​(ສພຊ) ໃນລະຫວ່າງວັນທີ 27-28 ສິງຫາ 2021 ທ່ານ ພົທ. ສຸວອນ ເລືອງບຸນມີ ຮອງປະທານສະພາແຫ່ງຊາດ ທັງເປັນສະມາຊິກສະພາແຫ່ງຊາດ (ສສຊ) ປະຈໍາເຂດເລືອກຕັ້ງທີ 7 ແຂວງໄຊຍະບູລີ ພ້ອມດ້ວຍຄະນະຮ່ວມກັບທ່ານ ເພັງນິລັນ ຄໍາພັນເພັງ ປະທານສະພາປະຊາຊົນແຂວງ ໄດ້ເຄື່ອນໄຫວພົບປະຜູ້ມີສິດເລືອກຕັ້ງຢູ່ 4 ເມືອງຄື: ເມືອງຄອບ, ຊຽງຮ່ອນ, ຊຽງເງິນ ແລະ ຫົງສາ ແຂວງໄຊຍະບູລີ.

​      ໂອກາດດັ່ງກ່າວ, ຄະນະໄດ້ຮັບຟັງການລາຍງານ ສະພາບການພັດທະນາເສດຖະກິດ-ສັງຄົມໂດຍຫຍໍ້ຈາກເຈົ້າເມືອງທັງ 4 ເມືອງ; ຈາກນັ້ນ, ທ່ານຮອງປະທານສະພາແຫ່ງຊາດ ໄດ້ມີຄໍາເຫັນໂອ້ລົມຕໍ່ຜູ້ທີ່ມີສິດເລືອກຕັ້ງ ໂດຍທ່ານໄດ້ກ່າວສະແດງຄວາມຂອບໃຈຕໍ່ຜູ້ທີ່ມີສິດເລືອກຕັ້ງ ທີ່ໄດ້ໃຫ້ຄວາມໄວ້ເນື້ອເຊື່ອໃຈເລືອກເອົາເປັນ ສສຊ ປະຈໍາເຂດເລືອກຕັ້ງແຂວງໄຊຍະບູລີ; ພ້ອມນັ້ນ, ທ່ານກໍໄດ້ເຜີຍແຜ່ໃຫ້ຮູ້ກ່ຽວກັບຜົນສໍາເລັດກອງປະຊຸມສະໄໝວິສາມັນເທື່ອທີ 1 ຂອງສະພາແຫ່ງຊາດຊຸດທີ IX, ສະພາບການແຜ່ລະບາດຂອງພະຍາດໂຄວິດ-19 ແລະ ຜົນສໍາເລັດຂອງການໂຮມຊຸມນຸມສະເຫລີມ ສະຫລອງວັນລັດຖະທໍາມະນູນແຫ່ງຊາດ ຄົບຮອບ 30 ປີ ແລະ ໄດ້ເນັ້ນຫນັກໃຫ້ບັນດາຜູ້ທີ່ມີສິດປ່ອນບັດເລືອກຕັ້ງທີ່ເຂົ້າຮ່ວມຄັ້ງນີ້ ເອົາໃຈໃສ່ຕັ້ງໜ້າປະຕິບັດສິດໜ້າທີ່ຂອງຕົນ ເປັນແບບຢ່າງທີ່ດີໃຫ້ແກ່ພໍ່ແມ່ປະຊາຊົນ ໃນການປະຕິບັດຕາມມະຕິກອງປະຊຸມໃຫຍ່ ຄັ້ງທີ XI ຂອງພັກ, ລັດຖະທໍາມະນູນ, ກົດໝາຍ ແລະ ກົດລະບຽບຕ່າງໆ, ກ້າຄິດກ້າເຮັດກ້າຮັບຜິດຊອບພ້ອມກັນຜ່ານຜ່າທຸກບັນຫາຫຍຸ້ງຍາກໃຫ້ບັນລຸຕາມຈຸດໝາຍທີ່ວາງໄວ້ ພ້ອມກັນປົກປັກຮັກສາ ແລະ ສ້າງສາແຂວງໄຊຍະບູລີໃຫ້ຈະເລີນຮຸ່ງເຮືອງ.

ຈາກນັ້ນ, ຄະນະ ໄດ້ນໍາເອົາເຄື່ອງຊ່ວຍເຫລືອເຄື່ອງໃຊ້ໄຟຟ້າໂຊລາເຊວ ມອບໃຫ້ກອງພັນໃຫຍ່ 301 ຈໍານວນ 4 ຊຸດ.

(ພາບ ແລະຂ່າວ: ສອນສັກ ວັນວິໄຊ)