ເລື່ອງເລົ່າໃນຄໍລໍາ ປະຈຳວັນນີ້ ພົວພັນກັບມາດຕະການຄວບຄຸມຢາເສບຕິດ ຢູ່ປະເທດໄທ ແລະ ເລື່ອງບັນຫາການໃຊ້ໂທລະສັບມືຖືໃນຫ້ອງຮຽນ ຢູ່ບາງປະເທດຕາມລາຍລະອຽດດັ່ງລຸ່ມນີ້.

ມາດຕະການຄວບຄຸມຢາເສບຕິດ ແຫຼ່ງຂ່າວຕ່າງປະເທດ ໄດ້ໃຫ້ຮູ້ຫວ່າງບໍ່ດົນມານີ້ ( ວຽງຈັນທາມ 13 ກຸມພາ 2024) ວ່າ ທາງການໄທໄດ້ເພີ່ມມາດຕະການເຂັ້ມຂຸ້ນ ແລະ ເດັດຂາດໃນສະໜາມຮົບ ກຳຈັດຢາເສບຕິດ ພາຍຫຼັງໄດ້ມີສຽງວິພາກວິຈານ ຈາກສັງຄົມວ່າ ລັດຖະບານໄທຊຸດປັດຈຸບັນ ບໍ່ເດັດຂາດໃນການຈັດການກັບບັນຫານີ້. ຂ່າວບອກວ່າ ທ່ານ ເສດຖາ ທະວີສິນ ນາຍົກລັດຖະມົນຕີໄທ ໄດ້ສັ່ງການໃຫ້ຜູ້ບັນຊາການຕຳຫຼວດສູງສຸດ ເພີ່ມຂີດຄວາມສາມາດ ໃນການປາບປາມ ຢາເສບຕິດ ເຊິ່ງຍັງເປັນວາລະແຫ່ງຊາດ ທີ່ຕ້ອງປະຕິບັດໃຫ້ສຳເລັດ. ທ່ານ ນາຍົກເວົ້າວ່າ ໃນປັດຈຸບັນ ການຈັບກຸມ ຜູ້ມີຄວາມຜິດໃນຄະດີຢາເສບຕິດ ໄດ້ເພີ່ມຂຶ້ນ 4 ເທົ່າ ແຕ່ລາຄາຢາເສບຕິດ ຍັງບໍ່ແພງຂຶ້ນ ນີ້ສະແດງວ່າ ຢາເສບຕິດ ຍັງມີຖົມເຖໄປ ດັ່ງນັ້ນ, ການປາບປາມຈຶ່ງຕ້ອງສືບຕໍ່. ໃນການກຳນົດຄວາມຜິດ ທີ່ພົວພັນກັບຢາເສບຕິດນັ້ນ ທາງກະຊວງ ສາທາລະນະສຸກໄທ ໄດ້ລະບຸໄວ້ວ່າ ຜູ້ທີ່ຖືກພົບວ່າ ມີຢາບ້າ ໄວ້ໃນການຄອບຄອງ ກາຍ 5 ເມັດຂຶ້ນໄປ ຈະຕ້ອງຖືກຕັດສິນວ່າ ເປັນຜູ້ຄ້າ, ຫຼຸດຈາກອັດຕາກຳນົດ 10 ເມັດ ທີ່ກຳນົດວ່າ ເປັນຜູ້ຄ້າໃນເມື່ອກ່ອນ. ສ່ວນຜູ້ທີ່ມີ ຢາບ້າ ແຕ່ 5 ເມັດ ລົງໄປຈະຖືກຕັດສິນວ່າເປັນ ຜູ້ເສບ ແລະ ຈະຖືກສົ່ງເຂົ້າສູນບຳບັດ. ຫາງສຽງສັງຄົມໄທ ຍັງເຫັນວ່າ ການກຳນົດວ່າໃຜ ເປັນຜູ້ຄ້າ-ໃຜເປັນຜູ້ເສບ ແບບນີ້ ຈະກາຍເປັນຊ່ອງວ່າງ ໃຫ້ຜູ້ຄ້າຢາເສບຕິດ ປອມໂຕເປັນຜູ້ເສບໄດ້ງ່າຍຂຶ້ນ. ກ່ຽວກັບບັນຫານີ້ ທ່ານ ນາຍົກ ເສດຖາ ທະວີສິນ ບອກວ່າ ຈະບໍ່ອະນຸຍາດ ໃຫ້ໃຜມີ ຢາເສບຕິດ ໄວ້ໃນຄອບຄອງແມ່ນແຕ່ເມັດດຽວ… ນອກຈາກນັ້ນ, ຍັງຈະເລັ່ງລັດ ຂະບວນການຈູດທຳລາຍ ຢາເສບຕິດ ທີ່ຍຶດມາໄດ້ ທັງນີ້ກໍເພື່ອປ້ອງກັນບໍ່ໃຫ້ຖືກລັກລອບເອົາໄປຈຳໜ່າຍ ໂດຍພະນັກງານສໍ້ລາດບັງຫຼວງ.

ບັນຫາການໃຊ້ໂທລະສັບມືຖືໃນຫ້ອງຮຽນ ມີຂ່າວຈາກປະເທດ ນູແວນເຊລັງ (ນິວຊີແລນ) ໃນທ້າຍປີ 2023 ວ່າທາງການ ຂອງປະເທດນີ້ ມີແຜນອອກມາດຕະການຫ້າມ ການໃຊ້ໂທລະສັບມືຖືພາຍໃນຫ້ອງຮຽນ ແນວຄວາມຄິດດັ່ງກ່າວ ໄດ້ມາຈາກຜົນການສຳຫຼວດ ບຸກຄົນເປົ້າໝາຍ ຈຳນວນ 1.481 ຄົນ ລະຫວ່າງວັນທີ 10-16 ພະຈິກ 2023 ກ່ຽວກັບຜົນດີ-ຜົນເສຍ ຈາກການໃຊ້ ໂທລະສັບມືຖື ໃນຫ້ອງຮຽນໂດຍນັກຮຽນ. ຜົນສະຫຼຸບອອກມາວ່າ 61% ເຫັນດີກັບ ແຜນຫ້າມນຳໃຊ້ໂທລະສັບມືຖືໃນຫ້ອງຮຽນ ແຕ່ບອກວ່າ ຄວນອະນຸຍາດໃຫ້ໃຊ້ເວລາພັກຜ່ອນ (ເລີກຫຼິ້ນ). ຜູ້ນຳນິວຊີແລນ ໂດຍສະເພາະແມ່ນທ່ານ ນາຍົກ ຄຣິສໂຕເຟີ ລັກຊອນ ນັ້ນເຫັນວ່າ ການຫ້າມໃຊ້ໂທລະສັບມືຖືໃນຫ້ອງຮຽນ ຈະຊ່ວຍໃຫ້ນັກຮຽນມີສະມາທິ ແລະ ຕັ້ງອົກຕັ້ງໃຈໃສ່ບົດຮຽນ ແລະ ຈະເຮັດໃຫ້ຄວາມສາມາດໃນການອ່ານອອກຂຽນເປັນ ຂອງນັກຮຽນດີຂຶ້ນ. ເລື່ອງການໃຊ້ໂທລະສັບມືຖື ໃນຫ້ອງຮຽນນີ້ ຫຼາຍປະເທດມີຄວາມກັງວົນໃຈ ແລະ ຊອກວິທີແກ້ໄຂໃຫ້ເໝາະສົມເຊັ່ນ ໃນປີ 2018, ທາງການປະເທດຝຣັ່ງ ກໍໄດ້ເອົາມາດຕະການເຂັ້ມງວດ ດ້ວຍການຫ້າມນັກຮຽນ ຂັ້ນປະຖົມ-ມັດທະຍົມຕົ້ນ ໃຊ້ໂທລະສັບມືຖືໃນຫ້ອງຮຽນ ໂດຍອ້າງເຫດຜົນວ່າ ມັນຈະເຮັດໃຫ້ນັກຮຽນ ເສຍສະມາທິ, ບໍ່ເອົາໃຈໃສ່ຕໍ່ຄຳອະທິບາຍ ຂອງຄູ-ອາຈານ. ມາດຕະການຫ້າມນີ້ ໜັກກວ່າຢູ່ ນູແວນເຊລັງ ຄືເວລາພັກຜ່ອນກໍຫ້າມໃຊ້ ແຕ່ນັກຮຽນ ສາມາດຖືໂທລະສັບໄປໂຮງຮຽນໄດ້ ເພື່ອໃຊ້ໃນເວລາຈຳເປັນ ເພື່ອຕິດຕໍ່ທາງຄອບຄົວເທົ່ານັ້ນ. ຢູ່ປະເທດອີຕາລີ, ມາດຕະການຫ້າມໃຊ້ໂທລະສັບມືຖື ໃນຫ້ອງຮຽນ ໄດ້ເລີ່ມປະຕິບັດມາແຕ່ເດືອນທັນວາ 2022 ໂດຍມີເຫດຜົນວ່າ ອຸປະກອນສື່ສານນີ້ ຈະລົບກວນການຮຽນຮູ້ ແລະ ຈະເຮັດໃຫ້ນັກຮຽນ ຫຼຸດຄວາມສົນໃຈ ຕໍ່ການສອນຂອງ ຄູ-ອາຈານ ແຕ່ກໍມີຂໍ້ຍົກເວັ້ນຄື ມີການອະນຸຍາດໃຫ້ນັກຮຽນ ໃຊ້ໂທລະສັບມືຖືໄດ້ສະເພາະກັບບົດຮຽນທີ່ກ່ຽວຂ້ອງເທົ່ານັ້ນ ຫຼັງຈາກນີ້ ອຸປະກອນນີ້ກໍຈະຖືກຄູເກັບມ້ຽນໄວ້.