(ສພຊ) – ເພື່ອເປັນການປະກອບສ່ວນເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີລະຫວ່າງສອງປະເທດ ໃຫ້ນັບມື້ນັບຂະຫຍາຍຕົວ ແລະ ເປັນຮູບປະທໍາຍິ່ງໆຂຶ້ນ, ທ່ານ ຄໍາໃບ ດຳລັດ ຮອງປະທານສະພາແຫ່ງຊາດ ພ້ອມດ້ວຍຄະນະ ໄດ້ພົບປະກັບທ່ານ ມອນເດີ ບູເດນ (Monder Bouden) ຮອງປະທານສະພາປະຊາຊົນແຫ່ງຊາດ (ສະພາຕໍ່າ) ແຫ່ງ ສາທາລະນະລັດ ປະຊາທິປະໄຕ ປະຊາຊົນອານ ເຊຣີ ພ້ອມດ້ວຍຄະນະ ໃນຕອນແລງວັນທີ 19 ຕຸລາຜ່ານມາ ໂອກາດທີ່ເຂົ້າຮ່ວມກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຫຼື ໄອປາ (AIPA) ຄັ້ງທີ 45.

ໃນການພົບປະ, ສອງຝ່າຍໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືອັນດີລະຫວ່າງສອງປະເທດ ລາວ-ອານເຊຣີ ກໍຄືລະຫວ່າງສອງອົງການນິຕິບັນຍັດ ພ້ອມທັງແຈ້ງສະພາບການທີ່ພົ້ນເດັ່ນຂອງປະເທດ ແລະ ວຽກງານຂອງອົງການນິຕິບັດຍັດໃຫ້ກັນແລະກັນຊາບ; ໄລຍະຜ່ານມາ, ສະພາແຫ່ງຊາດລາວ ແລະ ສະພາປະຊາຊົນແຫ່ງຊາດອານເຊຣີ ໄດ້ມີການແລກປ່ຽນສານຊົມເຊີຍ ແລະ ສານອວຍພອນໃນໂອກາດວັນສຳຄັນຕ່າງໆຂອງ 2 ປະເທດ ; ຮ່ວມມື, ສະໜັບສະໜູນ ແລະ ຊ່ວຍເຫຼືອເຊິ່ງກັນແລະກັນໃນເວທີລັດຖະສະພາພາກພື້ນ ແລະ ສາກົນ ເປັນຕົ້ນແມ່ນເວທີໄອປາ, ອາເຊັບ (ASEP ການຮ່ວມມືລະຫວ່າງລັດຖະສະພາອາຊຽນ ແລະ ເອີຣົບ), ໄອພີຢູ (IPU ສະຫະພັນລັດຖະສະພາສາກົນ) ແລະ ອົງການອື່ນໆ. ສອງຝ່າຍຍັງໄດ້ສະເໜີທິດທາງແຜນການພົວພັນຮ່ວມມືກັນໃນຕໍ່ໜ້າ ໂດຍສືບຕໍ່ແລກປ່ຽນການຢ້ຽມຢາມຂອງຄະນະຜູ້ແທນຂັ້ນສູງ, ກຳມາທິການ, ຄະນະເລຂາທິການ ແລະ ຄະນະມິດຕະພາບລັດຖະສະພາຂອງສອງປະເທດ ທັງຮ່ວມກັນຈັດກອງປະຊຸມສໍາມະນາ, ທັດສະນະສຶກສາ ແລະ ຈັດກອງປະຊຸມແບບເຊິ່ງໜ້າ ແລະ ຜ່ານລະບົບເອເລັກໂຕຣນິກ; ສືບຕໍ່ແລກປ່ຽນຄໍາເຫັນ, ຮ່ວມມື, ຊ່ວຍເຫຼືອ ແລະ ສະໜັບສະໜູນເຊິ່ງກັນແລະກັນໃນເວທີລັດຖະສະພາພາກພື້ນ ແລະ ສາກົນ.

(ນາງ ອາລິນ ສຸພິມມະປະດິດ)