ວັນທີ 2 ກໍລະກົດ 2024 ນີ້, ທີ່ຫ້ອງປະຊຸມຂອງສະພາປະຊາຊົນແຂວງສາລະວັນ ໄດ້ຈັດກອງປະຊຸມທາບທາມນິຕິກໍາໃຕ້ກົດໝາຍ 2 ສະບັບຄື: ຮ່າງຂໍ້ຕົກລົງ  ວ່າດ້ວຍການຄຸ້ມຄອງອາຫານປອດໄພຕາມຮ້ານອາຫານຢູ່ແຂວງສາລະວັນ (ສະບັບສ້າງໃໝ່) ແລະ ຮ່າງຂໍ້ຕົກລົງ ວ່າດ້ວຍການຄຸ້ມຄອງຢາປາບສັດຕູພືດຢູ່ແຂວງສາລະວັນ (ສະບັບປັບປຸງ); ໂດຍການເປັນປະທານຂອງທ່ານ ນາງ ສູນໄຖ ໄຊຍະແສງ ກໍາມະການພັກແຂວງ ຮອງປະທານສະພາປະຊາຊົນແຂວງ ຜູ້ປະຈໍາການ; ເຂົ້າຮ່ວມມີຮອງປະທານຄະນະກໍາມະການ, ຄະນະເລຂາທິການ, ຄະນະຮັບຜິດຊອບສ້າງນິຕິກໍາໃຕ້ກົດໝາຍຂັ້ນແຂວງ ແລະ ຕາງໜ້າຄະນະຮັບຜິດຊອບສ້າງຮ່າງນິຕິກໍາໃຕ້ກົດໝາຍ ຈາກພະແນກກະສິກໍາ ແລະ ປ່າໄມ້ແຂວງ ແລະ ພະແນກສາທາລະນະສຸກແຂວງ;

ຈຸດປະສົງ ເພື່ອເປັນການເອກະພາບກັນຄົ້ນຄວ້າປະກອບຄໍາຄິດຄໍາເຫັນ ເຂົ້າໃສ່ຮ່າງນິຕິກໍາໃຕ້ກົດໝາຍ ກວດກາທາງດ້ານໂຄງສ້າງ, ປັບປຸງເນື້ອໃນບາງໝວດບາງມາດຕາ ໃຫ້ເທດເໝາະກັບສະພາບຄວາມເປັນຈິງ ທັງຖືກຕ້ອງສອດຄ່ອງຕາມກົດໝາຍວ່າດ້ວຍການສ້າງນິຕິກໍາ ສະບັບເລກທີ 06/ສພຊ, ລົງວັນທີ 16 ພະຈິກ 2021, ເພື່ອເປັນຂໍ້ມູນໃຫ້ຄະນະຜິດຜິດຊອບສ້າງຮ່າງນິຕິກໍາໃຕ້ກົດໝາຍ ນໍາໄປປັບປຸງແກ້ໄຂໃຫ້ທັນກໍານົດເວລາທີ່ຈະນໍາເຂົ້າຄົ້ນຄວ້າ, ພິຈາລະນາ ແລະ ຮັບຮອງໃນກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນແຂວງສາລະວັນ ຊຸດທີ II ທີ່ຈະຈັດຂຶ້ນໃນທ້າຍເດືອນກໍລະກົດ ທີ່ຈະມາເຖິງນີ້;

ຮ່າງຂໍ້ຕົກລົງ ວ່າດ້ວຍການຄຸ້ມຄອງອາຫານປອດໄພຕາມຮ້ານອາຫານຢູ່ແຂວງສາລະວັນ ເປັນສະບັບສ້າງໃໝ່ ປະກອບມີທັງໝົດ 8 ໝວດ, 40 ມາດຕາ, ໂດຍເນື້ອໃນໄດ້ກໍານົດຫຼັກການ, ລະບຽບການ ແລະ ມາດຕະການ ກ່ຽວກັບການຄຸ້ມຄອງອາຫານໃຫ້ປອດໄພຢູ່ຕາມຮ້ານອາຫານພາຍໃນແຂວງສາລະວັນ, ເພື່ອເຮັດໃຫ້ວຽກງານດັ່ງກ່າວ ໄດ້ຮັບການຈັດຕັ້ງປະຕິບັດຢ່າງມີປະສິດທິພາບ, ປະສິດທິຜົນ ແລະ ທັນກັບສະພາບການ ຮັບປະກັນຄວາມສະອາດ ແລະ ປອດໄພຂອງອາຫານແນ່ໃສ່ປົກປ້ອງສຸຂະພາບຂອງຜູ້ບໍລິໂພກ ໃຫ້ມີພາລານາໄມທີ່ສົມບູນ, ມີສຸຂະພາບດີ ແລະ ປະກອບສ່ວນເຂົ້າໃນການສ້າງສາພັດທະນາປະເທດຊາດ;

ຂໍ້ຕົກລົງ ວ່າດ້ວຍການຄຸ້ມຄອງຢາປາບສັດຕູພືດຢູ່ແຂວງສາລະວັນ ໄດ້ຖືກຮັບຮອງເອົາໃນກອງປະຊຸມສະໄໝສາມັນເທື່ອທີ 05 ຂອງສະພາປະຊາຊົນແຂວງສາລະວັນ ຊຸດທີ I ໃນປີ 2018 ຜ່ານມາ, ປະກອບມີທັງໝົດ 10 ໝວດ, 41 ມາດຕາ; ໂດຍເນື້ອໃນໄດ້ກໍານົດຫຼັກການ, ລະບຽບການ ແລະ ມາດຕະການຄຸ້ມຄອງການນໍາໃຊ້ ແລະ ການຕິດຕາມກວດກາການເຄື່ອນໄຫວວຽກງານ ຢາປາບສັດຕູພືດ ແລະ ບັນດາກິດຈະກໍາທີ່ກ່ຽວຂ້ອງກັບຢ່າປາບສັດຕູພືດຢູ່ແຂວງສາລະວັນ, ຮັບປະກັນຄຸນນະພາບ, ປະສິດທິພາບ ແລະ ຄວາມປອດໄພຂອງຢາປາບສັດຕູພືດ ຕໍ່ຄົນ, ສັດ, ພືດ ແລະ ສິ່ງແວດລ້ອມ ແນໃສ່ເຮັດໃຫ້ການຜະລິດກະສິກໍາສະອາດ ສີຂຽວ ຍືນຍົງ ແລະ  ປະກອບສ່ວນເຂົ້າໃນການສ້າງສາພັດທະນາປະເທດຊາດ; ຜ່ານການຈັດຕັ້ງປະຕິບັດເຄື່ອນໄຫວໂຄສະນາເຜີຍແຜ່ ນິຕິກໍາຂໍ້ຕົກລົງດັ່ງກ່າວ ໄລຍະຜ່ານມາ ແລະ ຕິດຕາມກວດກາປະເມີນການຈັດຕັ້ງປະຕິບັດຕົວຈິງ ເຫັນວ່າພົບເຫັນຄວາມຫຍຸ້ງຍາກຫຼາຍບັນຫາ ໃນການຄຸ້ມຄອງ-ນໍາໃຊ້ ທີ່ບໍ່ທັນແທດເໝາະກັບສະພາບຄວາມເປັນຕົວຈິງໃນປັດຈຸບັນ; ພະແນກສາທາລະນະສຸກແຂວງ ທີ່ຮັບຜິດຊອບສ້າງນິຕິກໍາໃຕ້ກົດໝາຍສະບັບນີ້, ຈຶ່ງມີຄວາມຈໍາເປັນສະເໜີ ເຖິງສະພາປະຊາຊົນແຂວງ ຂໍປັບປຸງ ປະກອບມີ ໝວດທີ 2, ມາດຕາ 7; ໝວດທີ 4, ມາດຕາ 14 ເພີ່ມເນື້ອໃນຂໍ້ 1, 3, 5, 6, 7; ມາດຕາ 16 ຂໍ້ 1; ມາດຕາ 17 ເພີ່ມເນື້ອໃນຂໍ້ 13; ໝວດທີ 5, ມາດຕາ 20;

ພາບ-ຂ່າວ: ດີລໍາພົນ ພົມມະຈັນ