ໃນລະຫວ່າງ ວັນທີ 29 ກໍລະກົດ – 02 ສິງຫາ 2024 ຜ່ານມານີ້, ທ່ານ ສົມຈິດ ຫັບລະກອນ ກໍາມະການຄະນະປະຈຳພັກແຂວງ, ຮອງປະທານ ຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 2, ຮອງປະທານ ຄະນະປະຈໍາສະພາປະຊາຊົນແຂວງ, ພ້ອມດ້ວຍຄະນະທີມງານສະພາປຊາຊົນແຂວງ ໄດ້ເຄື່ອນໄຫວລົງພົບປະຜູ້ມີສິດເລືອກຕັ້ງ ແລະ ຕິດຕາມກວດກາການຈັດຕັ້ງປະຕິບັດວຽກງານການເປັນເສນາທິການ ຂອງຄະນະສະມາຊິກສະພາປະຊາຊົນແຂວງ ປະຈໍາເມືອງ ໃຫ້ແກ່ຄະນະປະຈໍາສະພາປະຊາຊົນແຂວງ ທີ່ເມືອງໃໝ່ ແລະ ເມືອງຂວາ ແຂວງຜົ້ງສາລີ.
ຈຸດປະສົງການລົງພົບປະໃນຄັ້ງນີ້, ແມ່ນເພື່ອປະຕິບັດພາລະບົດບາດ, ສິດ ແລະ ໜ້າທີ່ ຂອງສະພາປະຊາຊົນແຂວງ ໃນການລົງພົບປະຜູ້ມີສິດເລືອກຕັ້ງ ແລະ ຕິດຕາມກວດກາ ການຈັດຕັ້ງປະຕິບັດວຽກງານ ການເປັນເສນາທິການ ໃຫ້ແກ່ຄະນະປະຈໍາ ສະພາປະຊາຊົນແຂວງ ຂອງຄະນະສະມາຊິກສະພາປະຊາຊົນແຂວງ ປະຈໍາເມືອງ ໃຫ້ມີຄວາມເຂັ້ມແຂງ ແລະ ມີປະສິດທິຜົນດີຂຶ້ນກວ່າເກົ່າ; ຮັບປະກັນໃນການຈັດຕັ້ງປະຕິບັດພາລະບົດບາດ ຂອງຄະນະສະມາຊິກສະພາປະຊາຊົນແຂວງ ປະຈໍາເມືອງ ໃນຖານະທີ່ເປັນຕົວແທນແຫ່ງສິດ ແລະ ຜົນປະໂຫຍດ ຂອງປະຊາຊົນບັນດາເຜົ່າ, ການຄົ້ນຄວ້າພິຈາລະນາຮັບຮອງເອົານິຕິກໍາ, ການຕົກລົງບັນຫາສໍາຄັນພື້ນຖານຂອງທ້ອງຖິ່ນ, ການຕິດຕາມກວດກາການເຄົາລົບ ແລະ ການຈັດຕັ້ງປະຕິບັດລັດຖະທໍາມະນູນ, ກົດໝາຍຂອງອົງການລັດຂັ້ນທ້ອງຖິ່ນໃຫ້ມີຄວາມຖືກຕ້ອງສອດຄ່ອງກັບລະບຽບກົດໝາຍ, ແນໃສ່ເພີ່ມທະວີຄວາມສັກສິດໃນການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ, ສືບຕໍ່ສ້າງ ແລະ ປັບປຸງອໍານາດລັດຂັ້ນທ້ອງຖິ່ນໃຫ້ມີຄວາມເຂັ້ມແຂງ, ປະກອບສ່ວນເຂົ້າໃນການສ້າງລັດທີ່ປົກຄອງດ້ວຍກົດໝາຍທີ່ມາຈາກປະຊາຊົນ, ໂດຍປະຊາຊົນ ແລະ ເພື່ອຜົນປະໂຫຍດຂອງປະຊາຊົນຢ່າງແທ້ຈິງ; ເພື່ອຮັບຟັງການລາຍງານ, ແລກປ່ຽນຄໍາຄິດເຫັນ, ສະຫຼຸບຕີລາຄາ ແລະ ເກັບກໍາຂໍ້ມູນການລົງພົບປະຜູ້ມີສິດເລືອກຕັ້ງ ແລະ ຕິດຕາມກວດກາ ການຈັດຕັ້ງປະຕິບັດວຽກງານ ການເປັນເສນາທິການ ໃຫ້ແກ່ຄະນະປະຈໍາສະພາປະຊາຊົນແຂວງ ຂອງຄະນະສະມາຊິກສະພາປະຊາຊົນແຂວງ ປະຈໍາເມືອງໃໝ່ ແລະ ເມືອງຂວາ, ພ້ອມທັງນໍາເອົາຜົນສໍາເລັດກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ຈັດຕັ້ງຜັນຂະຫຍາຍ ໂຄສະນາເຜີຍແຜ່ເຜີຍແຜ່ໃຫ້ຜູ້ມີສິດເລືອກຕັ້ງຮັບຮູ້ຢ່າງກວ້າງຂວາງ ໂດຍໄດ້ເນັ້ນໃສ່ຈຸດເທດສະບານເມືອງ ແລະ ບັນດາບ້ານເປົ້າໝາຍ. ໃນນີ້, ຢູ່ເມືອງໃໝ່ ມີໜຶ່ງຈຸດຢູ່ເທດສະບານເມືອງ ແລະ ບ້ານເປົ້າໝາຍສອງຈຸດ ຄື: ບ້ານຫ້ວຍຈິກ, ບ້ານ ແສນອາດ; ຢູ່ເມືອງຂວາ ມີໜຶ່ງຈຸດຢູ່ເທດສະບານເມືອງ ແລະ ບ້ານເປົ້າໝາຍສອງຈຸດ ຄື: ບ້ານຫ້ວຍປາ, ບ້ານຊາງຫ້ວຍ.
ກອງປະຊຸມໄດ້ຮັບຟັງການລາຍງານຈາກບັນດາເມືອງ ກ່ຽວກັບການຈັດຕັ້ງປະຕິບັດວຽກງານຮອບດ້ານ ໄລຍະ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2024 ຂອງອົງການປົກຄອງເມືອງ ແລະ ຂອງຄະນະສະມາຊິກສະພາປະຊາຊົນແຂວງ ປະຈໍາເມືອງ; ການຈັດຕັ້ງປະຕິບັດໃນການເປັນເສນາທິການຂອງໜ່ວຍງານຊ່ວຍວຽກ ໄລຍະ 6 ເດືອນຕົ້ນປີ ແລະ ແຜນວຽກ 6 ເດືອນທ້າຍປີ 2024 ຂອງເມືອງໃໝ່ ແລະ ເມືອງຂວາ. ບັນດາເນື້ອໃນທີ່ທາງຄະນະທີມງານສະພາປະຊາຊົນແຂວງ ລົງເຜີຍແຜ່ມີບັນດາມະຕິຂອງຄະນະປະຈໍາສະພາປະຊາຊົນແຂວງ ເລກທີ 308/ຄປຈຂ ວ່າດ້ວຍການພົບປະປະຊາຊົນ ຂອງສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 2 ແລະ ສະມາຊິກສະພາປະຊາຊົນແຂວງ ຊຸດທີ II; ມະຕິຂອງຄະນະປະຈໍາສະພາປະຊາຊົນແຂວງ ເລກທີ 39/ຄປຈຂ ວ່າດ້ວຍການຮັບ ແລະ ພິຈາລະນາ ຄໍາຮ້ອງຂໍຄວາມເປັນທໍາ; ເນື້ອໃນຜົນສໍາເລັດກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II. ຫຼັງຈາກນັ້ນ, ເປີດໂອກາດໃຫ້ບັນດາທ່ານຜູ້ມີສິດເລືອກຕັ້ງ ຜັດປ່ຽນກັນປະກອບຄໍາຄິດເຫັນ ແລະ ມີບາງຂໍ້ສະເໜີຕ່າງໆ ທີ່ເຕັມໄປດ້ວຍຄວາມໝາຍຄວາມສໍາຄັນ ເພື່ອຊອກເຫັນໄດ້ ດ້ານດີ ທີ່ຄວນເສີມສະຫຍາຍ, ດ້ານອ່ອນ ຂໍ້ຄົງຄ້າງທີ່ຈະພ້ອມກັນຊຸກຍູ້ແກ້ໄຂໃນຕໍ່ໜ້າ. ຈາກນັ້ນ, ຄະນະທີມງານຂັ້ນເມືອງ ແລະ ຂັ້ນແຂວງ ກໍໄດ້ຊີ້ແຈງໃຫ້ຜູ້ມີສິດເລືອກຕັ້ງຮັບຮູ້ ເຂົ້າໃຈເຖິງສະພາບການຂອງໂລກ ແລະ ພາກພື້ນ ທີ່ຍັງສືບຕໍ່ຜັນແປຢ່າງສັບສົນ, ຢູ່ພາຍໃນປະເທດ ກໍຄືແຂວງພວກເຮົາ ຍັງສືບຕໍ່ມີຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ອື່ນໆ ພ້ອມທັງນໍາເອົາບາງຄຳສະເໜີ ຂອງປະຊາຊົນທີ່ຍັງເຫັນວ່າມີຄວາມຫຍຸ້ງຍາກໃນແຕ່ລະບ້ານ ໂດຍສະເພາະແມ່ນກ່ຽວກັບພື້ນຖານໂຄງລ່າງ ເພື່ອນໍາມາຄົ້ນຄວ້າ, ພິຈາລະນາ ແລະ ສັງລວມສົ່ງໃຫ້ພາກສ່ວນກ່ຽວຂ້ອງ ຮີບຮ້ອນແກ້ໄຂຕາມຄວາມເໝາະສົມທັນຕາມກຳນົດເວລາ.
ໃນໂອກາດທີ່ມີຄວາມໝາຍຄວາມສໍາຄັນນີ້, ທ່ານ ສົມຈິດ ຫັບລະກອນ ກໍາມະການປະຈຳພັກແຂວງ, ຮອງປະທານ ຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 2, ຮອງປະທານ ຄະນະປະຈໍາສະພາປະຊາຊົນແຂວງ ຍັງໄດ້ຍົກໃຫ້ເຫັນບາງມາດຕະການໃນການສະກັດກັ້ນ ແລະ ແກ້ໄຂປະກົດການຫຍໍ້ທໍ້ໃນສັງຄົມ ໃຫ້ເດັດຂາດ; ການສຶກສາອົບຮົມການເມືອງ-ແນວຄິດ ໃຫ້ພະນັກງານ, ທະຫານ-ຕໍາຫລວດ ຕະຫລອດຮອດພໍ່ແມ່ປະຊາຊົນບັນດາເຜົ່າ ໃຫ້ເລິກເຊິ່ງ-ໜັກແໜ້ນ; ແບບແຜນການນໍາພາ – ຊີ້ນໍາໃຫ້ແທດເຖິງຕົວຈິງ ແລະ ພ້ອມກັນແກ້ໄຂຂໍ້ຫຍຸ້ງຍາກອຸດຕັນຕ່າງໆ ເປັນຕົ້ນໄພເງິນເຟີ້ ໂດຍຢືດໝັ້ນ 9 ຄາດໝາຍ ແລະ ຈຸດໝາຍສະເພາະໜ້າທີ່ລັດຖະບານຕ້ອງແກ້ໄຂບັນຫາ ຄື: (1) ເອົາຄ່າເງິນກີບທີ່ອ່ອນລົງ ໃຫ້ຢຸດພາຍໃນ 1 ເດືອນ; (2) ເອົາອັດຕາເງິນເຟີ້ໃຫ້ລົງເປັນກ້າວໆ; (3) ຄຸ້ມຄອງລາຄາສິນຄ້າໃຫ້ຮັດກຸມ, ສົມເຫດສົມຜົນ; (4) ແກ້ໄຂຄ່າຄອງຊີບຂອງພະນັກງານ, ລັດຖະກອນ, ທະຫານ, ຕໍາຫຼວດ, ຄູ ແລະ ແພດໝໍ; (5) ເພີ່ມຄັງສໍາຮອງເງິນຕາຕ່າງປະເທດຂຶ້ນຕື່ມ; (6) ຕັ້ງໜ້າຫຼຸດຜ່ອນການໃຊ້ເງິນຕາໃຫ້ຫຼຸດລົງ; (7) ຕັດສິນໃຈສູງໃນການປະຕິບັດມາດຕະການປະຢັດມັດທະຍັດ; (8) ແກ້ໄຂດ່ວນ, ແກ້ຂາດຕົວບັນດາກົນໄກ ອືດອັດ, ຊັກຊ້າ, ບໍ່ໂປ່ງໃສ ແລະ (9) ສືບຕໍ່ເກັບກູ້ໜີ້ສິນ, ທວງໜີ້ສິນ ມາໃຫ້ລັດ. ການລົງພົບປະຜູ້ມີສິດເລືອກຕັ້ງ ແລະ ຕິດຕາມກວດກາ ໃນຄັ້ງນີ້ ແມ່ນໄດ້ຮັບທຶນສະໜັບສະໜູນຂອງໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ (STEPS).
(ພາບ-ຂ່າວ: ພອນແກ້ວປະເສີດ ສຸລິວົງ)