ເລື່ອງສັນຫາມາເລົ່າປະຈຳ “ ຜູ້ແທນປະຊາຊົນ” ສະບັບນີ້ ພົວພັນກັບການຕົ້ມຕຸ໋ນ ໃນວົງການການຄ້າ ທີ່ເກີດຂຶ້ນຢູ່ ຫວຽດນາມ ແລະ ເລື່ອງອັດຕາ ການສໍ້ລາດບັງຫຼວງ ທີ່ມີຈຳນວນໜ້ອຍທີ່ສຸດຢູ່ ບາງປະເທດ ຕາມແຫຼ່ງຂ່າວຕ່າງປະເທດດັ່ງລຸ່ມນີ້.
ການຕົ້ມຕຸ໋ນ ໃນວົງການການຄ້າ ຫວ່າງບໍ່ດົນມານີ້, ທາງການກ່ຽວຂ້ອງຂອງຫວຽດນາມ ໄດ້ອອກຄຳເຕືອນ ບັນດາຜູ້ປະກອບການທາງທຸລະກິດວ່າ ໃຫ້ລະວັງຂະບວນການຕົ້ມຕຸ໋ນ ທີ່ພະຍາຍາມແຊກຫຼີ້ມເຂົ້າໃນວົງການ ການຄ້າລະດັບພາກພື້ນ ແລະ ສາກົນ. ເຫຼົ່ານັກຕົ້ມຕຸ໋ນທີ່ວ່ານີ້ ໃຫ້ຄວາມສົນໃຈເປັນພິເສດ ໃນຂະແໜງທຸລະກິດ ຂາອອກ ແລະ ຂາເຂົ້າ ເພາະມີຂັ້ນຕອນ ສະຫຼັບຊັບຊ້ອນ ກ່ຽວກັບການປະກອບເອກະສານ ກໍຄືການຕິດຕໍ່ພົວພັນ ດ້ວຍເຄື່ອງມືສື່ສານ. ພວກຫຼອກລວງຕົວະຕົ້ມ ທີ່ວ່ານີ້ ມີຄວາມແນບນຽນ ແລະ ຄວາມຊຳນານ ໃນການນຳໃຊ້ເຄື່ອງມື ສື່ທີ່ທັນສະໄໝ ເພື່ອຈຸດປະສົງຂອງພວກເຂົາເຈົ້າ. ຍ້ອນແນວນີ້ເອງ, ບັນດາປະເທດ ທີ່ນຳເຂົ້າ ແລະ ສົ່ງອອກສິນຄ້າ ຈຶ່ງໄດ້ອອກມາດຕະການ ທີ່ເຄັ່ງຄັດຮັດກຸມ ເພື່ອຄວບຄຸມທຸລະກິດໃນຂະແໜງນີ້ ໃຫ້ປອດໄພຈາກການຖືກຫຼອກລວງ. ຂ່າວໄດ້ຍົກຕົວຢ່າງ ກໍລະນີ ນັກຕົ້ມຕຸ໋ນ ໄດ້ພະຍາຍາມສໍ້ໂກງ ທຸລະກິດສົ່ງອອກສິນຄ້າ ກະສິກຳ ຂອງຫວຽດນາມ ໄປ ສປຈີນ ຫວ່າງບໍ່ດົນມາ ໂດຍນັກຕົ້ມຕຸ໋ນ ໄດ້ສ້າງເອກະສານປອມ ໃນນາມລູກຄ້າຝ່າຍຈີນ ທີ່ຮຽກຮ້ອງໃຫ້ຝ່າຍຫວຽດນາມ ມີໃບຢັ້ງຢືນສິນຄ້າ ຈາກສຳນັກງານພາສີຈີນ ແລະ ໃຫ້ຝ່າຍສົ່ງອອກຂອງຫວຽດນາມ ຈ່າຍຄ່າເອກະສານຢັ້ງຢືນດັ່ງກ່າວຜ່ານເວັບໄຊ. ຄ່າເອກະສານທີ່ວ່ານັ້ນ ມີມູນຄ່າແຕ່ 100-1.000 ໂດລາສະຫະລັດ. ແຕ່ໂຊກດີ ທີ່ທາງການກ່ຽວຂ້ອງຂອງຫວຽດນາມ ໄດ້ຕິດຕາມ ເລື່ອງນີ້ໄດ້ຢ່າງທັນການວ່າ ເປັນກົນລວງຂອງນັກຕົ້ມຕຸ໋ນ. ຈຸດທີ່ເປັນພິລຸດຂອງກົນລວງດັ່ງກ່າວ ກໍຄືການສະກົດອັກສອນຫຍໍ້ ຂອງໜ່ວຍງານ ອອກເອກະສານນັ້ນ ບໍ່ກົງກັບຂອງຈິງ ແລະ ກໍບໍ່ເຄີຍມີ ຄຳຮຽກຮ້ອງຂອງຝ່າຍຈີນ ໃຫ້ຜູ້ປະກອບການຂອງຫວຽດນາມ ມີເອກະສານດັ່ງກ່າວ. ຕໍ່ເຫດການດັ່ງກ່າວ, ທາງການຫວຽດນາມຈຶ່ງໄດ້ອອກມາເຕືອນ ບັນດານັກທຸລະກິດ ໂດຍສະເພາະແມ່ນ ໃນຂະແໜງທຸລະກິດຂະໜາດກາງ ແລະ ຂະໜາດນ້ອຍ ທີ່ສົ່ງອອກສິນຄ້າ. ກຸ່ມທຸລະກິດ ຂະໜາດກາງ ແລະ ຂະໜາດນ້ອຍນີ້ ສ່ວນຫຼາຍຍັງຂາດບົດຮຽນ ກ່ຽວກັບວຽກເອກະສານ ແລະ ຍັງຂາດປະສົບການລະວັງໄພ ຈາກການຕົ້ມຕຸ໋ນ ທາງອອນລາຍ. ດັ່ງນັ້ນ, ຈຶ່ງມີທ່າອ່ຽງຖືກຫຼອກລວງສໍ້ໂກງໄດ້ງ່າຍ. ຕົວເລກສຳຫຼວດຂອງ ຫວຽດນາມ ຊີ້ອອກວ່າ 52% ຂອງຫົວ ໜ່ວຍທຸລະກິດຫວຽດນາມ ແຈ້ງວ່າ ເຄີຍຖືກຫຼອກລວງ ໃນເວລາເຂົ້າຮ່ວມງານ ການຄ້າສາກົນ ປະຈຳປີ 2022. ຕົວເລກນີ້ ສູງກວ່າ 46% ເຊິ່ງເປັນຕົວເລກສະເລ່ຍໃນພາກພື້ນ ອາຊີປາຊີຟິກ ແລະ 49% ຕົວເລກສະເລ່ຍລະດັບໂລກ.
ປະເທດທີ່ມີການສໍ້ລາດ ບັງຫຼວງໜ້ອຍທີ່ສຸດ ອົງການຄວາມໂປ່ງໃສ ແລະ ຕ້ານການສໍ້ລາດບັງຫຼວງໂລກ ໄດ້ຈັດປະເທດ ສິງກະໂປ ຢູ່ໃນອັນດັບທີ 5 ທີ່ມີການສໍ້ລາດບັງຫຼວງ ໜ້ອຍທີ່ສຸດໃນໂລກ ໂດຍໄດ້ຮັບຄະແນນ 83/100. ຕົວເລກນີ້ໄດ້ມາຈາກການສຳຫຼວດໃນທົ່ວໂລກ ປະຈຳປີ 2023. ການໃຫ້ຄະແນນປະຕິບັດກັນດັ່ງນີ້: ຄະແນນ 0/100 ແມ່ນປະເທດທີ່ບັນຫາສໍ້ລາດບັງຫຼວງ ເປັນອັນດັບທີ 1, ຄະແນນ 100/100 ແມ່ນສຳລັບປະເທດ ທີ່ບໍ່ມີການສໍ້ລາດບັງຫຼວງເລີຍ. ແຕ່ຄະແນນ 100/100 ນີ້ບໍ່ມີປະເທດໃດໄດ້ເລີຍ ນັບແຕ່ມີການສຳຫຼວດເປັນຕົ້ນມາ. ປະເທດທີ່ມີບັນຫາສໍ້ລາດບັງຫຼວງ ໜ້ອຍທີ່ສຸດໃນປີ 2023 ແມ່ນປະເທດ ດານມາກ ເຊິ່ງມີຄະແນນສູງສຸດ 90/100. ສຳລັບໃນທະວີບເອີຣົບ, ປະເທດທີ່ມີການສໍ້ລາດບັງຫຼວງ ໜ້ອຍໄດ້ແກ່ ສະວີເດັນ (ຊູແອດ), ໂຮນລັງ, ອິດສະລັງ ແລະ ອັງກິດ. ແຕ່ເມື່ອສົມທຽບໃສ່ປີກ່ອນໆ, ຄະແນນທີ່ໄດ້ຮັບໃນປີ 2023 ນັ້ນ ຫຼຸດລົງຫຼາຍ ໂດຍສະເພາະແມ່ນ ອັງກິດ ນັ້ນໄດ້ຫຼຸດເກົ່າ 7 ຄະແນນ. ໃນຂົງເຂດ ອາຊີປາຊີຟິກ ນັ້ນ 4 ປະເທດ ແລະ ເຂດແຄວ້ນ ທີ່ມີການສໍ້ລາດບັງຫຼວງ ໜ້ອຍໄດ້ແກ່ ນູແວນເຊລັງ, ສິງກະໂປ, ອົດສະຕຼາລີ, ຍີ່ປຸ່ນ ແລະ ຮົງກົງ, ເຂດປົກຄອງພິເສດຂອງ ສປຈີນ.
ການແກ້ໄຂໃຫ້ປະເທດມີການສໍ້ລາດບັງຫຼວງ ຫຼຸດລົງໜ້ອຍເທົ່າໃດ ກໍຍິ່ງສາມາດດຶງດູດນັກລົງທຶນ-ນັກທ່ອງທ່ຽວຕ່າງປະເທດ ໄດ້ເພີ່ມຂຶ້ນ ເພາະພວກເຂົາຈະມີຄວາມໝັ້ນໃຈວ່າ ຈະບໍ່ຖືກໂກງ ຫຼື ຖືກຍັກຍອກເງິນ. ຂ່າວບອກວ່າ ຢູ່ປະເທດທີ່ມີການສໍ້ລາດບັງຫຼວງສູງນັ້ນ ວຽກງານມັກຈະບໍ່ມີປະສິດທິພາບສູງ, ເພາະຄົນມີແຕ່ຕ້ອງການ ຊອກລາຍຮັບກ້ອງໂຕະ ເພື່ອເຂົ້າຖົງຕົນເອງເທົ່ານັ້ນ.