ໃນວັນທີ 9 ພຶດສະພາ2022 ຢູ່ທີ່ຫ້ອງວ່າການແຂວງທ່ານ ສົມມາດ ພົລເສນາ ກຳມະການສູນກາງພັກ ຮອງປະທານສະພາປະຊາຊົນແຂວງພ້ອມດ້ວຍຄະນະໄດ້ເຂົ້າພົບ ທ່ານ ບຸນຈັນ ສີວົງພັນ ເລຂາພັກແຂວງ ເຈົ້າແຂວງໆຊຽງຂວາງ ໂດຍໃຫ້ກຽດ ເຂົ້າຮ່ວມຂອງ ທ່ານ ບຸນໂຮມ ເທດທານີ ຮອງເລຂາພັກແຂວງ ປະທານສະພາປະຊາຊົນແຂວງ. ໃນໂອກາດດັ່ງກ່າວ ທ່ານ ບຸນຈັນ ສີວົງພັນ ໄດ້ລາຍງານສະພາບການການຈັດຕັ້ງປະຕິບັດວຽກງານທີ່ພົ້ນເດັ່ນຢູ່ໃນແຂວງຊຽງຂວາງໃນໄລຍະຜ່ານມາ ໂດຍສະເພາະແມ່ນສະພາບການພັດທະນາເສດຖະກິດ-ສັງຄົມມີທ່າຂະຫຍາຍຕົວຢ່າງບໍ່ ຢຸດຢັ້ງ, ສັງຄົມມີຄວາມສະຫງົບໂດຍພື້ນຖານ. ນອກນີ້ແຂວງຊຽງຂວາງຍັງຖືເອົາວຽກງານກະສິກຳເປັນຕົ້ນແມ່ນ: ການປຸກຟັງ, ລ້ຽງສັດເປັນທ່າແຮງໃນການພັດທະນະເສດຖະກິດ-ສັງຄົມ.
ທ່ານ ສົມມາດ ພົລເສນາ ໄດ້ຍ້ອງຍໍຊົມເຊີຍຕໍ່ການຈັດຕັ້ງປະຕິບັດວຽກງານຂອງແຂວງຊຽງຂວາງທີ່ມີທ່າຂະຫຍາຍຕົວທີ່ດີຂຶ້ນ ແລະ ທ່ານຍັງໄດ້ກ່າວຈຸດປະສົງທີ່ລົງມາເຄື່ອນໄຫວວຽກງານຢູ່ແຂວງຊຽງຂວາງໃນຄັ້ງນີ້ ເພື່ອລົງຕິດຕາມ ແລະ ຊຸກຍູ້ປະເມີນການຈັດຕັ້ງປະຕິບັດ ກົດໝາຍ 4 ສະບັບ (ກົດໝາຍວ່າດ້ວຍທີ່ດິນ, ກົດໝາຍວ່າດ້ວຍການສົ່ງເສີມການລົງທຶນ, ກົດໝາຍວ່າດ້ວຍຊັບສິນຂອງລັດແລະກົດໝາຍວ່າດ້ວຍແຮ່ທາດ) ທີ່ຕິດພັນກັບວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ.
ສະພາປະຊາຊົນແຂວງຊຽງຂວາງ
ຂ່າວໂດຍ: ນາງສຸກສະຫວັນອິນທະແສງ