຽງ 4.711 ຕື້ກີບ,  ລວມຄວາມຕ້ອງການແຫຼ່ງທຶນ ເພື່ອມາດຸ່ນດ່ຽງງົບປະມານ 5.875,8 ຕື້ກີບ. ຕາມການຄາດຄະເນເບື້ອງຕົ້ນ ໃນການລະດົມທຶນ ເພື່ອມາດຸ່ນດ່ຽງງົບປະມານ ຈາກພາຍໃນ ແລະ ຕ່າງປະເທດ ຈະປະຕິບັດໄດ້ປະມານ  6.855,6 ຕື້ກີບ  ເທົ່າ​ກັບ 38,9% ຂອງ​ແຜນ​ການ​ປີ ຄື: ດຸ່ນດ່ຽງຈາກພາຍໃນ ຈໍານວນ 2.197,4 ຕື້ກີບ ເທົ່າກັບ 34,5% ຂອງແຜນການປີ; ດຸ່ນດ່ຽງຈາກຕ່າງປະເທດຈໍານວນ 4.658 ຕື້ກີບ ເທົ່າກັບ 41,3% ຂອງແຜນການປີ.

ຮຽນ: ບັນດາທ່ານ ສະມາຊິກສະພາແຫ່ງຊາດ ທີ່ນັບຖື.

ລັດຖະບານ ຕີລາຄາ ສະພາບການຈັດຕັ້ງປະຕິບັດ 4 ເດືອນ ແລະ ການຄາດຄະເນຄວາມອາດສາມາດໃນການຈັດເກັບລາຍຮັບ ພາຍໃນ 06 ເດືອນຕົ້ນປີ 2019 ກໍ່ເຫັນວ່າ ຈະສາມາດບັນລຸໄດ້ 50% ຂອງແຜນການປີ. ພ້ອມກັນນັ້ນ, ໝົດປີ 2019 ຄາດຄະເນວ່າ ຈະສູ້ຊົນຈັດເກັບລາຍຮັບພາຍໃນ ໃຫ້ບັນລຸຕາມແຜນທີ່ສະພາແຫ່ງຊາດ ຮັບຮອງ, ສໍາລັບດ້ານລາຍຈ່າຍ ກໍໍ່ຈະຄຸ້ມຄອງຢ່າງປະຢັດ ແລະ ຮັດກຸມ ບໍ່ໃຫ້ເກີນເພດານທີ່ໄດ້ຮັບຮອງຈາກສະພາແຫ່ງຊາດ.

ເຖິງຢ່າງໃດກໍຕາມ, ລັດຖະບານ ກໍໍຍັງຕີລາຄາວ່າ ເຖິງແມ່ນວ່າ ໂດຍລວມສະພາບການພັດທະນາທາງດ້ານເສດຖະກິດ ຍັງສືບຕໍ່ຂະຫຍາຍຕົວ ໃນລະດັບ 6.5%,  ເຊິ່ງຖືເປັນອັດຕາການເຕີບໂຕທີ່ສູງ ເມື່ອທຽບກັບຫຼາຍປະເທດໃນພາກພື້ນ, ແຕ່ເປັນອັດຕາທີ່ຊ້າລົງ ເມື່ອທຽບຫລາຍປີຜ່ານມາ. ການເຕີບໂຕຂອງເສດຖະກິດຊ້າລົງ ແມ່ນຍ້ອນ: ການປະກອບສ່ວນຂອງຂະແໜງພະລັງງານ ແລະ ບໍ່ແຮ່ ຫຼຸດລົງ, ຂະແໜງກະສິກຳ ຖືກກະທົບຈາກໄພພິບັດ ທາງທໍາມະຊາດ, ແຕ່ອັນດີ ແມ່ນຂະແໜງບໍລິການ ຂະຫຍາຍຕົວໄວຂຶ້ນ.

ພ້ອມກັນນີ້, ລັດຖະບານ ກໍຍັງຕີລາຄາວ່າ: ເສດຖະກິດມະຫາພາກ ຂອງພວກເຮົາ ກໍຍັງມີຄວາມບອບບາງ ແລະ ສ່ຽງຕໍ່ສະພາບກະທົບຈາກພາຍນອກ ເນື່ອງຈາກວ່າ ບັນຫາທີ່ສະສົມມາຫຼາຍປີ ຍັງບໍ່ສາມາດແກ້ໄຂໄດ້ ຢ່າງຂາດຕົວ ໃນເວລາອັນສັ້ນໆໄດ້ ເປັນຕົ້ນແມ່ນ: ບັນຫາການຂາດດຸນງົບປະມານຊໍ້າເຮື້ອ, ໜີ້ສິນພາຍໃນ ແລະ ຕ່າງປະເທດ ທີ່ສະສົມມາຫຼາຍ, ຄັງສໍາຮອງເງິນຕາຕ່າງປະເທດຕໍ່າ, ການເກັບລາຍຮັບ ຍັງບໍ່ທັນຄົບຖ້ວນ ແລະ ຊັດເຈນ, ການສົ່ງເສີມການຜະລິດສິນຄ້າ ແລະ ການພັດທະນາທຸລະກິດຂະໜາດນ້ອຍ ແລະ ກາງ ທີ່ຍັງບໍ່ທັນເຂັ້ມແຂງ ແລະ ເປັນຂະບວນຟົດຟື້ນ, ການປັບປຸງສົ່ງເສີມ ແລະ ນໍາໃຊ້ທ່າແຮງ ດ້ານທ່ອງທ່ຽວ ຍັງເຮັດບໍ່ທັນໄດ້ດີ, ການປັບປຸງວິສາຫະກິດລັດ ຍັງມີຄວາມຄືບໜ້າຊ້າ, ການແກ້ໄຂປະກົດການຫຍໍ້ທໍ້ໃນສັງຄົມ ເປັນຕົ້ນບັນຫາຢາເສບຕິດ, ການປຸ້ນຈີ້ຊີງຊັບ, ຂີ້ລັກງັດແງະ, ອຸປະຕິເຫດ ແລະ ໄພສັງຄົມອື່ນໆ ເຖິງແມ່ນວ່າໄດ້ເອົາໃຈໃສ່ແກ້ໄຂ, ແຕ່ກໍ່ຍັງມີລັກສະນະແຜ່ຫຼາຍ ແລະ ສົ່ງຜົນທາງລົບ ຕໍ່ສັງຄົມໂດຍສະເພາະແມ່ນໄວໜຸ່ມ ແລະ ບັນຫາອື່ນໆ.

ຂ້າພະເຈົ້າເຫັນວ່າ ສະພາບເສດຖະກິດ ທີ່ຍັງຂະຫຍາຍຕົວຊ້າໃນປະຈຸບັນ ແມ່ນປະກົດການໜຶ່ງ ທີ່ເກີດຂຶ້ນ ໃນຊ່ວງເວລາທີ່ປະເທດເຮົາ ກຳລັງເຂົ້າສູ່ຂະບວນການປັບໂຄງສ້າງ ທາງດ້ານເສດຖະກິດ ໂດຍສະເພາະ ໃນເງື່ອນໄຂທີ່ພວກເຮົາ ກຳລັງພະຍາຍາມ:

• ຫຼຸດຜ່ອນການເອື່ອຍອີງໃສ່ ການລົງທຶນໃນຂະແໜງພະລັງງານ ແລະ ບໍ່ແຮ່ ແລະ ການກູ້ຢືມຈາກພາຍນອກ ມາລົງທຶນໃສ່ການສ້າງພື້ນຖານໂຄງລ່າງ ທີ່ມີປະສິດທິຜົນທາງດ້ານເສດ ຖະກິດຕໍ່າ;
• ຊຸກຍູ້ການຜະລິດເປັນສິນຄ້າ, ການສົ່ງເສີມອຸດສາຫະກຳປຸງແຕ່ງ, ການທ່ອງທ່ຽວ ແລະ ການບໍລິການຜ່ານ, ການສົ່ງເສີມການເຊື່ອມຈອດ ແລະ ການພັດທະນາທ່າແຮງທາງດ້ານເສດຖະກິດອື່ນໆ ຂອງປະເທດ;
• ກວດກາ, ເກືອດຫ້າມ ແລະ ປະຕິບັດມາດຕະການທີ່ເດັດຂາດ ຕໍ່ການເຄື່ອນໄຫວເສດຖະກິດ ທີ່ຂັດກັບ ແນວທາງນະໂຍບາຍ, ຜິດກົດໝາຍ ແລະ ບໍ່ສອດຄ່ອງກັບລະບຽບການທີ່ກ່ຽວຂ້ອງ ເປັນຕົ້ນແມ່ນ ການປາບປາມການຄ້າຂາຍຢາເສບຕິດ, ການຕັດ ແລະ ສົ່ງໄມ້ທ່ອນອອກປະເທດ, ການລັກລອບໜີພາສີ ແລະ ການເຄື່ອນໄຫວ ອື່ນໆ ເຊິ່ງເປັນການຈຳກັດ ແລະ ອັດຊ່ອງທາງຂອງກະແສເງິນ ທີ່ບໍ່ຖືກຕ້ອງເຂົ້າປະເທດ ແລະ ອື່ນໆ. ການຕີລາຄາທີ່ກ່າວມານີ້ ເປັນການຕີລາຄາໂດຍສັງເຂບ ເພື່ອຍົກໃຫ້ເຫັນບັນຫາ, ສ່ວນການຕີລາຄາກ່ຽວກັບ ສາເຫດ ແລະ ທິດທາງ ແລະ ມາດຕະການແກ້ໄຂ, ກອງປະຊຸມສູນກາງຄົບຄະນະ ໃນສອງຄັ້ງຜ່ານມາ ກໍ່ໄດ້ເປັນເອກະພາບ ແລະ ມີທິດຊີ້ນຳໃຫ້ລັດຖະບານ ໄປຜັນຂະຫຍາຍ ແລະ ຈັດຕັ້ງປະຕິບັດແລ້ວ.

ຮຽນ ທ່ານ ປະທານ, ຄະນະປະທານ ແລະ ບັນດາທ່ານ ທີ່ນັບຖື.

ສຳລັບ 6 ເດືອນທ້າຍປີ 2019, ລັດຖະບານ ຈະໄດ້ສືບຕໍ່ສູ້ຊົນ ຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ແຫ່ງຊາດ ແລະ ແຜນງົບປະມານ ແຫ່ງລັດ ໃຫ້ບັນລຸຕາມຄາດ  ໝາຍ ທີ່ສະພາແຫ່ງຊາດ ໄດ້ຮັບຮອງ ກໍ່ຄື ບັນລຸຕາມມະຕິ ເລກທີ 99/ສພຊ ແລະ ເລກທີ 100/ສພຊ. ສ່ວນທິດທາງ ແລະ ມາດຕະການລະອຽດ, ລັດຖະບານ ກໍໄດ້ກໍານົດດຳລັດ ສະບັບເລກທີ 560/ນຍ ແລະ 8 ມາດຕະການຊຸກຍູ້ເສດຖະກິດ ລະອຽດສົມຄວນແລ້ວ, ພ້ອມກັນນີ້, ກອງປະຊຸມສູນກາງຄົບຄະນະ ຂອງຄະນະບໍລິຫານງານ ສູນກາງພັກ ຄັ້ງທີ 7 ໃນເດືອນຜ່ານມາ ກ່ຽວກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ ກໍໄດ້ມີທິດຊີ້ນຳ ເພື່ອໃຫ້ລັດຖະບານ ນຳໄປຜັນຂະຫຍາຍຕື່ມອີກ. ດັ່ງນັ້ນ, ໃນກອງປະຊຸມສະໄໝສາມັນ ຂອງສະພາແຫ່ງຊາດ ໃນເທື່ອນີ້, ລັດຖະບານ ຈະບໍ່ສະເໜີ ທິດທາງ ແລະ ມາດຕະການ ໃໝ່ອີກ, ມີແຕ່ສືບຕໍ່ເອົາໃຈໃສ່ ໃນການຈັດຕັ້ງປະຕິບັດ ທິດທາງ ແລະ ມາດຕະການ ທີ່ມີແລ້ວ ໃຫ້ມີປະສິດທິພາບ, ມີປະສິດທິຜົນ ແລະ ເປັນຮູບປະທຳ ຫຼາຍຂຶ້ນກວ່າເກົ່າ.

ລັດຖະບານ ຈະສືບຕໍ່ປະຕິບັດ ພາລະບົດບາດ, ໜ້າທີ່ ແລະ ຄວາມຮັບຜິດຊອບ ຂອງຕົນ ໃຫ້ສຳເລັດຜົນ ຕາມທີ່ໄດ້ສະເໜີລາຍງານ ແລະ ຕາມທີ່ ສະພາແຫ່ງຊາດ ໄດ້ອອກມະຕິຮັບຮອງ ໃນກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ VIII, ຈະບໍ່ສະເໜີດັດແກ້ແຜນ ແລະ ຕົວເລກຄາດໝາຍ ຂອງແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ, ແຕ່ຈະສະເໜີ ໃຫ້ສະພາແຫ່ງຊາດ ພິຈາລະນາ ບາງບັນຫາ ດັ່ງນີ້:

ອີງໃສ່ການສະຫຼຸບຜົນການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາປີ 2018 ໃນຂອບເຂດທົ່ວປະເທດ ເຫັນວ່າບັນດາທ້ອງຖິ່ນ ສາມາດປະຕິບັດລາຍຮັບໄດ້ເກີນແຜນ ຈໍານວນ 144 ຕື້ກີບ (ຕາມອັດຕາສ່ວນ 60%), ຊຶ່ງອີງຕາມ ມາດຕາ 49 ຂອງກົດໝາຍວ່າດ້ວຍງົບປະມານແຫ່ງລັດ ແລະ ຄໍາແນະນໍາຈັດຕັ້ງປະຕິບັດແຜນງົບປະມານແຫ່ງລັດ ແມ່ນອະນຸຍາດໃຫ້ທ້ອງຖິ່ນ ສາມາດນໍາໃຊ້ໄດ້ ເພື່ອພັດທະນາທ້ອງຖິ່ນຕົນ ໂດຍເອົາເຂົ້າໃນແຜນລາຍຈ່າຍງົບປະມານແຫ່ງລັດ ໃນປີຖັດໄປ (ໃນປີ 2019). ສ່ວນແຫຼ່ງທຶນ ຈໍານວນ 144 ຕື້ກີບ ແມ່ນຈະຍົກຍອດຈາກປີ 2018 ມາເປັນແຫຼ່ງດຸນດ່ຽງງົບປະມານເພີ່ມໃນປີ 2019, ຍ້ອນໃນປີຜ່ານມາ ແມ່ນໄດ້ບັນທຶກຕົວເລກດັ່ງກ່າວ ເຂົ້າເປັນລາຍຮັບງົບປະມານແລ້ວ.

ນອກນັ້ນ ໃນໄລຍະການຈັດຕັ້ງປະຕິບັດແຜນງົບປະມານ ປະຈໍາປີ 2019 ເຫັນວ່າຍັງມີລາຍຈ່າຍບ້ວງໄພພິບັດຂອງແຂວງອັດຕະປື ທີ່ມີແຫຼ່ງທຶນຈາກການປະກອບສ່ວນຂອງສັງຄົມຮອງຮັບແລ້ວ ປະມານ 197 ຕື້ກີບ, ຊຶ່ງວຽກງານດັ່ງກ່າວ ເປັນວຽກຮີບດ່ວນ ແລະ ມີຄວາມຈໍາເປັນ ທີ່ຍັງບໍ່ນອນໃນແຜນງົບປະມານ ປະຈໍາປີ 2019.

ສະນັ້ນ, ອີງໃສ່ມາດຕາ 59 ຂອງກົດໝາຍວ່າດ້ວຍງົບປະມານແຫ່ງລັດ ເຫັນວ່າມີຄວາມຈໍາເປັນທີ່ຈະຕ້ອງໄດ້ ນໍາສະເໜີຕໍ່ກອງປະຊຸມສະພາແຫ່ງຊາດ ພິຈາລະນາດັດແກ້ແຜນງົບປະມານແຫ່ງລັດ ປະຈໍາປີ 2019, ເນື່ອງຈາກຕົວເລກດັ່ງກ່າວ ແມ່ນຈະກະທົບຕໍ່ເພດານແຜນງົບປະມານແຫ່ງລັດ ທີ່ສະພາແຫ່ງຊາດ ໄດ້ຮັບຮອງກ່ອນແລ້ວ, ດັ່ງລະອຽດ ລຸ່ມນີ້:

1. ດັດແກ້ແຜນດຸ່ນດ່ຽງເພີ່ມ 144,4 ຕື້ກີບ ຈາກເງິນເກີນແຜນຂອງທ້ອງຖິ່ນ, ເຮັດໃຫ້ການດຸນດ່ຽງງົບປະມານ ເພີ່ມຂຶ້ນຈາກ 7.088,7 ຕື້ກີບ ມາເປັນ 7.233,2 ຕື້ກີບ.
2. ດັດແກ້ແຜນລາຍຮັບເພີ່ມ 197 ຕື້ກີບ ຈາກການປະກອບສ່ວນຂອງສັງຄົມ ເພື່ອຊ່ວຍແກ້ໄຂໄພພິບັດນໍ້າຖ້ວມແຂວງອັດຕະປຶ, ເຮັດໃຫ້ລາຍຮັບທັງໝົດເພີ່ມຂຶ້ນ ຈາກ 26.305,2 ຕື້ກີບ ມາເປັນ 26.502,2 ຕື້ກີບ;
3. ດັດແກ້ແຜນລາຍຈ່າຍເພີ່ມ 341,4 ຕື້ກີບ, ໃນນີ້: ມາຈາກລາຍຈ່າຍໄພພິບັດ 197 ຕື້ກີບ ແລະ ລາຍຈ່າຍເງິນເກີນແຜນ 144,4 ຕື້ກີບ, ເຮັດໃຫ້ລາຍຈ່າຍທັງໝົດ ເພີ່ມຂຶ້ນຈາກ 33.394 ຕື້ກີບ ມາເປັນ 33.735,5 ຕື້ກີບ;

ບັນດາຂໍ້ມູນທີ່ສະເໜີຂໍດັດແກ້ຂ້າງເທິງນີ້, ຍັງເປັນຕົວເລກທີ່ສັງລວມເບື້ອງຕົ້ນ, ເຊິ່ງປະຈຸບັນ  ບັນດາຂະແໜງການ ແລະ ທ້ອງຖິ່ນ ກໍາລັງກະກຽມສະເໜີຂໍດັດແກ້ເພີ່ມ ເປັນຕົ້ນ ບ້ວງຈົດຮັບ-ຈົດຈ່າຍວິຊາການ, ບ້ວງເງິນກອງທຶນປະກັນສຸຂະພາບແຫ່ງຊາດ ແລະ ອື່ນໆ. ເນື່ອງຈາກວ່າ ມາດຕາ 59 ຂອງກົດໝາຍວ່າດ້ວຍງົບປະມານ ແຫ່ງລັດ ກ່ຽວກັບການດັດແກ້ແຜນງົບປະມານປະຈຳປີ ໄດ້ກຳນົດໄວ້ວ່າ ຕ້ອງໄດ້ປະຕິບັດ ຄືກັບ ຂັ້ນຕອນການພິຈາລະນາຮັບຮອງເອົາແຜນງົບປະມານ ປະຈຳປີ ເຊິ່ງຈະຮັບຮອງໃນກອງປະຊຸມສະໄໝສາມັນ ຂອງສະພາແຫ່ງຊາດ ໃນທ້າຍເດືອນຕຸລາ ຫາ ເດືອນພະຈິກ. ແຕ່ເພື່ອເຮັດໃຫ້ກົນໄກການຈັດຕັ້ງປະຕິບັດມີຄວາມຄ່ອງຕົວ ບົນພື້ນຖານຫຼັກການລວມສູນທຸກແຫຼ່ງລາຍຮັບ-ລາຍຈ່າຍເຂົ້າງົບປະມານແຫ່ງລັດ, ຈຶ່ງຮຽນສະເໜີຕໍ່ສະພາແຫ່ງຊາດ ເຫັນດີດ້ານຫຼັກການ ໃຫ້ລັດຖະບານ ສາມາດຈັດຕັ້ງປະຕິບັດໄປກ່ອນ, ແລ້ວສືບຕໍ່ສັງລວມເປັນອັນລະອຽດນໍາສະເໜີຕໍ່ ກອງປະຊຸມຄະນະປະຈໍາສະພາແຫ່ງຊາດ ໃນເດືອນ 7 ຫຼື ເດືອນ 8/2019 ພິຈາລະນາຕົກລົງ ແລ້ວຈຶ່ງນຳສະເໜີຕໍ່ກອງປະຊຸມສະພາແຫ່ງຊາດ ໃນເດືອນຕຸລາ ຫາ ເດືອນພະຈິກ ພິຈາລະນາຮັບຮອງ ການດັດແກ້ແຜນງົບປະມານແຫ່ງລັດ ປະຈຳປີ ຕາມກົດໝາຍກໍານົດ.

ພ້ອມກັນນີ້, ກໍໍສະເໜີສະພາແຫ່ງຊາດ ກໍຄືບັນດາ ສະມາຊິກສະພາ ຊ່ວຍລັດຖະບານ ໃນກາຊຸກຍູ້, ຕິດຕາມ ແລະ ກວດກາການປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານ ຂອງທ້ອງຖິ່ນ ໃຫ້ບັນລຸຕາມຄາດໝາຍ.

ທັງໝົດນີ້ ແມ່ນການລາຍງານ ໂດຍສັງເຂບກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ ແລະ ແຜນງົບປະມານ ແຫ່ງລັດ 4 ເດືອນ, ຄາດຄະເນ 6 ເດືອນຕົ້ນປີ ແລະ ທິດທາງແຜນການໃນ 6 ເດືອນທ້າຍປີ 2019. ຖ້າຫາກຍັງມີບັນຫາໃດ ທີ່ສະມາຊິກສະພາ ກໍຄື ປະຊາຊົນ ມີຄວາມສົນໃຈສະເພາະຕື່ມອີກ ຂ້າພະເຈົ້າ ແລະ ສະມາຊິກລັດຖະບານ ກໍຄືລັດຖະມົນຕີທີ່ກ່ຽວຂ້ອງ ກໍຈະມາຊີ້ແຈງ-ອະທິບາຍ ຫລື ຕອບຄຳຊັກຖາມຕໍ່ກອງປະຊຸມຕື່ມອີກ ຄືດັ່ງທີ່ເຄີຍປະຕິບັດໃນຜ່ານມາ.

ຂໍຖືໂອກາດອັນມີຄວາມໝາຍນີ້, ຂ້າພະເຈົ້າ ​ຂໍສະເໜີ ​ມາ​ຍັງບັນດາທ່ານ ສະມາຊິກສະພາແຫ່ງຊາດ ຄົ້ນຄວ້າ ພິຈາລະນາ ແລະ ກ້າວໄປເຖິງການຮັບຮອງເອົາ ບົດລາຍງານນີ້ ເພື່ອເປັນບ່ອນອີງໃຫ້ລັດຖະບານ ນຳໄປຈັດຕັ້ງປະຕິບັດ ໃຫ້ມີຜົນສຳເລັດ.

ສຸດທ້າຍນີ້ ຂໍອວຍພອນໃຫ້ຄະນະປະທານ, ການນຳພັກ ແລະ ລັດ, ບັນດາທ່ານສະມາຊິກສະພາແຫ່ງຊາດ ແລະ ແຂກຜູ້ມີກຽດ ທຸກທ່ານ ຈົ່ງມີສຸຂະພາບເຂັ້ມແຂງ, ມີຜົນສຳເລັດໃນການປະຕິບັດໜ້າທີ່ ວຽກງານຂອງຕົນ.

ອວຍພອນໃຫ້ກອງປະຊຸມສະໄໝສາມັນ ເທື່ອທີ່ 7 ຂອງສະພາແຫ່ງຊາດ ຊຸດທີ VIII ຄັ້ງນີ້ ຈົ່ງປະສົບຜົນສຳເລັດ ຢ່າງຈົບງາມ. ມາຮອດນີ້ ການລາຍງານ ຂອງຂ້າພະເຈົ້າ ​ແມ່ນ​ໝົດ​ພຽງ​ເທົ່າ​ນີ້.

ຂໍຂອບໃຈ