ພາຍຫຼັງສໍາເລັດການດໍາເນີນກອງປະຊຸມສະໄໜສາມັນເທື່ອ 5 ຂອງສະພາປະຊາຊົນແຂວງວຽງຈັນ ຊຸດທີ II ໃນຕອນເຊົ້າຂອງວັນທີ 6 ກັນຍາ 2023 ທ່ານ ນາງ ໃສແສງຈັນ ແສງພະຈັນ ຮອງເລຂາທິການສະພາປະຊາຊົນແຂວງວຽງຈັນ ໄດ້ຖະແຫຼ່ງຜົນສໍາເລັດກອງປະຊຸມສະໄໜສາມັນເທື່ອທີ 5 ຂອງສະພາປະຊາຊົນແຂວງ ຊຸດທີ II ຕໍ່ສື່ມວນຊົນແຂວງວຽງຈັນວ່າ: ຂ້າພະເຈົ້າໃນນາມຕາງໜ້າສະພາປະຊາຊົນແຂວງວຽງຈັນ ໃນນາມຄະນະເລຂາທິການສະພາປະຊາຊົນແຂວງ ມີຄວາມຍິນດີ ແລະ ຖືເປັນກຽດຢ່າງສູງແຈ້ງມາຍັງບັນດາທ່ານພະນັກງານ-ລັດ, ພະນັກງານ, ທະຫານ, ຕໍາຫຼວດ, ນັກຮຽນ, ນັກສຶກສາ, ປັນຍາຊົນ, ກໍາມະກອນ, ຊາວຜູ້ອອກແຮງງານ, ຜູ້ປະກອບການ, ພໍ່ແມ່ພິນ້ອງປະຊາຊົນລາວບັນດາເຜົ່າ,ຊາວຕ່າງດ້າວ,ທີດໍາລົງຊິວິດຢູ່ແຂວງວຽງຈັນ ຊາບເຖິ່ງ ຜົນສໍາເລັດກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນແຂວງວຽງຈັນ ຊຸດທີ II ດັ່ງນີ້: ກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນແຂວງວຽງຈັນ ຊຸດທີ II ໄດ້ໄຂຂື້ນໃນຕອນເຊົ້າຂອງ ເວລາ 7: 30 ຂອງວັນທີ 29 ຫາ 31 ສິງຫາ 2023 ລວມ 3 ວັນເຕັມ ໂດຍພາຍໃຕ້ການເປັນປະທານ ຂອງ ທ່ານ ບຸນສອນ ເພັດລາວັນ ຮອງເລຂາພັກແຂວງ, ປະທານສະພາປະຊາຊົນແຂວງວຽງຈັນ ກອງປະຊຸມຄັ້ງນີ້ ນອກຈາກສະມາຊິກສະພາປະຊາຊົນແຂວງເຂົ້າຮ່ວມແລ້ວ ກອງປະຊຸມເປັນກຽດຢ່າງສູງຕ້ອນຮັບ ທ່ານ ຄໍາພັນ ສິດທິດໍາພາ ກໍາມະການສູນກາງພັກ, ເລຂາພັກແຂວງ, ເຈົ້າແຂວງ ແຂວງວຽງຈັນ, ທ່ານ ສຈ ປອ ຈະເລີນ ເຍຍປ່າວເຮີ ກໍາມະການສູນກາງພັກ ຮອງປະທານສະພາແຫ່ງຊາດ ສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ 10 ແຂວງວຽງຈັນ, ມີບັນດາທ່ານການນໍາ ພັກ-ລັດ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 10, ອາດີດການນໍາຂັ້ນສູງຂອງແຂວງຕາງໜ້າແນວລາວສ້າງຊາດ, ອົງການຈັດຕັ້ງມະຫາຊົນ,ພະນັກງານອາວຸໂສບໍານານ,ພາກສ່ວນທີກ່ຽວຂ້ອງ ແລະ ແຂກຖຶກເຊີນເຂົ້າຮ່ວມຈໍານວນ 84 ທ່ານ ຍິງ 12 ທ່ານ.
ກອງປະຊຸມສະໄໜສາມັນເທື່ອທີ 5 ສະພາປະຊາຊົນແຂວງວຽງຈັນຊຸດທີ II ບັນດາທານສະມາຊິກສະພາປະຊາຊົນແຂວງ ໄດ້ສຸມເຫື່ອແຮງສະຕິປັນຍາໃນການຄົ້ນຄວ້າ, ປະກອບຄໍາຄິດເຫັນ ແລະ ໄດ້ຮັບການປະກອບສວ່ນຈາກອົງການປົກຄອງແຂວງ ແລະ ພາກສ່ວນທີ່ກ່ຽວຂ້ອງ ເຂົ້າໃນການດໍາເນີນກອງປະຊຸມສະໄໜສາມັນເທື່ອທີ 5 ສະພາປະຊາຊົນແຂວງ ຊຸດທີ II, ກອງປະຊຸມສະໄໜສາມັນເທື່ອທີ 5 ເທື່ອນີ້ ໄດ້ພິຈາລະນາ ແລະ ຮັບຮອງເອົາບັນຫາສໍາຄັນຂອງແຂວງ ຕາມສິດ ແລະ ໜ້າທີ່ ຂອງສະພາປະຊາຊົນແຂວງ ທີ່ໄດ້ກໍານົດໄວ້ໃນລັດຖະທໍາມະນູນ ແລະ ກົດໜາຍ, ໄດ້ຮັບຜົນສໍາເລັດຕາມລະດັບຄາດໜາຍທີ່ວາງໄວ້ ແລະ ໄດ້ພິຈາລະນາ ຮັບຮອງເອົາບັນຫາສໍາຄັນພື້ນຖານຂອງແຂວງ ດັ່ງນີ້:
1. ພິຈາລະນາ, ຮັບຮອງເອົາບົດລາຍງານການຈັດຕັ້ງປະຕິບັດວຽກງານ ໄລຍະກາງສະໄໜຂອງແຜນການ 5 ປີ (2021-2025) ທິດທາງແຜນການທ້າຍສະໄໜ ຂອງສະພາປະຊາຊົນແຂວງວຽງຈັນ ຊຸດທີ II ແລະ ການຈັດຕັ້ງປະຕິບັດວຽກງານ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2023 ຂອງສະພາປະຊາຊົນແຂວງວຽງຈັນ ຊຸດທີ II.
2. ພິຈາລະນາ, ຮັບຮອງເອົາບົດລາຍງານການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ຂອງແຂວງ ໄລຍະກາງສະໄໜຂອງແຜນການ 5 ປີ (2021-2025) ທິດທາງແຜນການທ້າຍສະໄໜ ແລະ ການຈັດຕັ້ງປະຕິບັດ ແຜນພັດທະນາເສດຖະກິດ – ສັງຄົມ ຂອງແຂວງ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2023.
3. ພິຈາລະນາ, ຮັບຮອງເອົາການສະເໜີແຕ່ງຕັ້ງ ຫົວໜ້າພະແນກການຂັ້ນແຂວງ ແລະ ເຈົ້າເມືອງ ຕາມການສະເໜີຂອງທ່ານເຈົ້າແຂວງ ແຂວງວຽງຈັນ.
4. ພິຈາລະນາ, ຮັບຮອງເອົາບົດລາຍງານການຈັດຕັ້ງປະຕິບັດແຜນງົບປະມານແຫ່ງລັດ ຂອງແຂວງ ໄລຍະກາງສະໄໜຂອງແຜນການ 5 ປີ (2021-2025) ທິດທາງແຜນການທ້າຍສະໄໜ ແລະ ການຈັດຕັ້ງປະຕິບັດ ແຜນງົບປະມານແຫ່ງລັດ ຂອງແຂວງ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2023.
5. ພິຈາລະນາ, ຮັບຮອງເອົາບົດລາຍງານການຈັດຕັ້ງປະຕິບັດວຽກງານ ໄລຍະກາງສະໄໜຂອງແຜນການ 5 ປີ (2021-2025) ທິດທາງແຜນການທ້າຍສະໄໜ ຂອງອົງການໄອຍະການປະຊາຊົນແຂວງ ແລະ ສານປະຊາຊົນແຂວງ; ການຈັດຕັ້ງປະຕິບັດ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2023 ຂອງອົງການໄອຍະການປະຊາຊົນແຂວງ ແລະ ສານປະຊາຊົນແຂວງວຽງຈັນ.
ນອກນັ້ນກອງປະຊຸມຍັງໄດ້ຮັບຟັງການລາຍງານ ກ່ຽວກັບການປະເມີນຄວາມໄວ້ວາງໃຈໃນການປະຕິບັດໜ້າທີ່ ຂອງບຸກຄະລາກອນທີ່ສະພາປະຊາຊົນແຂວງ ເລືອກຕັ້ງ ແລະ ຮັບຮອງເອົາການແຕ່ງຕັ້ງ. ຄຽງຄູ່ກັບການພິຈາລະນາ ແລະ ຮັບຮອງເອົາບັນຫາສໍາຄັນດັ່ງກ່າວມາຂ້າງເທິ່ງນັ້ນ, ໃນໄລຍະດໍາເນີນກອງປະຊູມສະໄໜສາມັນເທື່ອທີ 5 ສະພາປະຊາຊົນແຂວງ ຊຸດທີ II ໄດ້ມີປະຊາຊົນບັນດາເຜົ່າ ສົ່ງຄໍາຄິດຄໍາເຫັນຜ່ານໂທລະສັບສາຍດ່ວນ 023 156 ຈໍານວນ 5 ສາຍ ແລະ 6 ເນື້ອໃນ ທີ່ພົວພັນເຖິ່ງການຄຸ້ມຄອງ-ບໍລິຫານລັດ, ການພັດທະນາເສດຖະກິດ-ສັງຄົມ, ການພັດທະນາທີ່ມີຜົນກະທົບຕໍ່ສັງຄົມ ແລະ ສີ່ງແວດລອ້ມຕໍ່ກັບຄໍາຄິດເຫັນຂອງປະຊາຊົນດັ່ງກ່າວ ກອງເລຂາກອງປະຊຸມໄດ້ສັງລວມ ແລະ ຈະມອບໃຫ້ພາກສ່ວນທີ່ກ່ຽວຂ້ອງຄົ້ນຄວ້າແກ້ໄຂໃຫ້ຖຶກຕ້ອງສ່ອດຄອ່ງ ຕາມກົດໜາຍ ແລະ ລະບຽບ ສະພາປະຊາຊົນແຂວງວຽງຈັນ ຈະໄດ້ເພີ່ມທະວີຄວາມເປັນເຈົ້າການໃນການເຮັດໜ້າທີ່ຕິດຕາມ-ກວດກາ ແລະ ຊຸກຍູ້ ຕາມພາລະບົດບາດຢ່າງເປັນເຈົ້າການ.
ອີກເທື່ອໜຶ່ງ ຕາງໜ້າສະພາປະຊາຊົນແຂວງວຽງຈັນ, ຂ້າພະເຈົ້າຂໍຂອບໃຈມາຍັງທຸກພາກສ່ວນ ທີ່ໄດ້ມີຄວາມພະຍາຍາມຕິດຕາມ, ຮັບຟັງ ແລະ ໃຊ້ສິດປະຊາທິປະໄຕຂອງຕົນ ໃນການມີຄໍາຄິດ-ຄໍາເຫັນຄືດັ່ງກ່າວ ເຊິ່ງມັນສະແດງເຖິງຄວາມຮັບຜິດຊອບທາງດ້ານການເມືອງຂອງຜູ້ມີສິດເລືອກຕັ້ງ ທີ່ໄດ້ໃຫ້ຄວາມເປັນຫ່ວງ-ເປັນໃຍຕໍ່ການພັດທະນາເສດຖະກິດ-ສັງຄົມ ແຂວງພວກເຮົາ.
ຂໍສະແດງຄວາມຂອບໃຈ ແລະ ຊົມເຊີຍຢ່າງຈິງໃຈມາຍັງພາກສ່ວນສື່ມວນຊົນ ຂອງແຂວງວຽງຈັນທີ່ໄດ້ຕິດຕາມຢ່າງໃກຊິດ ເພື່ອເກັບກໍາຂ່າວ ແລະ ເຜີຍແຜ່ຢ່າງທັນການ ກ່ຽວກັບການດໍາເນີນກອງປະຊຸມໃນຄັ້ງນີ້ ໃຫ້ແກ່ສັງຄົມຮັບຊາບຢ່າງທົ່ວເຖິ່ງ.
ຂໍອວຍພອນແດ່ທຸກໆທ່ານ ຈົ່ງມີສຸຂະພາບເຂັ້ມແຂງມີຄວາມຜາສຸກໃນຊິວິດສ່ວນຕົວ ແລະ ຄອບຄົວ ປະສົບຜົນສໍາເລັດໃນໜ້າທີ່ການງານທຸກປະການ ແລະ ພ້ອມກັນພັດທະນາແຂວງວຽງຈັນຂອງພວກເຮົາ ໃຫ້ກາຍເປັນແຂວງມັ່ງຄັ່ງ,ເຂັ້ມແຂງ,ສັງຄົມມີຄວາມສະຫງົບ, ຍຸຕິທໍາ ແລະ ສີວິໄລ ເປັນກ້າວໆ.
ພາບ-ຂາ່ວ ບູລາຕີ ແສນທະວົງ