ໃນຕອນບ່າຍຂອງວັນທີ 9 ມິຖຸນາ 2022 ຢູ່ທີ່ສະພາປະຊາຊົນແຂວງບໍລິຄໍາໄຊ ໄດ້ຈັດພິທີມອບ-ຮັບໃບຢັ້ງຢຶນ ແລະ ທຸງໄຊນໍາໜ້າຂະບວນການແຂ່ງຂັນ 4 ບຸກ ປະຈໍາປີ 2021 ຂຶ້ນ ພາຍໃຕ້ການເປັນຄະນະປະທານຂອງສະຫາຍ ທອງມະນີ ໂຄດປັນຍາ ກຳມະການພັກແຂວງ, ກຳມະການຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ເລຂາ ຄະນະບໍລິຫານງານຊາວໜຸ່ມປະຊາຊົນປະຕິວັດລາວແຂວງ, ສະຫາຍ ນາງ ຟອງສະໜຸດ ພົງວິຈິດ ກຳມະການພັກແຂວງ, ເລຂາທິການສະພາປະຊາຊົນແຂວງ, ສະຫາຍ ທິລະພົງ ຈັນຕາ ຄະນະບໍລິຫານງານຊາວໜຸ່ມແຂວງ, ເລຂາຊາວໜຸ່ມໜ່ວຍຮາກຖານສະພາປະຊາຊົນແຂວງ, ມີຊາວໜຸ່ມແຮກສ່ຽວອ້ອມຂ້າງ ພ້ອມດ້ວຍສະມາຊິກ
ຊາວໜຸ່ມເຂົ້າຮ່ວມ 34 ສະຫາຍ, ຍິງ 18 ສະຫາຍ. ພິທີສະຫາຍ ນາງ ໄອ່ຄໍາ ສຸມີໄຊ ປະທານກວດກາ ຊາວໜຸ່ມໜ່ວຍຮາກຖານສະພາປະຊາຊົນແຂວງ ໄດ້ຂຶ້ນຜ່ານບົດສະຫຼຸບໃນການຈັດຕັ້ງປະຕິບັດຂໍ້ແຂ່ງຂັນ 4 ບຸກ ປະຈໍາປີ 2021 ແລະ ທິດທາງແຜນການປີ 2022 ຊາວໜຸ່ມຮາກຖານສະພາປະຊາຊົນແຂວງ ເປັນຮາກຖານເອກະລາດ ໂດຍພາຍໃຕ້ການນຳພາ-ຊີ້ນຳຂອງຄະນະພັກສະພາປະຊາຊົນແຂວງ ແລະ ຄະນະບໍລິຫານງານຊາວໜຸ່ມແຂວງ, ປະກອບມີ 2 ໜ່ວຍຂຶ້ນກັບ ຄື: ໜ່ວຍຄະນະເລຂາທິການ-ວັດທະນະທໍໍາ-ສັງຄົມ ແລະ ໜ່ວຍຍຸຕິທໍາ-ເສດຖະກິດ, ມີສະມາຊິກຊາວໜຸ່ມທັງໝົດ 35 ສະຫາຍ, ຍິງ 19 ສະຫາຍ. ຜ່ານການຈັດຕັ້ງປະຕິບັດເນື້ອໃນຂໍ້ແຂ່ງຂັນ 4 ບຸກ ເຫັນວ່າຖືກຕ້ອງຕາມເງື່ອນໄຂ, ມາດຖານ ທີ່ສູນກາງຊາວໜຸ່ມປະຊາຊົນປະຕິວັດລາວວາງອອກ ເຊິ່ງສາມາດສະແດງອອກແຕ່ລະດ້ານດັ່ງນີ້: ດ້ານການເມືອງ-ແນວຄິດ ຕີລາຄາສາມາດປະຕິບັດໄດ້ 95,5%, ດ້ານຝຶກຝົນຫຼໍ່ຫຼອມຮ່ຳຮຽນ ຕີລາຄາສາມາດປະຕິບັດໄດ້ 93%, ດ້ານວຽກງານການຈັດຕັ້ງ ຕີລາຄາສາມາດປະຕິບັດໄດ້ 95,5% ແລະ ດ້ານວິຊາຊີບສ້າງວຽກເຮັດງານທຳ ຕີລາຄາສາມາດປະຕິບັດໄດ້ 95,5%.
ໃນພິທີດັ່ງກ່າວ, ສະຫາຍ ທອງມະນີ ໂຄດປັນຍາ ກຳມະການພັກແຂວງ, ກຳມະການຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ເລຂາ ຄະນະບໍລິຫານງານຊາວໜຸ່ມປະຊາຊົນປະຕິວັດລາວແຂວງ ໄດ້ເປັນກຽດມອບໃບຢັ້ງຢືນ ແລະ ທຸງໄຊນຳໜ້າຂະບວນການແຂ່ງຂັນ 4 ບຸກ ໃຫ້ແກ່ຊາວໜຸ່ມໜ່ວຍຮາກຖານສະພາປະຊາຊົນແຂວງບໍລິຄໍາໄຊ; ພ້ອມມີຄໍາເຫັນໂອ້ລົມ ສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ຍາດມາໄດ້ໃນໄລຍະຜ່ານມາ ແລະ ເໜັ້ນໜັກໃຫ້ສະມາຊິກຊາວໜຸ່ມ ຈົ່ງເປັນເຈົ້າການເຕົ້າໂຮມຄວາມສາມັກຄີ ເອົາໃຈໃສ່ຈັດຕັ້ງປະຕິບັດເນື້ອໃນຂໍ້ແຂ່ງຂັນ 4 ບຸກ ຕິດພັນກັບໜ້າທີ່ວິຊາສະເພາະ ເປັນເສນາທິການທີ່ຫ້າວຫັນ, ເຂັ້ມແຂງໃຫ້ແກ່ຄະນະພັກ ພ້ອມທັງເພີ່ມທະວີການສ້າງຂະບວນການໃຫ້ຟົດຟື້ນ-ຕໍ່ເນື່ອງ ແລະ ຮັກສາມູນເຊື້ອນາມມະຍົດຊາວໜຸ່ມ 4 ບຸກໄວ້ໃຫ້ໝັ້ນຄົງຕະຫລອດໄປ.
(ຂ່າວ ແລະ ພາບ ໂສລະຢ໋າ ໄຊຍະວົງ)