ເພື່ອເຮັດໃຫ້ແຜນການຕິດຕາມກວດກາ ການຈັດຕັ້ງປະຕິບັດຍຸດທະສາດການປະຕິຮູບລະບົບການສຶກສາ ແລະ ການພັດທະນາຊັບພະຍາກອນມະນຸດ ໃນໄລຍະຜ່ານມາ ໃຫ້ໄດ້ຮັບການຈັດຕັ້ງປະຕິບັດເປັນເອກະພາບໃນທົ່ວປະເທດ ຮັບປະກັນປະສິດທິພາບ ແລະ ປະສິດທິຜົນ, ໃນວັນທີ 09 ກັນຍາ 2024 ນີ້ ທີ່ຫ້ອງປະຊຸມສະພາປະຊາຊົນແຂວງ ສະຫວັນນະເຂດ ໄດ້ຈັດກອງປະຊຸມຂຶ້ນ ໂດຍການເປັນປະທານຂອງທ່ານ ຄໍາໃບ ດໍາລັດ ຮອງປະທານສະພາແຫ່ງຊາດ ແຂກເຂົ້າຮ່ວມມີທ່ານ ຮອງເຈົ້າແຂວງ ຜູ້ຊີ້ນໍາຂົງເຂດວັດທະນະທໍາ-ສັງຄົມ, ຮອງປະທານສະພາປະຊາຊົນແຂວງ, ປະທ່ານ ແລະ ຮອງປະທານ ທັງ 03 ຄະນະກໍາມະການຂອງ ສພຂ, ຄະນະເລຂາທິການ, ຫົວໜ້າຫ້ອງວ່າການແຂວງ, ຄະນະຈັດຕັ້ງແຂວງ, ຄະນະໂຄສະນາອົບຮົມແຂວງ, ປະທານອົງການກວດກາລັດ, ປະທານແນວລາວສ້າງຊາດ, ປະທານສະຫະພັນນັກຮົບເກົ່າ, ອົງການຈັດຕັ້ງມະຫາຊົນ ແລະ ຕາງໜ້າບັນດາພະແນກການທີ່ກ່ຽວຂ້ອງເຂົ້າຮ່ວມ.
ປະທານກອງປະຊຸມໄດ້ກ່າວຈຸດປະສົງ ຂອງການລົງມາເຄື່ອນໄຫວເຮັດວຽກໃນຄັ້ງນີ້ກໍ່ເພື່ອຜັນຂະຫຍາຍມະຕິຂອງສະພາແຫ່ງຊາດ ກ່ຽວກັບວຽກງານການສຶກສາ ໃນໄລຍະຜ່ານມາ, ເພື່ອສຶກສາຄົ້ນຄວ້າ, ເກັບກໍາຂໍ້ມູນຍຸດທະສາດການປະຕິຮູບລະບົບການສຶກສາແຫ່ງຊາດ, ຍຸດທະສາດການພັດທະນາຊັບພະຍາກອນມະນຸດແຫ່ງຊາດ, ເພື່ອນໍາເອົາຂໍ້ມູນໄປວິເຄາະ, ວິໃຈ ໃຫ້ເຫັນ ດ້ານດີ/ດ້ານອ່ອນ, ຜົນສໍາເລັດ, ຂໍ້ຄົງຄ້າງ, ສາເຫດທີ່ເກີດຂຶ້ນ ແລະ ມີວິທີປັບປຸງແກ້ໄຂ ໃຫ້ໄດ້ຮັບຄຸນນະພາບຂອງການສຶກສາໃນໄລຍະໃໝ່, ເພື່ອລາຍງານຕໍ່ກອງປະຊຸມຄະນະປະຈໍາສະພາແຫ່ງຊາດ ແລະ ກອງປະຊຸມສະໄໝສາມັນ ເທື່ອທີ 08 ຂອງສະພາແຫ່ງຊາດ ຊຸດທີ IX, ເພື່ອຄົ້ນຄວ້າ ສ້າງຮ່າງມະຕິວ່າດ້ວຍການຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດຍຸດທະສາດການປະຕິຮູບລະບົບການສຶກສາ, ການພັດທະນາຊັບພະຍາກອນມະນຸດ ແລະ ທິດທາງແຜນພັດທະນາຂະແໝງການສຶກສາ ແລະ ກິລາ ໃນໄລຍະໃໝ່, ຕໍ່ຈາກນັ້ນກໍ່ໄດ້ຮັບຟັງການລາຍງານໂດຍສັງເຂບ ຈາກຕາງໜ້າພະແນກການທີ່ກ່ຽວຂ້ອງ, ພາຍຫຼັງທີ່ໄດ້ຮັບຟັງການລາຍງາຍແລ້ປະທານກອງປະຊຸມ ໄດ້ມີຄໍາຖາມເຈາະຈິ້ມໂດຍສະເພາະ ການຈັດຕັ້ງປະຕິບັດ ລັດຖະທໍາມະນູ, ກົດໝາຍ, ບັນດາມະຕິຂອງກອງປະຊຸມສະພາແຫ່ງຊາດ, ແຜນພັດທະນາຂະແໝງການສຶກສາ ແລະ ກິລາ ໃນໄລຍະຜ່ານມາ, ສະພາບການຮຽນ-ການສອນ, ການປະລະການຮຽນ, ການແກ້ໄຂບັນຫາການຄາດແຄນຄູ, ການສະໝອງງົບປະມານ, ອຸປະກອນການຮຽນ-ການສອນ, ການສະໝອງເບ້ຍລ້ຽງໃຫ້ແກ່ນັກຮຽນ ແລະ ສິ່ງອໍານວຍຄວາມສະດວກໃຫ້ແກ່ການສຶກສາ, ບັນດາແຂກທີ່ເຂົ້າຮ່ວມກອງປະຊຸມກໍ່ໄດ້ປະກອບຄໍາເຫັນຢ່າງກົງໄປກົງມາ ບົນພື້ນຖານຄວາມເປັນຈິງ ທີ່ເກີດຂຶ້ນໃນສັງຄົມປະຈຸບັນ.
ທ້າຍສຸດປະທານກອງປະຊຸມກໍ່ໄດ້ມີຄໍາເຫັນສະຫຼຸບ ແລະ ມີທິດຊີ້ນໍາ ພ້ອມທັງສະເໜີໃຫ້ບັນດາພະແນກການທີ່ກ່ຽວຂ້ອງ ເອົາໃຈໃສ່ວິເຄາະ ວິໃຈ ບັນຫາທີ່ເກີດຂຶ້ນ, ສາມາດຊອກຫາວິທີການ ແລະ ມາດຕະການ ປັບປຸງແກ້ໄຂ ເພື່ອເຮັດໃຫ້ລະບົບການສຶກສາ ໃນໄລຍະໃໝ່ໃຫ້ໄດ້ຮັບປະສິດທິພາບ ປະສິດທິຜົນ ຕາມຂາດໝາຍທີ່ກໍາໜົດໄວ້.
ເນື່ອງໃນໂອກາດທີ່ໄດ້ລົງມາເຄື່ອນໄຫວເຮັດວຽກທີ່ແຂວງສະຫວັນນະເຂດນີ້ ທ່ານຮອງປະທານສະພາແຫ່ງຊາດ ພ້ອມດ້ວຍຄະນະກໍ່ໄດ້ລົງເຄື່ອນໄຫວເຮັດວຽກຮ່ວມກັບອໍານາດການປົກຄອງເມືອງ ອຸທຸມພອນ, ຮັບຟັງການລາຍງານສະພາບລວມຂອງເມືອງ ຈາກທີ່ານເຈົ້າເມືອງ ແລະ ບັນດາຫ້ອງການອ້ອມຂ້າງເມືອງ, ໃນໂອກາດນີ້ທາງຄະນະກໍ່ໄດ້ມອບອຸປະກອນການຮຽນ, ຊຸດຮຽນຊາຍ-ຍິງ ແລະຊຸດກິລາ ໃຫ້ຫ້ອງການສຶກສາ ແລະ ກິລາເມືອງ ນໍາໄປແຈກຢາຍຕາງຄວາມເໝາະສົມ, ຫຼັງຈາກນັ້ນທາງຄະນະກໍ່ໄດ້ໄປຢ້ຽມຢາມ ແລະ ເຮັດວຽກກັບສະຖາບັນ ໄຊສົມບັດ ເຕັກໂນໂລຊີ ຕື່ມອີກ.