​ໃນວັນທີ 26 ເມສາ 2023, ທີ່ຫ້ອງປະຊຸມໃຫຍ່ຂອງສະພາປະຊາຊົນແຂວງ ໄດ້ເປີດກອງປະຊຸມທາບທາມຄຳຄິດເຫັນໃສ່ຮ່າງ ກົດໝາຍ ຈຳນວນ 4 ສະບັບ, ໂດຍການເປັນປະທານຂອງທ່ານ ວົງສະຫວັນ ເທບພະຈັນ ປະທານຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ6,  ມີບັນສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ6, ມີທ່ານຮອງເຈົ້າແຂວງ, ສະມາຊິກສະພາປະຊາຊົນແຂວງ ແລະ ມີບັນດາທ່ານ ຫົວໜ້າ-ຮອງຫົວໜ້າພະແນກທີ່ກ່ຽວຂ້ອງອ້ອມຂ້າງແຂວງກໍ່ໄດ້ໃຫ້ກຽດເຂົ້າຮ່ວມ, ຊຶ່ງກອງປະຊຸມດັ່ງກ່າວໄດ້ດຳເນີນໄປເປັນເວລາໜຶ່ງວັນ.

​ເນື້ອໃນກອງປະຊຸມໄດ້ຮັບຟັງການລາຍງານສະພາບລວມໂດຍຫຍໍ້ໃນການຈັດຕັ້ງປະຕິບັດທີ່ຜ່ານມາ ຂອງບັນດາ ກົດໝາຍ ທີ່ເຫັນວ່າຍັງບໍ່ທັນສອດຄ່ອງຮັດກຸມກັບສະພາບໃນປະຈຸບັນ. ສະນັ້ນ, ຈຶ່ງໄດ້ມີການເປີດກອງປະຊຸມທາບທາມຄຳຄິດເຫັນໃສ່ ເພື່ອປັບປຸງຮ່າງກົດໝາຍ ຈຳນວນ 4 ສະບັບນີ້ຂຶ້ນຄື: ກົດໝາຍ ວ່າດ້ວຍສານປະຊາຊົນ ກົດໝາຍ ວ່າດ້ວຍອົງການໄອຍະການປະຊາຊົນ, ກົດໝາຍ ວ່າດ້ວຍການດໍາເນີນຄະດີອາຢາ, ກົດໝາຍ ວ່າດ້ວຍການດຳເນີນຄະດີແພ່ງ ເພື່ອສະຫຼຸບຕີລາຄາຄືນໃນການຈັດຕັ້ງປະຕິບັດ ກົດໝາຍ ດັ່ງກ່າວໃນໄລຍະຜ່ານມາ ເພື່ອໃຫ້ບັນດາທ່ານສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ6, ສະມາຊິກສະພາປະຊາຊົນແຂວງ ແລະ ຜູ້ແທນກອງປະຊຸມ ປະກອບຄຳຄິດເຫັນໃສ່ແຕ່ລະບັນດາ ຮ່າງກົດໝາຍ ໃຫ້ມີເນື້ອໃນຮັດກຸມ ແລະ ແທດເໝາະກັບສະພາບການຈັດຕັ້ງປະຕິບັດໃນປະຈຸບັນ.

​ໃນຕອນທ້າຍປະທານກອງປະຊຸມ ໄດ້ເນັ້ນໜັກໃຫ້ບັນທ່ານສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ6, ສະມາຊິກສະພາປະຊາຊົນແຂວງ ແລະ ບັນດາທ່ານຫົວໜ້າ-ຮອງຫົວໜ້າພະແນກການທີ່ກ່ຽວຂ້ອງ ຈົ່ງເປັນເຈົ້າການໃນການຈັດຕັ້ງປະຕິບັດບັນດາ ນິຕິກຳ, ກົດໝາຍ ແລະ ນຳເອົາບັນດາເນື້ອໃນຈິດໃຈຂອງບັນດາກົດໝາຍ ໄປເຜີຍແຜ່ອອກສູ່ສັງຄົມ.

​​​​​​​​ຂ່າວ ວິລິຍະ ວັນນະສີ