ໃນຕອນເຊົ້າ ວັນທີ 2 ກໍລະກົດ 2020 ທີ່ສະພາແຫ່ງຊາດ(ຫລັກ6) ນະຄອນຫຼວງວຽງຈັນ ທ່ານ ນາງ ສວນສະຫວັນ ວິຍະເກດ, ກໍາມະການຄະນະປະຈໍາ, ເລຂາທິການສະພາແຫ່ງຊາດ  ໄດ້ຖະແຫຼງຂ່າວກ່ຽວກັບການປິດກອງປະຊຸມສະໄໝສາມັນ ເທື່ອທີ 9 ຂອງສະພາແຫ່ງຊາດຊຸດທີ VIII ເພື່ອແຈ້ງມາຍັງບັນດາທ່ານ ພະນັກງານ-ລັດຖະກອນ, ທະຫານ, ຕຳຫຼວດ, ນັກຮຽນ, ນັກສຶກສາ, ປັນຍາຊົນ, ກຳມະກອນ, ຊາວຜູ້ອອກແຮງງານ, ພໍ່ແມ່ພີ່ນ້ອງ, ປະຊາຊົນລາວບັນດາເຜົ່າໃນທົ່ວປະເທດ ແລະ ພີ່ນ້ອງຊາວລາວທີ່ອາໄສຢູ່ຕ່າງປະເທດຮັບຊາບ ກ່ຽວກັບ ຜົນສຳເລັດຂອງກອງປະຊຸມສະໄໝສາມັນ ເທື່ອທີ 9 ຂອງສະພາແຫ່ງຊາດຊຸດທີ VIII ດັ່ງນີ້:
I.    ກອງປະຊຸມສະໄໝສາມັນ ເທື່ອທີ 9 ຂອງສະພາແຫ່ງຊາດຊຸດທີ VIII ໄດ້ໄຂຂຶ້ນ ໃນຕອນເຊົ້າຂອງວັນພຸດ, ວັນທີ 24 ມິຖຸນາ 2020 ແລະ ໄດ້ດຳເນີນມາເຖິງຕອນເຊົ້າຂອງວັນພະຫັດ, ວັນທີ 2 ກໍລະກົດ 2020 ຊຶ່ງໄດ້ໃຊ້ເວລາດໍາເນີນກອງປະຊຸມທັງໝົດ 6 ວັນເຄິ່ງ (ບໍ່ລວມວັນພັກລັດຖະການ). ໃນກອງປະຊຸມຄັ້ງນີ້ ນອກຈາກການເຂົ້າຮ່ວມຂອງສະມາຊິກສະພາແຫ່ງຊາດ ຊຸດທີ VIII ຍັງມີການນຳຂັ້ນສູງຂອງພັກ-ລັດ, ຄະນະລັດຖະບານ, ອົງການຈັດຕັ້ງພັກ-ລັດ ແລະ ແຂກ ຖືກເຊີນເຂົ້າຮ່ວມຢ່າງພ້ອມພຽງ.
II.    ກອງປະຊຸມສະໄໝສາມັນ ເທື່ອທີ 9 ຂອງສະພາແຫ່ງຊາດຊຸດທີ VIII ໄດ້ພິຈາລະນາຮັບ ຮອງເອົາບັນຫາສຳຄັນພື້ນຖານຂອງປະເທດຊາດ ໂດຍໄດ້ອອກເປັນມະຕິກອງປະຊຸມ ຈຳນວນ 4 ສະບັບ ຄື:
1.    ມະຕິ ວ່າດ້ວຍການຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ແລະ ແຜນເງິນຕາ 5 ເດືອນ, ຄາດຄະ ເນ 6 ເດືອນ ຕົ້ນປີ ແລະທິດທາງວຽກງານຈຸດສຸມ 6 ເດືອນທ້າຍປີ 2020;
2.    ມະຕິວ່າດ້ວຍການຮັບຮອງເອົາການປັບປຸງກົດໝາຍ ຈຳນວນ 5 ສະບັບ ຄື: ການປັບປຸງກົດໝາຍວ່າດ້ວຍພາສີ; ການປັບປຸງບາງມາດຕາຂອງກົດໝາຍວ່າດ້ວຍ ສະພາແຫ່ງຊາດ; ການປັບປຸງບາງມາດຕາຂອງກົດໝາຍວ່າດ້ວຍສະພາປະຊາຊົນຂັ້ນແຂວງ; ການປັບປຸງບາງມາດຕາຂອງກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ ແລະ ສະພາປະຊາຊົນຂັ້ນແຂວງ; ການປັບປຸງບາງມາດຕາຂອງກົດໝາຍວ່າດ້ວຍນ້ຳ ແລະ ຊັບພະຍາກອນນ້ຳ ແລະ ກົດໝາຍວ່າດ້ວຍການປົກປັກຮັກສາສິ່ງແວດລ້ອມ.
3.    ມະຕິວ່າດ້ວຍການຮັບຮອງເອົາການເລືອກຕັ້ງແທນກຳມະການ ຄະນະປະຈຳສະພາແຫ່ງຊາດ ແລະ ແຕ່ງຕັ້ງປະທານກຳມາທິການແຜນການ, ການເງິນ ແລະ ການກວດສອບສະພາແຫ່ງຊາດ;
4.    ມະຕິ ວ່າດ້ວຍການຮັບຮອງເອົາບົດລາຍງານຜົນການຕິດຕາມກວດກາ ການຈັດຕັ້ງປະຕິບັດ ກົດໝາຍ ກ່ຽວກັບການຄຸ້ມຄອງ ແລະ ນຳໃຊ້ຊັບພະຍາກອນທຳມະຊາດ (ການຊອກຄົ້ນ ສໍາຫຼວດ, ຂຸດຄົ້ນ ແລະ ປຸງແຕ່ງ ແຮ່ທາດ, ຫີນຜາ, ຫີນແຮ່ ແລະ ຊາຍ).
ຢູ່ໃນການດຳເນີນກອງປະຊຸມສະໄໝສາມັນ ເທື່ອທີ 9 ຂອງສະພາແຫ່ງຊາດ ຊຸດທີ VIII ນີ້ ສະພາແຫ່ງຊາດໄດ້ສະເໜີໃຫ້ 5 ພາກສ່ວນ ປະກອບດ້ວຍ ກະຊວງການເງິນ, ກະຊວງແຜນການ ແລະການລົງທຶນ, ກະຊວງກະສິກຳ ແລະ ປ່າໄມ້, ກະຊວງແຮງງານ ແລະ ສະຫວັດດີການສັງຄົມ ແລະ ທະນາຄານແຫ່ງ ສປປ ລາວ  ຂຶ້ນຊີ້ແຈງຕໍ່ຄຳຊັກຖາມກ່ຽວກັບບັນຫາທີ່ພົ້ນເດັ່ນຂອງສັງຄົມ ຊຶ່ງສະພາແຫ່ງຊາດ ແລະ ສະມາຊິກສະພາແຫ່ງຊາດໄດ້ຍົກຂຶ້ນຢູ່ໃນກອງປະຊຸມ ເປັນຕົ້ນ: ສະພາບ ການພັດທະນາເສດຖະກິດ-ສັງຄົມໃນເງື່ອນໄຂທີ່ໄດ້ຮັບຜົນກະທົບຈາກການເກີດລະບາດຂອງພະ ຍາດອັກເສບປອດຈາກເຊື້ອຈຸລາໂລກໂຄໂລນາ ໂຄວິດ-19; ການສ້າງວຽກເຮັດງານທຳ ເພື່ອຮອງຮັບ ແຮງງານລາວທີ່ກັບມາຈາກຕ່າງປະເທດ; ການສົ່ງເສີມການຜະລິດກະສິກໍາເພື່ອຮັບປະກັນໃຫ້ການບໍລິໂພກພາຍໃນ ແລະ ສົ່ງອອກ;  ບັນຫາການສົ່ງເສີມຫົວໜ່ວຍການຜະລິດຂະໜາດນ້ອຍຂະໜາດກາງ; ບັນຫາການຄິດໄລ່ລາຄາໄຟຟ້າ ທີ່ມີລາຄາສູງ; ບັນຫາອັດຕາການແລກປ່ຽນເງິນຕາຕ່າງປະເທດ ແລະ ບັນຫາອື່ນໆຈຳນວນໜຶ່ງ. ພ້ອມດຽວກັນນີ້, ທ່ານນາຍົກລັດຖະມົນຕີໃນນາມຫົວໜ້າລັດຖະ ບານ ກໍໄດ້ມີຄຳເຫັນຕໍ່ກອງປະຊຸມສະພາແຫ່ງຊາດ ທັງເປັນການໃຫ້ຄວາມກະຈ່າງແຈ້ງຕື່ມຕໍ່ຄຳ ຖາມທີ່ສະມາຊິກສະພາແຫ່ງຊາດ ຍົກຂຶ້ນດ້ວຍບັນຍາກາດທີ່ດີ ແລະ ສ່ອງແສງໃຫ້ເຫັນຄວາມຮັບ ຜິດຊອບຮ່ວມກັນ ຂອງສະພາແຫ່ງຊາດ ແລະລັດຖະບານຕໍ່ປະຊາຊົນ. ພ້ອມກັນນັ້ນ ກອງປະຊຸມຍັງໄດ້ຮັບຟັງ ແລະປະກອບຄໍາຄິດຄໍາເຫັນຕໍ່ບົດລາຍງານ ການເຄື່ອນໄຫວວຽກງານ 6 ເດືອນຕົ້ນປີ ແລະທິດທາງແຜນການເຄື່ອນໄຫວວຽກງານ ຮອດກອງປະຊຸມຄັ້ງປະຖົມມາລຶກຂອງສະພາແຫ່ງຊາດ ຊຸດທີ IX.
III.  ຄຽງຄູ່ກັບການພິຈາລະນາ ແລະ ຮັບຮອງເອົາບັນຫາສຳຄັນດັ່ງກ່າວມາຂ້າງເທິງນັ້ນ, ໃນໄລ ຍະດຳເນີນກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດຊຸດທີ VIII ມີປະຊາຊົນບັນດາເຜົ່າ ສົ່ງຄຳຄິດຄຳເຫັນຜ່ານໂທລະສັນສາຍດ່ວນ (156) ຫຼາຍກວ່າ 479 ສາຍສາມາດສັງລວມໄດ້ ເປັນ 72 ບັນຫາ ມາຍັງກອງປະຊຸມສະພາແຫ່ງຊາດ ເຊິ່ງພົວພັນເຖິງການຄຸ້ມຄອງລັດ, ຄຸ້ມຄອງ ເສດຖະກິດ-ສັງຄົມ, ໃນນີ້ ບັນຫາທີ່ ພົ້ນເດັ່ນແມ່ນພົວພັນເຖິງຄ່າໄຟຟ້າແພງ, ບັນຫາທີ່ດິນ, ການກໍ່ ສ້າງເສັ້ນທາງ, ການຄຸ້ມຄອງການແລກປ່ຽນເງິນຕາ,  ການແກ້ໄຂບັນຫາຢາເສບຕິດ ແລະ ການປະຕິ ບັດຄຳຕັດສິນຂອງສານ ຕໍ່ກັບຄໍາຄິດເຫັນຂອງປະຊາຊົນທີ່ສົ່ງມາທາງໂທລະສັບສາຍດ່ວນດັ່ງກ່າວ ກອງເລຂາກອງປະຊຸມຈະໄດ້ສັງລວມ ແລະ ມອບໃຫ້ກຳມາທິການທີ່ກ່ຽວຂ້ອງ ເພື່ອປະສານສົມທົບພາກສ່ວນກ່ຽວຂ້ອງ ຄົ້ນຄວ້າແກ້ໄຂໃຫ້ຖືກຕ້ອງສອດຄ່ອງຕາມກົດໝາຍ ແລະ ລະບຽບການ.
ຕາງໜ້າຄະນະປະຈຳສະພາແຫ່ງຊາດ, ຄະນະເລຂາທິການສະພາແຫ່ງຊາດ ຂ້າພະເຈົ້າຂໍຂອບໃຈມາຍັງບັນດາທ່ານ ພະນັກງານ-ລັດຖະກອນ, ທະຫານ, ຕຳຫຼວດ, ນັກຮຽນ, ນັກສຶກສາ, ປັນຍາຊົນ, ກຳມະກອນ, ຊາວຜູ້ອອກແຮງງານ, ພໍ່ແມ່ພີ່ນ້ອງ, ປະຊາຊົນລາວບັນດາເຜົ່າທຸກຊັ້ນຄົນ ໃນທົ່ວປະເທດ ແລະ ພີ່ນ້ອງຊາວລາວທີ່ອາໄສຢູ່ຕ່າງປະເທດ ທີ່ໄດ້ຕິດຕາມການດຳເນີນກອງປະຊຸມ ສະໄໝສາມັນເທື່ອທີ 9 ຂອງສະພາແຫ່ງຊາດ ຊຸດທີ VIII ຄັ້ງນີ້.
ອີກເທື່ອໜຶ່ງ, ຂໍສະແດງຄວາມຂອບໃຈ ແລະ ຊົມເຊີຍຢ່າງຈິງໃຈມາຍັງໂທລະພາບແຫ່ງຊາດ ແລະ ວິທະຍຸກະຈາຍສຽງແຫ່ງຊາດ, ສື່ສິ່ງພິມທຸກປະເພດ ທັງພາກລັດ ແລະ ເອກະຊົນ ທີ່ໄດ້ຕິດຕາມຢ່າງໃກ້ຊິດ ເພື່ອເກັບກຳຂ່າວ ແລະ ເຜີຍແຜ່ຢ່າງທັນການ ກ່ຽວກັບການດຳເນີນກອງປະຊຸມໃນຄັ້ງນີ້ ໃຫ້ແກ່ສັງຄົມໄດ້ຮັບຊາບຢ່າງທົ່ວເຖິງ.