(ສພຊ) – ເພື່ອສ້າງຄວາມເຂົ້າໃຈ ແລະ ເປັນເອກະພາບໃນການນໍາໃຊ້ຄູ່ມືການຕິດຕາມກວດກາການປະເມີນຜົນການຈັດຕັ້ງປະຕິບັດຂໍ້ຕົກລົງຂອງເຈົ້າແຂວງ, ເຈົ້າຄອງນະຄອນຫຼວງ ຂອງລັດຖະກອນສະພາປະຊາຊົນແຂວງ (ສພຂ) ຄໍາມ່ວນ ທັງເປັນການກວດກາຄວາມພ້ອມຂອງຄູ່ມືທີ່ຈະຈັດພິມໃນຕໍ່ໜ້າ; ກໍາມາທິການກົດໝາຍ ໄດ້ຈັດກອງປະຊຸມທົດລອງການນໍາໃຊ້ຄູ່ມືການຕິດຕາມກວດກາການປະເມີນຜົນການຈັດຕັ້ງປະຕິບັດຂໍ້ຕົກລົງຂອງເຈົ້າແຂວງ, ເຈົ້າຄອງນະຄອນຫຼວງ ໃນວັນທີ 29-31 ສິງຫາຜ່ານມາ ທີ່ເມືອງເຊບັ້ງໄຟ ແຂວງຄໍາມ່ວນ ໂດຍການເປັນປະທານຂອງທ່ານ ອຳໄພ ຈິດມານົນ ຮອງປະທານກຳມາທິການກົດໝາຍ ເຊິ່ງມີທ່ານ ບົວພັນ ແສງຈັນ ຮອງປະ ທານສະພາປະຊາຊົນແຂວງ, ບັນດາທ່ານຄະນະປະຈຳ ສພຂ ພ້ອມດ້ວຍພະນັກງານ-ລັດຖະກອນຈາກກົມຕິດຕາມກວດກາ, ໂຄສະນາ ແລະ ຕີຄວາມໝາຍກົດໝາຍ ແລະ ຈາກ ສພຂ ຄໍາມ່ວນ ເຂົ້າຮ່ວມ 28 ທ່ານ, ຍິງ 5 ທ່ານ.
ກອງປະຊຸມຄັ້ງນີ້ ມີຄວາມສໍາຄັນຫຼາຍ ເນື່ອງຈາກວ່າການຕິດຕາມກວດກາການປະເມີນຜົນການຈັດຕັ້ງປະ ຕິບັດຂໍ້ຕົກລົງຂອງເຈົ້າແຂວງ, ເຈົ້າຄອງນະຄອນຫຼວງ ເປັນວຽກງານໃໝ່ທີ່ພະນັກງານ-ລັດຖະກອນໃນຖານະທີ່ເປັນເສນາທິການໃຫ້ແກ່ສະພາປະຊາຊົນຂັ້ນແຂວງ; ຜູ້ເຂົ້າຮ່ວມ ໄດ້ນຳເອົາວຽກງານຕົວຈິງ ໂດຍສະເພາະແມ່ນນິຕິກໍາຂອງແຂວງ ມາທົດລອງເຮັດການຕິດຕາມກວດກາການປະເມີນຜົນການຈັດຕັ້ງປະຕິບັດຕາມຄູ່ມືທີ່ຮ່າງຂຶ້ນ, ນອກ ຈາກນັ້ນ ຍັງໄດ້ແລກປ່ຽນບົດຮຽນຕົວຈິງທີ່ປະຕິບັດຜ່ານມາ ເພື່ອສົມທຽມກັບເນື້ອໃນຂອງຄູ່ມືອີກດ້ວຍ.
ກອງປະຊຸມໄດ້ຮັບການສະໜັບສະໜູນຈາກມູນນິທິເວດມິນເທີ ເພື່ອປະຊາທິປະໄຕ (Westminster Foundation for Democracy-WFD).
(ກົມຕິດຕາມກວດກາ, ໂຄສະນາ ແລະ ຕີຄວາມໝາຍກົດໝາຍ)