(ສພຊ) – ເພື່ອຮັບປະກັນການຈັດຕັ້ງປະຕິບັດວຽກ ງານ 3 ສ້າງໃນຕໍ່ໜ້າ ໃຫ້ມີປະສິດທິພາບ ແລະ ປະສິດທິຜົນສູງກວ່າເກົ່າ; ວາລະການດໍາເນີນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ເມື່ອວັນທີ 21 ພະຈິກຜ່ານມາ, ທ່ານ ຄຳຈັນ ໂສຕາປະເສີດ ປະທານກຳມາທິການບັນດາເຜົ່າ ຕາງໜ້າຄະນະປະຈໍາສະພາແຫ່ງ ຊາດ ໄດ້ມີບາງຂໍ້ສະເໜີໃຫ້ລັດຖະບານພິຈາລະນາ ແລະ ປັບປຸງແກ້ໄຂດັ່ງນີ້:

1. ຕັ້ງໜ້າຈັດຕັ້ງຜັນຂະຫຍາຍມະຕິສະບັບເລກທີ 05/ຄບສພ ວ່າດ້ວຍການສືບຕໍ່ຍູ້ແຮງການຜັນຂະຫຍາຍແນວທາງປ່ຽນແປງໃໝ່; ສ້າງການຫັນປ່ຽນທີ່ແຂງ ແຮງ, ເລິກເຊິ່ງ ແລະ ຮອບດ້ານ ໃນການນໍາພາຂອງພັກ (ເຊິ່ງຈະໄດ້ກໍານົດຕາແສງ ເປັນອົງການປົກຄອງທ້ອງຖິ່ນຂັ້ນຕໍ່າສຸດ ແລະ ບ້ານເປັນຫົວໜ່ວຍຊຸມຊົນ).

2. ປັບປຸງບາງມາດຕາຂອງກົດໝາຍທີ່ກ່ຽວຂ້ອງຂອງຂະແໜງການກ່ຽວກັບວຽກງານ 3 ສ້າງ ໃຫ້ລະອຽດ, ຮັດ ກຸມ ໂດຍສະເພາະການກໍານົດໜ້າທີ່ ແລະ ສິດຂອງອົງການຄຸ້ມຄອງມະຫາພາກ.

3. ສ້າງເພີ່ມ ຫຼື ປັບປຸງນິຕິກໍາໃຕ້ກົດໝາຍ ກ່ຽວກັບການແບ່ງຂັ້ນຄຸ້ມຄອງ, ໜ້າທີ່ ແລະ ສິດ ລະອຽດ, ຮັດກຸມ ລະຫວ່າງຂະແໜງການຂັ້ນສູນກາງກັບທ້ອງຖິ່ນ.

4. ສ້າງຕັ້ງຄະນະຮັບຜິດຊອບວຽກງານ 3 ສ້າງ ໂດຍມີທ່ານຮອງນາຍົກລັດຖະມົນຕີເປັນຜູ້ຊີ້ນໍາ-ນຳພາ ແລະ ກະຊວງພາຍໃນ ເປັນເສນາທິການປະຈໍາການ.

5. ຈັດຕັ້ງການປະເມີນຜົນ ແລະ ຕີລາຄາຢ່າງພາວະວິໄສ ເປັນລະບົບຄົບຊຸດຄືນໃໝ່ ກ່ຽວກັບວຽກງານ 3 ສ້າງ ໂດຍອີງໃສ່ຄາດໝາຍຂອງແຕ່ລະດ້ານ ແລະ ຕົວຊີ້ບອກ ຕາມຄໍາສັ່ງຂອງນາຍົກລັດຖະມົນຕີ ເລກທີ 34/ນຍ, ລົງວັນທີ 23 ສິງຫາ 2016.