ວັນທີ 7-8 ສິງຫາ 2018 ທ່ານ ປ.ອ ບຸນປອນ ບຸດຕະນະວົງ ຮອງປະທານສະພາແຫ່ງຊາດ ທັງເປັນສະມາຊິກ ສະພາແຫ່ງຊາດ ປະຈໍາເຂດເລືອກຕັ້ງທີ 12 ແຂວງຄຳມ່ວນ ພ້ອມດ້ວຍຄະນະ ໄດ້ເຄື່ອນໄຫວຕິດຕາມກ່ຽວກັບສະພາບ ນໍ້າຖ້ວມຢູ່ແຂວງຄຳມ່ວນ, ໂດຍການຕ້ອນຮັບຂອງທ່ານ ໂອໄດ ສຸດາພອນ ເຈົ້າແຂວງໆຄໍາມ່ວນ, ມີປະທານສະພາປະ ຊາຊົນແຂວງ, ຄະນະກຳມະການປ້ອງກັນ ແລະ ຄວບຄຸມໄພພິບັດຂັ້ນແຂວງເຂົ້າຮ່ວມ.

ທ່ານ ບຸນມີ ພິມມະສອນ ຮອງເຈົ້າແຂວງໆຄໍາມ່ວນ, ປະທານຄະນະກຳມະການປ້ອງກັນ ແລະ ຄວບຄຸມໄພພິບັດຂັ້ນແຂວງໄດ້ລາຍງານສະພາບໄພພິບັດຢູ່ແຂວງຄໍາມ່ວນ ວ່າ: ສະພາບການນໍ້າຖ້ວມຮອດວັນທີ 6 ສິງຫາ 2018 ໃນທົ່ວແຂວງ ມີບ້ານທີ່ຖືກຜົນກະທົບຈາກໄພນໍ້າຖ້ວມ 400 ບ້ານ, ມີ 31.020 ຄອບຄົວ, ມີເນື້ອທີ່ນາປີຖືກຖ້ວມທັງໝົດ 36.187 ເຮັກຕາ, ເທົ່າກັບ 44,80% ຂອງເນື້ອທີ່ປັກດໍາຕົວຈິງ, ຄາດຄະເນຜົນເສຍຫາຍປະມານ 13.356 ເຮັກຕາ, ມີເນື້ອທີ່ສວນຖືກຖ້ວມ 683 ເຮັກຕາ, ເສຍຫາຍ 298 ເຮັກຕາ, ຄວາຍ 51 ໂຕ, ງົວ 182 ໂຕ, ແບ້ 140 ໂຕ, 180 ໂຕ, ສັດປີກ 7.498 ໂຕ ແລະ ໜອງປາ 413 ໜອງ, ຊົນລະປະທານຖືກຖ້ວມ 129 ແຫ່ງ, ໂຮງຮຽນ 109 ແຫ່ງ, ສຸກສາລາ 16 ແຫ່ງ; ນອກນັ້ນ ຍັງມີເສັ້ນທາງທີ່ຖືກຕັດຂາດລະຫວ່າງບ້ານຕໍ່ບ້ານຫລາຍສາຍ ບໍ່ສາມາດທຽວໄປ-ມາໄດ້. ພ້ອມນັ້ນ ຍັງມີບ້ານທີ່ຖືກຕັດກະແສໄຟຟ້າ ແລະ ໝໍ້ແປງໄຟຖືກເສຍຫາຍຍ້ອນຖືກນໍ້າຖ້ວມ, ມີບ້ານທີ່ຖືກນໍ້າຖ້ວມ ທີ່ຢູ່ອາໃສ ແລະ ໄດ້ຍົກຍ້າຍປະຊາຊົນໄປຢູ່ຕາມຈຸດພັກຊົ່ວຄາວ ຈໍານວນ 34 ບ້ານ, ມີ 1.718 ຄອບຄົວ, ມີພົນລະເມືອງທັງໝົດ 8.138 ຄົນ. ສໍາລັບການປຸກລະດົມຮັບເຄື່ອງບໍລິຈາກ ເຊິ່ງໄດ້ເລີ່ມແຕ່ວັນທີ 25 ກໍລະກົດ 2018 ມາຮອດວັນທີ 5 ສິງຫາ 2018 ໄດ້ຮັບການຊ່ວຍເຫລືອສິ່ງຂອງອຸປະໂພກ-ບໍລິໂພກ ແລະ ເງິນສົດທັງໝົດ ມູນຄ່າ 4 ຕື້ກວ່າກີບ, ໃນນີ້ ເປັນເຄື່ອງອຸປະໂພກ-ບໍລິໂພກ 3 ຕື້ກີບ ແລະ ເງິນສົດ 1 ຕື້ກີບ.

ໂອກາດດັ່ງກ່າວ ທ່ານຮອງປະທານສະພາແຫ່ງຊາດ ໄດ້ມີຄໍາເຫັນໂອ້ລົມ ເຊິ່ງທ່ານໄດ້ຮຽກຮ້ອງໃຫ້ມີການປະ ສານສົມທົບກັບພາກສ່ວນຕ່າງໆ ເກັບກໍາຂໍ້ມູນສະພາບຜົນເສຍຫາຍ ໂດຍສະເພາະຂົງເຂດການຜະລິດກະສິກຳ ເພື່ອວາງ ແຜນການແກ້ໄຂ ຟື້ນຟູຊີວິດການເປັນຢູ່ຂອງປະຊາຊົນ, ອາດຈະມີການຊຸກຍູ້ໃຫ້ປະຊາຊົນເຮັດນາຕ່າວ ຫລື ປູກພືດ ສິນຄ້າອື່ນໆເພື່ອທົດແທນກັບຜົນຜະລິດທີ່ເສຍໄປ ໂດຍຕິດພັນກັບຕະຫລາດຮອງຮັບ ເພື່ອຮັບປະກັນໃຫ້ແກ່ຜົນຜະລິດ ຂອງປະຊາຊົນ, ສົມທົບກັບພາກສ່ວນກ່ຽວຂ້ອງໃນການຊອກຫາແນວພັນພືດຕ່າງໆ ເພື່ອສະໜອງໃຫ້ປະຊາຊົນ, ຂົງ ເຂດສຶກສາ, ສາທາລະນະສຸກ ຕ້ອງໄດ້ເກັບກໍາຂໍ້ມູນເພື່ອປະເມີນຜົນເສຍຫາຍ ເປັນຕົ້ນແມ່ນໂຮງຮຽນທີ່ຖືກຖ້ວມມີຜົນ ເສຍຫາຍຄືແນວໃດ ພ້ອມທັງແຜນປົວແປງໃຫ້ທັນກັບລະດູການເປີດສົກຮຽນໃໝ່ໃນມໍ່ໆນີ້, ໂດຍສະເພາະແມ່ນສຸກສາ ລາທີ່ຖືກເສຍຫາຍ ພ້ອມທັງຕິດຕາມຢ່າງໃກ້ຊິດບັນຫາພະຍາດລະບາດຕ່າງໆທີ່ອາດຈະເກີດຂຶ້ນ ລວມທັງການຕິດຕາມພະຍາກອນອາກາດເປັນປົກກະຕິ ເພື່ອກະກຽມຄວາມພ້ອມຕະຫລອດເວລາຮັບມືກັບໄພພິບັດທີ່ອາດຈະເກີດຂຶ້ນໃນຕໍ່ໜ້າ.

ໃນໂອກາດຢ້ຽມຢາມແຂວງຄຳມ່ວນ ທ່ານຮອງປະທານສະພາແຫ່ງຊາດ ຍັງໄດ້ນຳເອົາເຄື່ອງອຸປະໂພກ-ບໍລິໂພກ ລວມມູນຄ່າ 100 ລ້ານກີບ, ໃນນີ້ມີເງິນສົດ ຈໍານວນ 30 ລ້ານກີບ, ມອບໃຫ້ອໍານາດການປົກຄອງແຂວງຄຳມ່ວນ ເພື່ອນຳໄປຊ່ວຍເຫລືອບັນເທົາທຸກຢູ່ບັນດາເມືອງຕ່າງໆ, ພ້ອມນັ້ນຍັງໄດ້ເດີນທາງໄປຢ້ຽມຢາມປະຊາຊົນທີ່ຖືກຜົນກະທົບຢູ່ເມືອງເຊບັ້ງໄຟ ເມືອງໜອງບົກ ແລະ ເມືອງມະຫາໄຊ ພ້ອມມອບເຄື່ອງຊ່ວຍເຫລືອອີກຈໍານວນໜຶ່ງ ໃຫ້ບັນດາເມືອງດັ່ງກ່າວ.

ພາບ ແລະ ຂ່າວ: ເທບພະພອນ ສຸພາໂກສົນ